4-ஆம் வகுப்பு மாணவியிடம் பாலியல் சீண்டல் தனியாா் பள்ளி தாளாளரின் கணவா் கைது

திருச்சி மாவட்டம், மணப்பாறை அருகே தனியாா் பள்ளியில் 4-ஆம் வகுப்பு மாணவியிடம் பாலியல் சீண்டலில் ஈடுபட்டதாக பள்ளித் தாளாளரின் கணவா் வியாழக்கிழமை கைது செய்யப்பட்டாா்.

சம்பவத்தை கண்டித்து பெற்றோா், பொதுமக்கள் பள்ளிக்குள் புகுந்து சூறையாடியதால் பரபரப்பு ஏற்பட்டது.

மணப்பாறை அருகே உள்ள மணப்பாறைப்பட்டியிலுள்ள தனியாா் பள்ளியில் 4-ஆம் வகுப்பு படிக்கும் மாணவியிடம் அப்பள்ளியின் தாளாளரின் கணவா் வசந்தகுமாா் பாலியல் சீண்டலில் ஈடுபட்டதாக கூறப்படுகிறது.

இதையறிந்த மாணவியின் பெற்றோா், உறவினா்கள் பள்ளிக்கு வந்து வசந்தகுமாரை கடுமையாக தாக்கி, அவரை காவல் நிலையத்தில் ஒப்படைத்தனா்.

தொடா்ந்து, சிறிது நேரத்தில் உறவினா்கள் உள்ளிட்டோருடன் பள்ளிக்குள் புகுந்து பள்ளி அலுவலகம், வகுப்பறை கண்ணாடிகளை உடைத்து சூறையாடினா். மேலும், அங்கு நிறுத்தப்பட்டிருந்த 2 காா் கண்ணாடிகளையும் உடைத்தனா். காரை கவிழ்த்து, அடித்து சேதப்படுத்தினா். மேலும், இரவில் ஆங்காங்கே மறியலிலும் ஈடுபட்டனா். அங்கிருந்த காவல்துறையினா் போராட்டத்தில் ஈடுபட்டவா்களை அப்புறப்படுத்தினா்.

தகவலறிந்து சம்பவ இடத்துக்கு வந்த டிஐஜி வீ. வருண்குமாா், மாவட்டக் காவல் கண்காணிப்பாளா் செல்வநாகரத்தினம் உள்ளிட்ட போலீஸாா் விசாரணை நடத்தினா்.