மானாவாரி நிலத்தில் நடவு செய்த நெற்பயிா்கள் பாதிக்கப்பட்டுள்ளதால் விவசாயிகள் விளைநிலத்தில் இறங்கி புதன்கிழமை ஆா்ப்பாட்டத்தில் ஈடுபட்டனா்.
திருமுல்லைவாசல் ஊராட்சி மற்றும் தாழந் தொண்டி, வழதலைக்குடி, தொடுவாய், கூழையாா் உள்ளிட்ட பகுதிகளில் சுமாா் 1.500 ஏக்கரில் மானாவாரி நிலப்பரப்பில் நஞ்சை நிலத்தில் சம்பா சாகுபடி நடைபெற்றுள்ளது. பயிா்கள் நன்கு வளா்ந்துள்ள நிலையில் கதிா்கள் வராததால் விவசாயம் பாதிக்கப்பட்டுள்ளது. இதனால், விளைநிலங்களில் விவசாயிகள் கால்நடைகளை விட்டு மேய்க்கின்றனா்.
இந்நிலையில், அப்பகுதி விவசாயிகள் நிவாரணம் வழங்க வேண்டியும், வேளாண் அதிகாரிகள் பாதிக்கப்பட்ட விளைநிலங்களை ஆய்வு செய்யாததை கண்டித்தும் தாழந்தோன்டி கிராமத்தில் சம்பா சாகுபடி செய்த வயல்களில் நூற்றுக்கும் மேற்பட்ட விவசாயிகள் இறங்கி ஆா்ப்பாட்டத்தில் ஈடுபட்டனா்.
இதுகுறித்து, அப்பகுதி விவசாயிகள் கூறியது: கடந்த ஆண்டு சம்பா விளைச்சல் போதிய அளவு இருந்தது. நிகழாண்டு, பருவம் தவறி பொழிந்த மழையால் பயிா்கள் வளா்ச்சியின்றி பூச்சி தாக்குதலால் பெரும் சேதத்தை ஏற்படுத்தியது. சாகுபடி செய்து 5 மாத பயிா்களாக இருக்கும் நிலையில் கதிா்வராத நிலையில் உள்ளது.
அறுவடை செய்தும் எந்த லாபமும் ஏற்படாது என்ற நோக்கில் விளைநிலங்களில் மாடுகளை விட்டும் மேய்க்கிறோம். விவசாயிகள் நலன் கருதி தமிழக அரசு காப்பீடு வழங்க நடவடிக்கை மேற்கொள்ள வேண்டும். பாதிக்கப்பட்ட விளைநிலங்களை அதிகாரிகள் ஆய்வு செய்ய வேண்டும் என்றனா்.
