25 டன் ரேஷன் அரிசியுடன் மாயமான லாரி... தூக்கில் தொங்கிய நிலையில் கண்டுபிடிக்கப்பட்ட டிரைவர்!

கன்னியாகுமரி மாவட்டம் நித்திரவிளை அருகே நடைக்காவு பகுதியைச் சேர்ந்தவர் சுரேஷ். சொந்தமாக லாரி வைத்துள்ள சுரேஷ், அவரே அந்த லாரியை ஓட்டியும் வந்துள்ளார். இவர் கடந்த 16-ம் தேதி நெல்லை மாவட்டத்தில் இருந்து ரேசன் கடைகளுக்கு வினியோகிக்கப்படும் 25 டன் ரேசன் அரிசியை தனது லாரியில் ஏற்றி கன்னியாகுமரி மாவட்டம் காப்புக்காடு பகுதியில் உள்ள அரசு குடோனுக்கு கொண்டு செல்வதற்காக வந்துள்ளார். மார்த்தாண்டம் வரை வந்த லாரி குறித்து அதன் பின்னர் என்ன ஆனது என தெரியவில்லை. ரேஷன் அரிசியுடன் பாதி வழியிலேயே மாயமான லாரி குறித்து சம்பந்தப்பட்ட அதிகாரிகள் புதுக்கடை போலீசில் புகார் அளித்தனர். அதன்பேரில் போலீஸார் வழக்குப்பதிவு செய்து ரேஷன் அரிசியுடன் சென்ற லாரியையும், லாரி டிரைவர் சுரேசையும் தேடி வந்தனர்.

இந்த நிலையில் இன்று காலை நடைக்காவு அருகே வடக்கேதோப்பு பகுதியில் சிஜோ என்பவருக்கு சொந்தமான வீட்டில் ஒருவர் தூக்குப்போட்டு தற்கொலை செய்த நிலையில் உள்ளதாக கொல்லங்கோடு போலீசுக்கு தகவல் தெரிவிக்கப்பட்டது. கட்டுமான பணிகள் நடைபெற்று வந்த அந்த வீட்டின் மேல்தளத்தின் படிக்கட்டு கம்பியில் தூக்கில் தொங்கியபடி உயிரிழந்த நிலையில் ஒருவர் நிற்பதை அங்கு வேலைக்கு வந்த தொழிலாளர் பார்த்து போலீசாருக்கு தகவல் தெரிவித்து உள்ளார்.

கொல்லங்கோடு போலீசார் அங்குச் சென்று விசாரித்ததில் தூக்கில் தொங்கி உயிரிழந்த நிலையில் உள்ள நபர் போலீசாரால் தேடப்பட்டு வந்த சுரேஷ் என்பதை உறுதி செய்தனர். அவரது உடலை மீட்டு பிரேத பரிசோதனைக்காக ஆசாரிப்பள்ளம் அரசு மருத்துவக்கல்லூரி மருத்துவமனைக்கு அனுப்பி வைத்தனர். சுரேஷ் போலீஸுக்கு பயந்து கட்டுமானபணிகள் நடைபெறும் வீட்டில் பதுங்கியிருந்த நிலையில் தற்கொலை செய்துகொண்டாரா என்ற கோணத்தில் விசாரணை நடத்தப்பட்டு வருகிறது.

ரேஷன் அரிசியுடன் மாயமான லாரி குறித்த எந்த தகவலும் இதுவரை கிடைக்கவில்லை. ஆனால் லாரி ஓட்டுனர் மர்மமான முறையில் உயிரிழந்து காணப்பட்டது போலீசாருக்கு மேலும் சந்தேகத்தை ஏற்படுத்தியுள்ளது. ரேஷன் அரிசியுடன் லாரியை கடத்திவிட்டு வேறு எவரேனும் சுரேசை கொலை செய்து தூக்கில் தொங்க விட்டார்களா என்ற சந்தேகமும் போலீஸாருக்கு ஏற்பட்டுள்ளது. இந்த சம்பவம் குறித்த விசாரணை தொடர்ந்து நடந்து வருகிறது.