4 வழிச்சாலை பணிகள் முடிந்த பின்னரே சுங்கக்கட்டணம் வசூலிக்க அனுமதிக்க வேண்டும்: பேருந்து உரிமையாளா்கள் சங்கம்!

விழுப்புரம்-நாகப்பட்டினம் நான்கு வழிச்சாலை பணிகள் முடிவடைந்த பின்னரே சுங்கச்சாவடிகளில் கட்டணம் வசூலிக்க மாவட்ட நிா்வாகம் அனுமதிக்க வேண்டும் என்று கடலூா் மாவட்ட பேருந்து உரிமையாளா்கள் நலச் சங்கத்தின் செயலா் டி.தேசிங்குராஜன் தெரிவித்தாா்.

இதுகுறித்து செய்தியாளா்களிடம் அவா் சனிக்கிழமை கூறியதாவது: விழுப்புரம்-நாகப்பட்டினம் தேசிய நெடுஞ்சாலையில் கடலூா்-சிதம்பரம் வழித்தடம் கொத்தட்டையில் சுங்கச்சாவடி அமைக்கப்பட்டுள்ளது. இங்கு, ரூ.14,090 செலுத்தி மாதாந்திர அனுமதி சீட்டு பெற்று 50 நடைகள் மட்டும் இயக்க முடியும் என்ற அறிவிப்புக்கும், பூண்டியாங்குப்பம் முதல் முட்லூா் வரை சுமாா் 17 கி.மீ தொலைவு மட்டுமே பேருந்துகள் இயக்கப்படுகிறது என்ற அறிவிப்புக்கும் ஆட்சேபனை தெரிவித்தோம்.

ஆனால், சுங்கச்சாவடி நிா்வாகம் மற்றும் திட்ட இயக்குநா் சுமூக உடன்பாட்டுக்கு வரவில்லை. இங்கு, ஒரு கி.மீட்டருக்கு ரூ.7.50 என்ற அளவில் கட்டணம் நிா்ணயிக்கப்பட்டுள்ளது. இதே தேசிய நெடுஞ்சாலையில் கெங்கராம்பாளையம் சுங்கச்சாவடியில் ரூ.6.50 கட்டணம் நிா்ணயம் செய்யப்பட்டு அறிவிப்பானை வெளியிடப்பட்டுள்ளது. கடலூா் மாவட்டத்தில் உள்ள பென்னாகரம் சுங்கச்சாவடியில் மாதக் கட்டணம் ரூ.5,400 நிா்ணயிக்கப்பட்டு வசூலிக்கப்படுகிறது.

தமிழகத்தில் உள்ள பல்வேறு சுங்கச்சாவடிகளில் மாதாந்திர கட்டணம் செலுத்துவோா் கட்டுப்பாடின்றி எத்தனை முறை வேண்டுமானாலும் பயணிக்க அனுமதிக்கப்படுகிறாா்கள். இந்த பாதிப்பு கடலூா்-சிதம்பரம் வழித்தடத்தில் இயங்கும் அரசுப் பேருந்துக்கும் ஏற்படும். ஆண்டு ஒன்றுக்கு சாலை வரியாக ரூ.1.20 லட்சம் தமிழக அரசுக்கு செலுத்தி வருகிறோம்.

சுங்கச்சாவடி நிா்வாகம் சுமூக தீா்வுக்கு உடன்படாவிட்டால், திங்கள்கிழமை (டிச.23) சுங்கச்சாவடி திறப்பின்போது, வணிகா் சங்கங்களின் பேரமைப்பு, டிப்பா் லாரி உரிமையாளா் மற்றும் பொது நல அமைப்புகள் அறிவித்தபடி, கொத்தட்டை சுங்கச்சாவடியை புறக்கணிக்க முடிவு செய்துள்ளோம்.

மேலும், விழுப்புரம்-நாகப்பட்டினம் சாலை பணிகள் முடிந்த பின்னரே மாவட்ட நிா்வாகம் கட்டணம் வசூலிக்க அனுமதிக்க வேண்டும் என்றாா்.

பேட்டியின்போது, தனியாா் பேருந்து உரிமையாளா்கள் ஆா்.சீனிவாசன், சதீஷ், பாலசுப்ரமணியன், திலீப்குமாா், சண்முகம் ஆகியோா் உடனிருந்தனா்.