`விஜய் கட்சி, அந்த 2 சமூக வாக்குகளை டார்கெட் செய்கிறது’ - 9 தொகுதிகளை அலசிய அமைச்சர் எ.வ.வேலு
Admin
- 2 days ago
செப்டம்பர் 3-ம் தேதியான நேற்று... வேலூர், ராணிப்பேட்டை ஆகிய இரு மாவட்டங்களிலுள்ள 9 சட்டமன்றத் தொகுதிகளின் ஒருங்கிணைப்பாளர்களுடன் தி.மு.க-வின் வடக்கு மண்டல தேர்தல் பொறுப்பாளரான அமைச்சர் எ.வ.வேலு ஆலோசனை நடத்தினார். வேலூர் புதிய பேருந்து நிலையம் அருகிலுள்ள தி.மு.க மாவட்டச் செயலாளரும், அணைக்கட்டு தொகுதி எம்.எல்.ஏ-வுமான ஏ.பி.நந்தகுமாரின் ஹோட்டலில் நடந்த அந்தக் கூட்டத்தில் தொகுதி வாரியாக நிலவும் பிரச்னைகளை அடுக்கி எம்.எல்.ஏ-க்களையும், கட்சி நிர்வாகிகளையும் விளாசி எடுத்துவிட்டாராம் எ.வ.வேலு.
இது குறித்து, தி.மு.க நிர்வாகிகள் சிலரிடம் கேட்டபோது, ``ஆலோசனைக் கூட்டத்தில், குறிப்பாக வேலூர் எம்.எல்.ஏ கார்த்திகேயன் மீதான கடும் அதிருப்திகளை வெளிப்படுத்தி பேசிய அமைச்சர் எ.வ.வேலு, `வேலூர் தொகுதியில் கணிசமாக உள்ள முதலியார்கள், இஸ்லாமியர்களின் வாக்குகளை நடிகர் விஜய்யின் கட்சி டார்கெட் செய்திருக்கிறது.
அதேபோல, செட்டியார் போன்ற சமூக வாக்குகளும் ஆன்மிக ரீதியாக பா.ஜ.க-வுக்குப் போக வாய்ப்பிருக்கிறது. இந்தச் சமூக வாக்குகள் அவர்களுக்குப் போய்விடக் கூடாது என்பதை மனதில் வைத்து தேர்தல் பணியாற்றுங்கள்’ என்றாராம். அதுமட்டுமல்லாமல், `வேலூர் மாவட்டச் செயலாளர் ஏ.பி.நந்தகுமாரிடமும், வேலூர் எம்.பி கதிர் ஆனந்திடமும் எம்.எல்.ஏ கார்த்திகேயன் நல்ல அணுகுமுறையில் இல்லை. மாற்றுக் கட்சிகளில் இருந்து தி.மு.க-வுக்கு வந்த முன்னாள் அமைச்சர் வி.எஸ்.விஜய், முன்னாள் எம்.எல்.ஏ-க்கள் ஞானசேகரன், நீலகண்டன் ஆகியோர் உட்பட நான்கைந்து பகுதி செயலாளர்களையும், மேலும் சில மூத்த நிர்வாகிகளையும் எம்.எல்.ஏ கார்த்திகேயன் சரியாக அரவணைக்கவில்லை.
வேலூர் தொகுதியில், வன்னியர் சமூகத்துக்கு எந்தவித முக்கியத்துவமும் கொடுக்கப்படவில்லை’ எனக் குற்றச்சாட்டு வந்திருப்பதாகவும் அமைச்சர் எ.வ.வேலு கூறினாராம். அதற்குப் பதிலளித்த வேலூர் மாவட்டச் செயலாளர் ஏ.பி.நந்தகுமார், `வன்னியர் சமூகத்தைச் சேர்ந்த கட்சியினருக்கு வட்டச் செயலாளர் போன்ற பதவிகளைக் கொடுத்திருக்கிறோம். இதற்கு மேலும் தர வேண்டுமென்றாலும் வழங்கத் தயாராக இருக்கிறோம்’ என்றார்.
`காட்பாடி தொகுதியை பொதுச்செயலாளர் அண்ணன் துரைமுருகன் பார்த்துக்கொள்வார்’ என்று ஒருவரியோடு கடந்து சென்றுவிட்டார் எ.வ.வேலு. கே.வி.குப்பம் தொகுதி பொறுப்பாளர் விவகாரத்தில் எம்.பி கதிர் ஆனந்துக்கு எதிராக அவரின் உறவினரான காங்குப்பம் வி.டி.சிவகுமார் என்பவர் ஆட்சேபனை தெரிவித்தாராம்.
வரும் தேர்தலில், ஆற்காடு தொகுதியில் `சீட்’ எதிர்பார்க்கும் அமைச்சர் துரைமுருகன், எம்.பி ஜெகத்ரட்சகன் ஆகியோரின் தீவிர ஆதரவாளராக அறியப்படும் ராணிப்பேட்டை மாவட்டப் பொருளாளர் ஏ.வி.சாரதியை ஓரங்கட்டும் முயற்சியில் அந்த மாவட்ட அமைச்சர் காந்தியும், ஆற்காடு எம்.எல்.ஏ ஈஸ்வரப்பனும் கூட்டாகச் சேர்ந்து காய் நகர்த்திக்கொண்டிருக்கிறார்கள் என்கிற தகவல் வெளியானது.
ஆலோசனைக் கூட்டத்தில் கலந்துகொள்ளவும் ஏ.வி.சாரதிக்கு அவர்கள் அழைப்பு விடுக்கவில்லை. இதையும் கவனித்து, அமைச்சர் காந்தியிடமும், எம்.எல்.ஏ ஈஸ்வரப்பனிடமும் கேள்வியெழுப்பினார் எ.வ.வேலு. இதேபோல, இரண்டு மாவட்டங்களிலுள்ள மற்றத் தொகுதிகளின் பிரச்னைகளையும் அலசினார். `நான் இப்போது கேட்டதெல்லாம், நானாக விசாரித்தவை இல்லை. பென் டீம், உளவுத்துறை தயார் செய்து முதலமைச்சரிடம் கொடுத்தது. அந்த ரிப்போர்ட் தான் என்னிடம் இருப்பது’ என்றும் எ.வ.வேலு கடுமை காட்டினாராம். முடிவாக, மட்டன் பிரியாணி, சிக்கன் 65, ஸ்வீட், ஐஸ்கிரீம் என பஃபே விருந்துடன் தொகுதி ஒருங்கிணைப்பாளர்களுக்கு கவனிப்பும் இருந்ததாம்’’ என்றனர்.
