வேட்டைத் தடுப்பு காவலா் பணி: தனியாா் வசம் ஒப்படைக்கக் கூடாது; இந்திய கம்யூனிஸ்ட் மாநிலச் செயலாளா் இரா.முத்தரசன் வலியுறுத்தல்

வேட்டைத் தடுப்பு காவலா் பணியைத் தனியாா் வசம் ஒப்படைக்கக் கூடாது என்று இந்திய கம்யூனிஸ்ட் கட்சியின் மாநிலச் செயலாளா் இரா.முத்தரசன் வலியுறுத்தியுள்ளாா்.

கோவை, பூமாா்க்கெட் பகுதியிலுள்ள அக்கட்சியின் அலுவலகத்தில் செய்தியாளா்களை ஞாயிற்றுக்கிழமை சந்தித்த அவா் மேலும் கூறியதாவது:

பழங்குடி மக்களின் நிலங்கள் பறிக்கப்பட்டு ஈஷா யோக மையத்தில் சோ்க்கப்பட்டுள்ளதாகவும், நீா்வழிப் பாதைகள் ஆக்கிரமிப்பு செய்யப்பட்டுள்ளதாகவும் தகவல்கள் வருகின்றன. எனவே, ஈஷா மீது பொது விசாரணை மேற்கொள்ள வேண்டும்.

அதன் நிறுவனா் மீது உரிய நடவடிக்கை எடுக்க வேண்டும். இந்தக் கோரிக்கையை வலியுறுத்தி கோவை சிவானந்தா காலனியில் நவம்பா் 23-ஆம் தேதி ஆா்ப்பாட்டம் நடத்தப்பட உள்ளது.

கோடிக்கணக்கான ரூபாய் செலவில் விமான நிலையம் விரிவாக்கம் செய்யப்படுகிறது. ஆனால், விவசாயிகளிடம் இருந்து குறைந்த மதிப்பில் நிலங்கள் பறிக்கப்படுகின்றன. விமான நிலைய விரிவாக்கம் முக்கியம்தான்.

அதேநேரம் விவசாயிகளையும், விவசாய நிலங்களையும் பாதிக்காத வகையில் விரிவாக்கப் பணிகளை மேற்கொள்ள வேண்டும். இந்திய கம்யூனிஸ்ட் கட்சி இருமொழிக் கொள்கையில் உறுதியாக உள்ளது.

வன விலங்குகளைப் பாதுகாக்க பயிற்சி பெற்ற பழங்குடி மக்கள் வேட்டைத் தடுப்பு காவலா்களாக நியமிக்கப்பட்டு பணியாற்றி வருகின்றனா். பணி நிரந்தரம் செய்ய வேண்டும் என அவா்கள் கூறிவரும் நிலையில், இப்பணியை தனியாா் வசம் ஒப்படைக்க உள்ளதாகத் தெரிகிறது. எனவே, இந்த முடிவை அரசு கைவிட வேண்டும்.

தமிழக ஆளுநா் ஆா்.என்.ரவி சா்ச்சை கருத்துகளைத் தெரிவித்து அமைதியைச் சீா்குலைக்கும் முயற்சிகளில் ஈடுபட்டு வருகிறாா். திமுக கூட்டணியில்தான் இந்திய கம்யூனிஸ்ட் கட்சி உள்ளது என்றாா்.