2026 சட்டப் பேரவைத் தோ்தலிலும் அதிமுகவுடன் கூட்டணி: எஸ்டிபிஐ மாநிலத் தலைவா்

2026 சட்டப் பேரவைத் தோ்தலிலும் அதிமுக கூட்டணியுடன் இணைந்து செயல்படுவோம் என்று எஸ்டிபிஐ மாநிலத் தலைவா் நெல்லை முபாரக் தெரிவித்தாா்.

எஸ்டிபிஐ கட்சியின் 10 -ஆவது மாநில பொதுக்குழுக் கூட்டம் திருப்பூரில் சனிக்கிழமை தொடங்கியது. தொடா்ந்து ஞாயிற்றுக்கிழமை நடைபெற்ற நிறைவு விழாவில் 2024-27 ஆம் ஆண்டுக்கான புதிய நிா்வாகிகள் தோ்வு செய்யப்பட்டனா்.

இதில், தமிழகத்துக்கு ‘நீட்’ தோ்வில் இருந்து விலக்குப் பெறுவதற்கு மாநில அரசு சட்டபூா்வமான நடவடிக்கைகளை மேற்கொள்ள வேண்டும். தேசிய கல்விக் கொள்கையில் இருந்து மாணவா்களின் எதிா்காலத்தைப் பாதுகாக்கும் வகையில் மாநில கல்விக் கொள்கையை நடைமுறைப்படுத்த வேண்டும்.

பின்னலாடை, இயந்திரங்கள் உற்பத்தி தொழில் உள்ளிட்ட பாதிக்கப்பட்ட அனைத்து தொழில்களுக்கும் தேவையான உதவிகளை மத்திய, மாநில அரசுகள் அளிக்க வேண்டும். நில ஒருங்கிணைப்புச் சட்டத்தை ரத்து செய்ய வேண்டும். பல்கலைக்கழகங்களில் இஸ்லாமிய சமூக பேராசிரியா்களை துணைவேந்தா்களாக நியமிக்க வேண்டும் என்பன உள்ளிட்ட பல்வேறு தீா்மானங்கள் நிறைவேற்றப்பட்டன.

பின்னா், எஸ்டிபிஐ கட்சியின் மாநிலத் தலைவா் நெல்லை முபாரக் செய்தியாளா்களிடம் கூறியதாவது: திருப்பூா் பாண்டியன் நகா் வெடிவிபத்தில் பாதிக்கப்பட்ட குடும்பங்களுக்கு இழப்பீடு வழங்க வேண்டும். 2026 சட்டப் பேரவைத் தோ்தலிலும் அதிமுக கூட்டணியுடன் தொடா்ந்து செயல்படுவோம்.

தமிழகத்தில் நிகழும் கொலை, கொள்ளை உள்ளிட்ட குற்றச் சம்பவங்களுக்கு போதைப் பொருள்களே காரணம். வெளிநாட்டில் கிடைக்கும் போதைப் பொருள்கள்கூட சாக்லெட் வடிவில் பள்ளி, கல்லூரிகள் அருகே கிடைக்கின்றன என்றாா். இந்தச் சந்திப்பின்போது எஸ்டிபிஐ கட்சியின் அகில இந்திய பொதுச் செயலாளா் இலியாஸ்தும்பே உள்ளிட்ட நிா்வாகிகள் பலா் உடனிருந்தனா்.