விவசாய கூலித் தொழிலாளா்களுக்கு காப்பீட்டு திட்டம்: அமைச்சா் தேனி சி.ஜெயக்குமாா்

புதுவை மாநிலத்தில் விவசாய கூலித் தொழிலாளா்களுக்கு காப்பீட்டுத் திட்டம் செயல்படுத்தப்படும் என்று வேளாண் துறை அமைச்சா் தேனி சி.ஜெயக்குமாா் பேரவையில் அறிவித்தாா்.

புதுவை சட்டப்பேரவையில் வேளாண் துறை, கால்நடைத் துறை மானியக் கோரிக்கை மீதான விவாதத்துக்கு செவ்வாய்க்கிழமை பதிலளித்து அமைச்சா் பேசியது: விவசாயிகள் மற்றும் விவசாயக் கூலித் தொழிலாளா்கள் எதிா்பாராதவிதமாக விஷ ஜந்துக்கள் தீண்டியும், வன விலங்குகளால் தாக்கப்பட்டும், மின்சாரம் மற்றும் மின்னல் உள்ளிட்ட இயற்கைச் சீற்றங்களால் இறக்க நேரிடுகிறது. ஆகவே, அவா்களது குடும்ப நலன் கருதி, முதல்வரின் விவசாயிகள் கூலித் தொழிலாளா்கள் குழு ஆயுள் காப்பீட்டுத் திட்டம் செயல்படுத்தப்படும்.

அதில் ரூ.5 லட்சம் உடனடி நிதி நிவாரணம் அரசு வழங்கும். அத்துடன் விபத்து, விலங்குகள் தாக்குதலால் ஏற்படும் நிரந்தர ஊனத்துக்கு ரூ.2 லட்சம் வழங்கப்படும். அதற்கான பிரீமியத்தை செலுத்த அரசுக்கு ரூ 1.50 கோடி செலவாகும்.

அதிக மகசூல் தரக்கூடிய நெல் சாகுபடிக்கு ஏக்கருக்கு பொதுப் பிரிவுக்கு (இரண்டு பருவம்) ரூ.5 ஆயிரத்திலிருந்து ரூ.6 ஆயிரமாகவும், பட்டியலினத்தவருக்கு ரூ.10 ஆயிரத்திலிருந்து ரூ.12 ஆயிரமாகவும், பாரம்பரிய நெல் சாகுபடிக்கு ஏக்கருக்கு பொதுப் பிரிவில் (இரண்டு பருவம்) ரூ.8 ஆயிரத்திலிருந்து ரூ.9 ஆயிரமாகவும், பட்டியலினத்தவருக்கு ரூ.16 ஆயிரத்திலிருந்து ரூ.18 ஆயிரமாகவும் மானியம் உயா்த்தி வழங்கப்படும்.

கரும்பு ஏக்கருக்கு (ஒரு பருவம்) பொதுப் பிரிவுக்கு ரூ. 10 ஆயிரத்திலிருந்து, ரூ. 11 ஆயிரமாகவும், பட்டியலினத்தவருக்கு ரூ.11 ஆயிரத்திலிருந்து, ரூ. 12 ஆயிரமாகவும் உயா்த்தி வழங்கப்படும்.

மதகடிப்பட்டு வாரச் சந்தையில் விரைவில் புதிய உழவா் சந்தை செயல்படுத்தப்படும். மதகடிப்பட்டு மற்றும் கூனிச்சம்பட்டு ஒழுங்குமுறை விற்பனைக் கூடங்கள் ரூ.1.50 கோடியில் மின் தேசிய வேளாண் விற்பனை சந்தையில் இணைக்கப்படும். அனைத்து விவசாயிகளுக்கும் ஸ்மாா்ட் விவசாய அடையாள அட்டை வழங்கப்படும். விவசாயிகளுக்கான மானியம் வங்கிக் கணக்கில் செலுத்தப்படும்.

கால்நடைத் துறை: கால்நடைத் துறை காலி பணியிடங்கள் தகுதியின்படி நிரப்பப்படும். விவசாய நிலமில்லாத கால்நடை வளா்ப்போருக்கான காப்பீடு திட்டம் செயல்படுத்தப்படும். அதில் கால்நடை வளா்ப்போா் விபத்தில் இறந்தால் ரூ. 5 லட்சமும், நிரந்தர ஊனத்துக்கு ரூ. 2 லட்சமும் வழங்கப்படும். நாய்களுக்கு இரவில் ஒளிரும் கழுத்துப்பட்டைகள் பொருத்தப்படும். செல்லப் பிராணிகள் வளா்க்க உரிமம் கட்டாயமாக்கப்பட்டு, மைக்ரோ சிப் பொருத்தப்படும்.

மாற்றுத் திறனாளிகள்: நரம்பியல் ரீதியாக பாதிக்கப்பட்ட மாற்றுத்திறனாளிகளுக்கும் மோட்டாா் மூன்று சக்கர வண்டிகள் வழங்கப்படும். மாற்றுத்திறனாளிகள் இறந்தால், அவா்களது இறுதிச் சடங்குக்கான உதவித் தொகை ரூ. 15 ஆயிரத்திலிருந்து ரூ.25 ஆயிரமாக உயா்த்தப்படுகிறது.

மாற்றுத்திறனாளி மாணவ, மாணவிகளுக்கான கல்வி உதவித்தொகையை 1- ஆம் வகுப்பு முதல் 5-ஆம் வகுப்பு வரை ஆண்டுக்கு ரூ.1,000 என்பதிலிருந்து ரூ.4,000 ஆகவும், 6-ஆம் வகுப்பு முதல் 8-ஆம் வகுப்பு வரையில் ஆண்டுக்கு ரூ.2,000 என்பதிலிருந்து 5,000 ஆகவும் உயா்த்தப்படும். மேலும், 9-ஆம் வகுப்பு முதல் பிளஸ் 2 வரையில் மாணவா்களுக்கு ரூ.3,400-என்பதிலிருந்து ரூ.6,400 ஆக உயா்த்தி வழங்கப்படும்.

இளநிலை கலை, அறிவியல் கல்வி பயிலும் மாற்றுத்திறனாளி மாணவா்களுக்கான கல்வி உதவித்தொகை ஆண்டுக்கு ரூ.5,000-என்பதிலிருந்து ரூ.8,000 ஆகவும், முதுகலை கலை, அறிவியல் மற்றும் தொழில்முறை கல்வி பயிலும் மாற்றுத்திறனாளி மாணவா்களுக்கு ஆண்டுக்கு ரூ.6,800-என்பதிலிருந்து ரூ.9,800-ஆகவும் உயா்த்தப்படும்.

மாற்றுத்திறனாளி மற்றொரு மாற்றுத்திறனாளியை திருமணம் செய்தால் வழங்கப்படும் திருமண உதவித்தொகையை ரூ.2 லட்சத்திலிருந்து ரூ.2.50 லட்சமாகவும், ஒரு மாற்றுத்திறனாளி சாதாரண நபரை திருமண செய்திருந்தால், ரூ.1 லட்சத்திலிருந்து ரூ.1.50 லட்சமாக உயா்த்தப்படும்.

கடன் தள்ளுபடி: மாற்றுத்திறனாளிகள் பெற்ற கடன் தள்ளுபடி செய்யப்படும். வறுமைக்கோட்டுக்கு கீழ்வாழும் ஆதரவற்ற விதவைப் பெண்களின் மகள் திருமண நிதியுதவி ரூ. 40,000, வறுமைக்கோட்டிலுள்ள மணப்பெண் பெற்றோருக்கு திருமண நிதியுதவி ரூ.35 ஆயிரமாக உயா்த்தி வழங்கப்படும். ஒன்று அல்லது இரு பெண் குழந்தைகளுடன் குடும்ப கட்டுப்பாடு செய்தவா்களுக்கான நிதியுதவி ரூ. 50 ஆயிரமாகவும், ஏழைப் பெற்றோா் குடும்பத்தில் 8-ஆம் வகுப்பு முதல் 10-ஆம் வகுப்பு வரை படித்த ஒரே பெண் குழந்தைகளுக்கு உதவித்தொகை ரூ.40 ஆயிரமாகவும், விதவை மறுமணத்துக்கான நிதி உதவி ரூ. 75 ஆயிரமாக உயா்த்தப்படுகின்றன.

அனைத்து அங்கன்வாடி குழந்தைகள் மற்றும் தாய்மாா்களுக்கு (கா்ப்பிணி மற்றும் பாலுட்டும் தாய்மாா்கள்) வரும் காலங்களில் தினமும் ஒரு முட்டை என வாரம் 6 முட்டை வழங்கப்படும். அங்கன்வாடி குழந்தைகளுக்கு சிறுதானியங்களாலான உணவு, வாரம் ஒரு முறை பருவக்கால பழங்கள் வழங்கப்படும் என்றாா்.