வங்கக்கடலில் உருவானது புயல்சின்னம்: டெல்டாவில் இன்று கனமழைக்கு வாய்ப்பு

சென்னை: வங்கக்கடலில் திங்கள்கிழமை காற்றழுத்தத் தாழ்வு பகுதி (புயன்சின்னம்) உருவாகியுள்ளதாக வானிலை ஆய்வு மைய தென்மண்டலத் தலைவா் பி. அமுதா தெரிவித்தாா். மேலும், டெல்டா மாவட்டங்களில் ஏப்.8-ஆம் தேதி கனமழை பெய்ய வாய்ப்புள்ளதாகவும் அவா் கூறினாா்.

இது குறித்து அவா் சென்னையில் செய்தியாளா்களிடம் கூறியதாவது:

தென்கிழக்கு வங்கக்கடல் மற்றும் அதனையொட்டிய பகுதிகளின் மேல் நிலவும் வளிமண்டல மேலடுக்கு சுழற்சி காரணமாக,திங்கள்கிழமை தெற்கு வங்கக்கடலின் மத்திய பகுதிகளில் காற்றழுத்த தாழ்வு பகுதி உருவாகியுள்ளது. இது வடமேற்கு திசையில் நகா்ந்து, ஏப்.8-இல் தென்மேற்கு வங்கக்கடலில் நிலவும். இதைத்தொடா்ந்து இந்த புயல்சின்னம் மேலும் வடக்கு திசையில் நகா்ந்து, ஏப்.9-இல் மத்திய மேற்கு வங்கக்கடல் பகுதிக்குச் செல்லும்.

கனமழை எச்சரிக்கை: இதன்காரணமாக செவ்வாய்க்கிழமை (ஏப்.8) முதல் ஏப்.13 வரை தமிழகத்தில் ஓரிரு இடங்களிலும், புதுச்சேரி மற்றும் காரைக்கால் பகுதிகளிலும் இடி, மின்னல் மற்றும் காற்றுடன் கூடிய மிதமான மழைக்கு வாய்ப்புள்ளது. இதில் ஏப்.8-இல் புதுக்கோட்டை, தஞ்சாவூா், திருவாரூா், நாகை, மயிலாடுதுறை மாவட்டங்களில் ஓரிரு இடங்களிலும், காரைக்கால் பகுதிகளிலும் கன மழைக்கு வாய்ப்புள்ளது.

சென்னை மற்றும் புகா் பகுதிகளில் ஏப்.8-இல் லேசான மழைக்கு வாய்ப்புள்ளது. எனினும் அதிகபட்ச வெப்பநிலை 98 டிகிரி ஃபாரன்ஹீட்டையொட்டி இருக்கும்.

மழை அளவு: தமிழகத்தில் திங்கள்கிழமை காலை வரை அதிகபட்சமாக கன்னியாகுமரி மாவட்டம் பெருஞ்சாணி அணை மற்றும் புத்தன் அணை பகுதியிலும், மதுரை மாவட்டம் எழுமலையிலும் தலா 80 மி.மீ. மழை பதிவாகியுள்ளது. மேலும் கள்ளிக்குடி (மதுரை), அரவக்குறிச்சி (கரூா்) - தலா 70 மி.மீ., காரியாப்பட்டி (விருதுநகா்), உசிலம்பட்டி (மதுரை), எருமைப்பட்டி (நாமக்கல்), சண்முகாநதி (தேனி) - தலா 60 மி.மீ. மழை பதிவானது.

மீனவா்களுக்கான எச்சரிக்கை: ஏப்.9 முதல் ஏப்.11-ஆம் தேதி வரை தென் தமிழக கடலோரப்பகுதிகள், குமரிக்கடல், மற்றும் மன்னாா் வளைகுடாவில் மணிக்கு 55 கி.மீ. வேகத்தில் காற்று வீசக்கூடும்.

3 இடங்களில் வெயில் சதம்: தமிழகத்தில் திங்கள்கிழமை பரவலாக மழை பெய்ய போதும், 3 இடங்களில் வெயில் சதம் அடிந்துள்ளது. வேலூரில் அதிகபட்சமாக 101.48 டிகிரி ஃபாரன்ஹீட்டும், சேலம், திருப்பதூா் - தலா 100.4 டிகிரி ஃபாரன்ஹீட்டும் வெப்பம் பதிவானது. புயல்சின்னம் காரணமாக வங்கக்கடல் குளிா் காற்று தமிழகத்துக்குள் வர வாய்ப்பில்லை என்பதால், தமிழகத்தில் அடுத்த 6 நாள்களுக்கு அதிகபட்ச வெப்பநிலை இயல்பை விட 2 முதல் 3 டிகிரி செல்சியல் வரை படிப்படியாக உயரும் என அவா் தெரிவித்தாா்.