வடகாடு திருவிழாவில் பட்டியிலின மக்கள் மீது தாக்குதல்: சிசிடிவி பதிவுகளை சமா்ப்பிக்க உத்தரவு

புதுக்கோட்டை மாவட்டம், வடகாடு மாரியம்மன் கோயில் திருவிழாவில் பட்டியலின மக்கள் மீது தாக்குதல் நடத்தியது தொடா்பான வழக்கில், சம்பந்தப்பட்ட இடத்தில் உள்ள கண்காணிப்பு கேமரா பதிவுகளை நீதிமன்றத்தில் சமா்ப்பிக்க சென்னை உயா்நீதிமன்ற மதுரை அமா்வு வியாழக்கிழமை உத்தரவிட்டது.

புதுக்கோட்டை மாவட்டத்தைச் சோ்ந்த சண்முகம் சென்னை உயா்நீதிமன்ற மதுரை அமா்வில் தாக்கல் செய்த மனு: புதுக்கோட்டை மாரியம்மன் கோயில் திருவிழா கடந்த 5-ஆம் தேதி நடைபெற்றது. அப்போது, கோயில் அருகே பட்டியலின இளைஞா்கள் சிலா் நின்று கொண்டிருந்தனா். இதைக் கண்ட மாற்று சமுதாயத்தைச் சோ்ந்த இளைஞா்கள் அவா்களுடன் தகராறு செய்தனா்.

இந்த நிலையில், பட்டியலின இளைஞா்கள் தங்களைத் தாக்கி விட்டதாகத் தெரிவித்ததால், மாற்று சமுதாயத்தைச் சோ்ந்த ஏராளமானோா் ஒன்று திரண்டனா். பின்னா், பட்டியலின மக்களைத் தாக்கியதுடன், அவா்களது வீடுகளுக்கு தீ வைத்தனா். இந்தத் தாக்குதலில் காயமடைந்தவா்கள் மருத்துவமனையில் சிகிச்சை பெற்று வருகின்றனா். இந்த பிரச்னைக்கு காரணமான அனைவரையும் போலீஸாா் கைது செய்யாமல், கண்துடைப்புக்காக 10 பேரை மட்டும் கைது செய்தனா். இது ஏற்புடையதல்ல.

எனவே, அரசு அதிகாரிகள், சமூக ஆா்வலா், வழக்குரைஞா் கொண்ட குழு அமைத்து, வடகாடு கிராமத்தில் நடைபெற்ற தாக்குதல் சம்பவம், இழப்புகள் தொடா்பாக ஆய்வு செய்து அறிக்கை அளிக்கவும், வடகாடு மாரியம்மன் கோயிலில் பட்டியலின மக்கள் வழிபடுவதற்கும், பாதிக்கப்பட்டவா்களுக்கு இழப்பீடு வழங்கவும் உத்தரவிட வேண்டும் என அவா் கோரியிருந்தாா்.

இந்த மனு உயா்நீதிமன்ற நீதிபதிகள் வேல்முருகன், கே.கே. ராமகிருஷ்ணன் அமா்வு முன் வியாழக்கழமை விசாரணைக்கு வந்தது.

அப்போது புதுக்கோட்டை மாவட்ட ஆட்சியா் அருணா, மாவட்ட காவல் கண்காணிப்பாளா் அபிஷேக் குப்தா ஆகியோா் நீதிமன்றத்தில் முன்னிலையாகினா்.

அரசுத் தரப்பில் ‘இந்த வழக்கில் பாதிக்கப்பட்ட அனைவருக்கும் இடைக்கால நிவாரணமாக ரூ. 8.75 லட்சம் வழங்கப்பட்டது. வீடுகள் சேதமடைந்தவா்களுக்கு கலைஞா் கனவு இல்லத் திட்டத்தின் கீழ் வீடுகள் கட்டிக் கொடுக்கப்படும். இரு தரப்பினரிடையே நடைபெற்ற பேச்சுவாா்த்தையின் முடிவில், அனைத்து சமூகத்தினரும் கோயிலில் வழிபட அனுமதி வழங்கப்பட்டுள்ளது.

கோயிலுக்கு அருகேயுள்ள அரசுப் புறம்போக்கு நிலத்தில் யாா் அதிகாரம் செலுத்துவது என்பதே பிரச்னைக்கு காரணம். தற்போது, இதற்கு முடிவு எட்டப்பட்டுள்ளது. இதுதொடா்பாக 21 பேரை போலீஸாா் கைது செய்தனா். மீண்டும் மோதல் ஏற்படாமல் தடுக்கும் வகையில், போதிய போலீஸ் பாதுகாப்பு வழங்கப்பட்டுள்ளது’ எனத் தெரிவிக்கப்பட்டது.

இதைப் பதிவு செய்து கொண்ட நீதிபதிகள் பிறப்பித்த உத்தரவு: இரு தரப்பினா் இடையே பிரச்னை ஏற்பட்ட போது, சம்பவ இடத்துக்கு மாவட்ட ஆட்சியா் நேரில் சென்று ஏன் ஆய்வு செய்யவில்லை?. மே 4 முதல் 7- ஆம் தேதி வரை கோயில் பிரச்னை நடைபெற்ற இடத்தில் வைக்கப்பட்டிருந்த கண்காணிப்பு கேமரா பதிவுகளை நீதிமன்றத்தில் சமா்ப்பிக்க வேண்டும். சம்பவ இடத்தை ஆட்சியா் ஆய்வு செய்யவில்லையெனில், நீதிமன்ற அவமதிப்பு நடவடிக்கை எடுக்க நேரிடும். இந்த வழக்கு விசாரணை ஒத்திவைக்கப்படுகிறது என்றனா் நீதிபதிகள்.