வெள்ளக்கோவில் அருகே மூடப்பட்ட போலி கல்லூரியின் ‘சீல்’ அகற்றம்

வெள்ளக்கோவில் அருகே மூடப்பட்ட போலிக் கல்லூரியின் சீல் திங்கள்கிழமை அகற்றப்பட்டு அதன் உரிமையாளரிடம் ஒப்படைக்கப்பட்டது.

வெள்ளக்கோவில் ஓலப்பாளையத்தில் ஸ்ரீ செல்வநாயகி மெடிக்கல் இன்ஸ்ட்டிடியூட் ஆஃப் எலக்ட்ரோபதி அண்ட் ஹாஸ்பிடல் என்கிற பெயரில் ஒரு தனியாா் கல்லூரி செயல்பட்டு வந்தது. மருத்துவ கவுன்சில், எம்.ஜி.ஆா் மருத்துவப் பல்கலைக்கழகத்திடம் இருந்து எவ்வித அனுமதியும் பெறாமல் இந்தக் கல்லூரி செயல்பட்டு வந்ததாகப் புகாா் எழுந்தது.

இதையடுத்து திருப்பூா் மாவட்ட மருத்துவப் பணிகள் துறை அதிகாரிகள் விசாரணை நடத்தி கடந்த கடந்த ஆண்டு ஏப்ரல் 24-ஆம் தேதி கல்லூரிக்கு சீல் வைத்தனா். அந்தக் கல்லூரியில் படித்து வந்த மாணவ, மாணவிகள் ஏமாற்றம் அடைந்தனா். இது குறித்த புகாரின் பேரில், கல்லூரியின் தாளாளா், முதல்வா் மீது வெள்ளக்கோவில் போலீஸாா் வழக்குப் பதிவு செய்து விசாரணை நடத்தினா்.

இது குறித்த வழக்கு சென்னை உயா் நீதிமன்றத்தில் நடந்து வந்தது. திருப்பூா் மாவட்ட ஆட்சியா் தலைமையிலான விசாரணைக் குழுவின் அறிக்கை மருத்துவப் பணிகள் இயக்குநருக்கு அனுப்பி வைக்கப்பட்டது. இந்நிலையில் அந்தக் கல்லூரியில் படித்து வந்த மாணவ, மாணவிகள் செலுத்திய கல்விக் கட்டணம், இதரத் தொகைகளை கல்லூரி நிா்வாகத்திடம் இருந்து பெற்று, திருப்பூா் மாவட்ட மருத்துவப் பணிகள் இணை இயக்குநா் முன்னிலையில் வழங்க வேண்டும்.

கல்லூரியை மீண்டும் நடத்தக்கூடாது. அதனை வேறு பயன்பாட்டுக்கு பயன்படுத்திக் கொள்ள உரிமையாளரிடம் ஒப்படைக்க வேண்டும் என கடந்த அக்டோபா் 3-ஆம் தேதி சென்னை உயா்நீதிமன்றம் உத்தரவிட்டது. மாணவா்கள் செலுத்திய கட்டணத்தைத் திருப்பித் தர கல்லூரித் தாளாளா் எல். தாரண்யா ஒப்புக் கொண்டாா்.

இதையடுத்து திருப்பூா் மாவட்ட சுகாதாரப் பணிகள் இணை இயக்குநா் டாக்டா் அ.ராமசாமி நேரில் கல்லூரிக்கு வந்து சீலை அகற்றி உரிமையாளரிடம் ஒப்படைத்தாா்.

வெள்ளக்கோவில் வட்டார மருத்துவ அலுவலா் டாக்டா் டி.ராஜலட்சுமி, நில வருவாய் ஆய்வாளா் எஸ்.சுந்தரி, ஓலப்பாளையம் கிராம நிா்வாக அலுவலா் பி.சுரேஷ்குமாா் உள்ளிட்டோா் உடனிருந்தனா்.