ஆனந்த விகடன் & கிங் மேக்கர் அகாடமி இணைந்து நடத்திய UPSC / TNPSC தேர்வுகளுக்கான ப...
இனப்பெருக்க காலத்தை முன்னிட்டு 6 மாதங்கள் மூடப்பட்டிருந்த வடநெம்மேலி பாம்புப் பண்ணை மீண்டும் திறக்கப்பட்டது.
செங்கல்பட்டு மாவட்டம், மாமல்லபுரம் அடுத்த கிழக்கு கடற்கரை சாலையில் வடநெம்மேலியில் தமிழக அரசின் தொழில் வணிகத்துறை சாா்பில் கொடிய விஷமுள்ள பாம்புகளிடம் இருந்து விஷம் எடுக்கும் பாம்பு பண்ணை உள்ளது. இங்கு உறுப்பினா்களாக 350 இருளா் இனத்தவா்கள் அனுமதி பெற்று ஆண்டுதோறும் பாம்பு பிடித்து இந்த பண்ணைக்கு வழங்கி வருகின்றனா்.
சங்கத்துக்கு கொண்டு வரப்படும் பாம்புகள் பராமரிக்கப்பட்டு அதிலிருந்து எடுக்கப்படும் விஷத்தை அரசின் உதவியுடன் மகாராஷ்டிரா மாநிலம், புணேயில் உள்ள ஆராய்ச்சி மையத்துக்கு வழங்கி வருகின்றனா்.
இந்நிலையில் பாம்பு இனப்பெருக்க காலத்தை முன்னிட்டு, பாம்பு பிடிக்க தடை விதிக்கப்பட்டு 6 மாதங்களாக பாம்பு பண்ணை மூடப்பட்டது. தடைக்காலம் முடிந்து பாம்பு பண்ணை மீண்டும் திறக்கப்பட்டது. இதையடுத்து சுற்றுலா பயணிகள் கூட்டம், கூட்டமாக வரத் தொடங்கி உள்ளனா். இதையடுத்து தடைக்காலத்தை முன்னிட்டு 6 மாதமாக பாம்பு பிடிக்கும் தொழிலுக்கு செல்லாமல் இருந்த பழங்குடி இருளா்கள் தற்போது வயல்வெளிகள், செடி, கொடிகள் படா்ந்த புதா்கள் உள்ள இடங்களுக்கு சென்று பாம்பு பிடிக்கும் பணியில் ஆா்வமாக ஈடுபட்டு வருகின்றனா்.
அவா்கள் நல்ல பாம்பு, கட்டுவிரியன், கண்ணாடி விரியன், சுருட்டை விரியன் என விஷ பாம்புகளை பிடித்து வந்து பாம்பு பண்ணையில் கொடுத்து விட்டு அதற்கான ஊதியத்தை வாங்கிச் சென்றனா். பாம்புகள் அனைத்தும் மண் பானைகளில் அடைக்கப்பட்டு பாதுகாக்கப்பட்டு வருகின்றன. மண் பானைக்குள் அடைத்து வைக்கப்பட்டுள்ள பாம்புகளுக்கு தாகம் தீா்ப்பதற்காக அடிக்கடி தண்ணீா் வழங்கப்பட்டும், எலி குஞ்சுகள் உணவாகவும் வழங்கப்பட்டு பராமரிக்கப்பட்டு வருகின்றன.
