Book Fair: பார்வை சவால் மாற்றுத்திறனாளிகளுக்கென தனி கடை, நூல் கொடை; கவனிக்க வைக்கும் பாரதி டிரஸ்ட்

48வது புத்தகக் கண்காட்சி சென்னை நந்தனம் YMCAவில் நடைபெற்று வருகிறது. இதில் அரங்கம் 102 பலரது கவனத்தையும் ஈர்த்துள்ளது. ஏனென்றால், பார்வை சவால் மாற்றுத்திறனாளிகள் பயன்பெறும் வகையில் ப்ரெய்லி புத்தகங்கள் அங்குக் காட்சிப்படுத்தப்பட்டுள்ளன. மாற்றுத்திறனாளிகளால், மாற்றுத்திறனாளிகளுக்காகத் தொடங்கப்பட்டுள்ளது இந்த அரங்கம். தமிழில் வெளிவந்த கலை, இலக்கிய நூல்கள் ப்ரெய்லி புத்தகங்களாகக் கிடைக்கின்றன. மேலும், இந்தியாவில் முதல் ப்ரெய்லி புத்தக அரங்கும் இதுதான் என்பது தனிச்சிறப்பு.

மாற்றுத்திறனாளிகளின் படைப்புகள்:

பார்வை சவால் மாற்றுத்திறனாளிகள் எழுதிய கதைகள், கவிதைகள், நாவல்கள், போட்டி தேர்வு நூல்கள் போன்றவை இந்த அரங்கில் விற்பனைக்கு வைக்கப்பட்டுள்ளன. பள்ளிக் கல்விக்குச் சில ப்ரெய்லி நூல்கள் உள்ளன. கல்லூரிப் படிப்பிற்குப் பெரும்பாலும் ப்ரெய்லி நூல்கள் கிடைப்பதில்லை.

“மொழியினைப் பிறர் வாசித்துக் கேட்கக் கிடைக்கும் அனுபவிப்பதை விட, தாங்களே வாசித்து அனுபவம் பெறுவது அலாதியானது. அதற்கு ப்ரெய்லி நூல்கள் வழி வகை செய்கின்றன. ஆண்ட்ராய்டு மூலம் பிடிஎஃப் புத்தகங்கள் படிக்க உதவும் மென்பொருள்களும் உதவிக்கரமாக உள்ளன. ப்ரெய்லியிலும் படிக்கிறோம், வாய்ஸ் மூலமாகவும் படிக்கிறோம்” என்கிறார் மாநிலக் கல்லூரியின் தமிழ்த்துறையில் இணைப் பேராசிரியராகவுள்ள மு. ரமேஷ்.

இன்க்ளூஸிவ் ஸ்பேஸ்:

பார்வை சவால் மாற்றுத்திறனாளிகளின் படைப்புலகம் குறித்து மு. ரமேஷ் பேசும்போது, “மையநீரோட்டத்திலிருந்து விலகக் கூடாது. அனைத்து புலங்களும் கொண்டவர் ஒரு கருத்தைக் கூறுவதற்கும், மாற்றுத்திறனாளி ஒருவர் ஒரு கருத்தைக் கூறுவதற்கும் வேறுபாடு இருக்கிறது. மொழி காட்சி மொழியாக இருக்கிறது.

ஆனால் எங்கள் மொழியே வித்தியாசமானது. பார்வை மாற்றுத்திறனாளிகளுக்குப் பேச்சு மொழியே பிரதான மொழி. அந்த மொழி மாற்றத்தை நோக்கி நாம் செல்ல வேண்டும்” என்று கூறினார்.

சாலச்சிறந்தது நூல் கொடை:

பாரதி அறக்கட்டளை சார்பாக இந்த முன்னெடுப்பு நிகழ்ந்துள்ளது.

பாரதி அறக்கட்டளை மூலம் மாற்றுத்திறனாளி மாணவர்களுக்குப் போட்டித் தேர்வுகள் பயிற்சிகள், உறைவிடம் போன்றவை அளிக்கப்படுகின்றன. உங்கள் வீட்டில் இருக்கும் நூல்களை மாற்றுத்திறனாளி வாசகர்களுக்குப் படிக்க நூல் தானம் செய்யவும் ஏற்பாடு செய்யப்பட்டுள்ளது.