நடிகரும் கார் பந்தைய வீரருமான அஜித் குமாரின் Ajith Kumar Racing அணி, Creventic 24H European Endurance Championship Series 2025-ல் சீசன் முடிவில் ஒட்டுமொத்தமாக 3வது இடம் பிடித்துள்ளனர்.
இந்த சீசனில் Team BKR / Red Ant ஆதரவுடன் களமிறங்கிய அஜித் குமார் ரேஸிங் குழு, எந்த குறிப்பிட்ட போட்டியிலும் முதலிடம் பெறாவிட்டாலும் சீசன் முழுவதும் சிறப்பாக செயல்பட்டு Overall-P3 வென்றிருக்கின்றனர்.
992-AM Class கேட்டகிரியில் இத்தாலி, பெல்ஜியம், பிரான்ஸ், ஸ்பெயின் ஆகிய நாடுகளில் நடைபெற்ற 5 போட்டிகளில் கலந்துகொண்டு ஒரு போட்டியில் மூன்றாம் இடம் வென்றதுடன், மற்ற 4 போட்டிகளில் முதல் 5 இடத்துக்குள் வந்திருக்கிறது அஜித் குமார் ரேஸிங்.
ஒரு போட்டியில் ஸ்பிரிட் ஆஃப் தி ரேஸ் அங்கீகாரத்தைப் பெற்றதுடன், முழு ஐரோப்பிய 24H சாம்பியன்ஷிப் சீசனையும் முடிவு செய்த முதல் இந்திய அணி என்ற சாதனையையும் பெற்றுள்ளனர்.
அஜித் குமார் ரேஸிங் குழுவுக்கு தமிழக விளையாட்டுத்துறை அமைச்சர் உதயநிதி ஸ்டாலின் நன்றியும் வாழ்த்தும் தெரிவித்துள்ளார். இதுகுறித்த அவரது ட்விட்டர் பதிவில், "நடிகரும் - நண்பருமான அஜித்குமார் சாரின் 'Ajith Kumar Racing Team', Creventic 24H European Endurance Championship Series 2025-இல் ஒட்டுமொத்தமாக மூன்றாம் இடம் (Overall-P3) பிடித்தது அறிந்து மகிழ்ந்தோம்.
இந்த வெற்றியின் மூலம் சர்வதேச அளவில் கார் பந்தயத்தில் இந்தியாவையும் தமிழ்நாட்டையும் பெருமையடையச் செய்துள்ள அஜித் சாருக்கும்- அவருடைய குழுவினருக்கும் நம்முடைய வாழ்த்துகளைத் தெரிவித்துக் கொள்கிறோம்.
இந்த சர்வதேச போட்டியின் போது, நம்முடைய தமிழ்நாடு விளையாட்டு மேம்பாட்டு ஆணையத்தின் (SDAT) Logo-வை, கார் - ரேஸிங் உபகரணங்கள் மற்றும் ஜெர்சியில் பயன்படுத்தியதற்காக, தமிழ்நாடு அரசு சார்பில் நன்றி தெரிவித்து மகிழ்கிறோம். 'Ajith Kumar Racing Team' track-இல் இன்னும் பல வெற்றிகளைக் குவிக்கட்டும்!" எனக் கூறியுள்ளார்.
