கே. நடராஜன்
உணவைத்தேடி வனப்பகுதியிலிருந்து வெளியேறும் யானைகள் விளைநிலங்களுக்குள் நுழைந்து பயிா்களை சேதப்படுத்துவது தவிா்க்கப்படுமா என விவசாயிகள் எதிா்நோக்கியுள்ளனா்.
யானைகள் குடிநீா் மற்றும் உணவைத்தேடி தான் வனப்பகுதிகளிலிருந்து வெளியே வருகின்றன. குடிநீரும், உணவும் வனப்பகுதியில் கிடைத்தால், அவற்றை உட்கொண்டு விட்டு யானைகள் வனப்பகுதியிலேயே சுற்றித் திரியும். மழைக் காலங்களில் வனப்பகுதியில் உள்ள குளம், குட்டைகளில் தேங்கும் தண்ணீா் அவற்றுக்கு போதுமானதாக இருந்தாலும், உணவைத்தேடி அவை வெளியே வருகின்றன.
தற்போது நிகழ்வதுபோல் கடந்த காலங்களில் யானைகள் வனப்பகுதிகளில் வெளியே வருவதில்லை. காரணம் அவைகளுக்குத் தேவையான உணவுகள் அங்கேயே கிடைத்து வந்தன. யானைகளுக்குத் தேவையான பழ வகை மரங்கள் உள்ளிட்ட உணவுத் தாவரங்கள் வனப்பகுதியில் இருந்ததால் உணவுத் தேவை அங்கேயே தீா்க்கப்பட்டு வந்தன.
வனப்பகுதிகளில் உள்ள சில வகை மரங்கள் சமூக விரோதிகளால் வெட்டிக் கடத்தப்படுவதாலும், வன எல்லையில் உள்ள கிராம மக்கள் விறகுக்காக மரங்களை வெட்டுவதாலும், மரங்கள் படிப்படியாக அழிக்கப்பட்டு வருகின்றன. இதனால் தங்களுக்குத் தேவையான உணவைத்தேடி யானைகள் கிராமங்களுக்குள் நுழைந்து விளை பயிா்களை உள்கொண்டு விட்டு, அவற்றை சேதப்படுத்தி விட்டுச் செல்கின்றன.
யானைகளுக்குத் தேவையான உணவு கிடைத்தால், அவை வனப்பகுதியிலிருந்து வெளியேற வாய்ப்புகள் மிகவும் குறைவு. வனப்பகுதியில் யானைகளில் உணவுத்தேவையை தீா்க்கும் நடவடிக்கைகளை வனத்துறையினா் மேற்கொள்ள வேண்டும்.
யானைகள் கிராமங்களுக்குள் நுழைவதைத் தடுக்க வன எல்லையில் அகழி வெட்டும் திட்டத்தை வனத்துறை செயல்படுத்தியது. அகழி வெட்டினால், யானைகள் தனது தும்பிக்கையால் மண்ணை சரித்து அகழியை நிரப்பி விட்டு, கிராமங்களுக்குள் நுழைகின்றன. இதனால் இத்திட்டம் பயன்படாமல் போனது.
இதன் அடுத்தகட்டமாக விவசாயிகள் தங்கள் நிலங்களைச் சுற்றி சோலாா் மின் வேலி அமைத்து யானைகள் நிலங்களுக்குள் நுழைவதைத் தடுத்து வருகின்றனா். வசதிபடைத்த விவசாயிகள் சோலாா் மின் வேலி அமைத்துக் கொள்கின்றனா். நடுத்தர, அடித்தட்டு விவசாயிகளுக்கு இது வாய்ப்பில்லை என்பதால் அரசே வன எல்லையைச் சுற்றி சோலாா் மின் வேலி அமைத்துத் தர வேண்டும் என பெரும்பாலான விவசாயிகள் காத்துள்ளனா்.
இதுகுறித்து தமிழக விவசாயிகள் சங்க மாநில பொதுச் செயலா் போ்ணாம்பட்டைச் சோ்ந்த எஸ்.உதயகுமாா் கூறியது. வனப்பகுதியில் இருந்து வெளியேறும் யானைகளை விரட்ட போதுமான கருவிகள் இல்லை. யானைகள் நுழைந்தால், கிராம மக்கள் உதவியுடன் தான் வனத்துறையினா் பட்டாசு வெடித்து, மேளம் அடித்து யானைகளை வனப் பகுதிக்கு விரட்டுகின்றனா். ஆந்திர, கா்நாடக மாநில அரசுகள் தங்கள் வனத்துறைக்கு ரப்பா் குண்டுகளை பயன்படுத்தும் துப்பாக்கிகளை வழங்கியுள்ளன. அம்மாநில வனத் துறையினா் ரப்பா் குண்டுகளை பயன்படுத்துவதால் யானைகள் கூட்டமாக தமிழக எல்லைப் பகுதிக்கு வரத் தொடங்கியுள்ளன. ஆந்திர மாநில அரசு கெளண்டன்யா என்ற பெயரில் யானைகள் சரணாலயம் அமைத்து யானைகளின் தேவைகளை பூா்த்தி செய்து வருகிறது.
அதே போல் தமிழக அரசும் யானைகள் சரணாலயம் அமைத்து, அதில் யானைகளின் தேவையை பூா்த்தி செய்தால் யானைகள் கிராமங்களுக்குள் நுழைவது தடுக்கப்படும். கூட்டமாக வரும் யானைகள் சோலாா் மின் வேலியையும் சேதப்படுத்துகின்றன.அதைத் தடுக்க கேரள, கா்நாடக மாநில அரசுகளைப் போல் வன எல்லையில், ரயில்வே தண்டவாளங்களால் தடுப்பு வேலி அமைக்க வேண்டும். இதனால் யானைகள் நிலங்களுக்குள் நுழைவது முழுவதும் தடுக்கப்படும் என்றாா்.
