CSK vs RCB : கோலிக்கு ஸ்பின் ஆடத் தெரியாதா? - விமர்சனத்துக்கு தினேஷ் கார்த்திக் பதில்

'சென்னை Vs பெங்களூரு'

18 வது ஐ.பி.எல் சீசனில் சென்னை மற்றும் பெங்களூரு அணிகள் மோதும் போட்டி சென்னை சேப்பாக்கம் மைதானத்தில் நாளை நடக்கவிருக்கிறது. போட்டிக்கு முன்பாக இன்று இரு அணி வீரர்களும் சேப்பாக்கம் மைதானத்தில் தீவிர பயிற்சியில் ஈடுபட்டு வருகின்றனர். போட்டிக்கு முன்பான பத்திரிகையாளர் சந்திப்புக்கு பெங்களூரு அணியின் ஆலோசகர் தினேஷ் கார்த்திக் வந்திருந்தார். பத்திரிகையாளர்களின் கேள்விக்கு அவர் அளித்த பதில்கள் இங்கே.

"ஸ்பின்னர்களை எதிர்கொள்வதில் பெங்களூரு அணிக்கு சிரமம் இருக்கத்தானே செய்கிறது?"

"நாங்கள் ஒரு புதிய அணியோடு சீசனைத் தொடங்கியிருக்கிறோம். ஒரு போட்டியில்தான் ஆடியிருக்கிறோம். ஸ்பின்னர்களை சிறப்பாக ஆடுவதுதான் இந்த அணியின் பலம் என நினைக்கிறேன். போட்டிகள் செல்ல செல்ல நீங்களே அதைப் பார்ப்பீர்கள். சென்னை அணி மூன்று சிறந்த ஸ்பின்னர்களை வைத்திருக்கிறது. அதில் சந்தேகமில்லை.

ஆனால், நாங்களும் அவர்களை எதிர்கொள்ளக்கூடிய திறனுடைய பேட்டர்களை வைத்திருக்கிறோம். ஸ்பின்னர்கள் சிறப்பாக ஆடக்கூடியவர்கள் என்பதால்தான் அவர்களை ஏலத்திலும் எடுத்திருக்கிறோம். "

"விராட் கோலி ஸ்பின்னர்களுக்கு எதிராக கொஞ்சம் திணறத்தானே செய்கிறார்?"

"விராட் கோலி சாம்பியன்ஸ் டிராபியில் மிகச்சிறப்பாகத்தான் ஆடிவிட்டு வந்திருக்கிறார். டி20 உலகக்கோப்பை இறுதிப்போட்டியிலும் பார்த்திருப்பீர்கள். அவர் ஒயிட் பால் கிரிக்கெட்டில் சிறப்பாகத்தான் ஆடிவருகிறார். சாம்பியன்ஸ் டிராபியில் அதிக ரன்கள் அடித்தவர்களின் பட்டியலில் கோலிதான் இரண்டாம் இடத்தில் இருந்தார்.

துபாய் மாதிரியான பிட்ச்சில் ஸ்பின்னர்களை நன்றாக எதிர்கொள்ளாமல் அவ்வளவு ரன்களை எடுக்க முடியாது. இப்போது கூட விராட் கோலியிடம் பேசிவிட்டுதான் வருகிறேன். புதிதாக ஒரு ஷாட்டில் அதிகமாக ஒர்க் செய்ய வேண்டும் எனப் பேசிக்கொண்டிருந்தார். கோலி இன்னமும் அதே பசியோடு இருக்கிறார். அவர் எங்கள் அணியின் ஸ்பெசலான வீரர். முன்னெப்போதையும்விட அதிக தன்னம்பிக்கையோடு கோலி இருக்கிறார்."

"கோலியின் முதுகு வலி எப்படி இருக்கிறது. புவனேஷ்வர் குமார் முழு உடற்தகுதியுடன் இருக்கிறாரா?"

"கடந்த போட்டியில் காயம் காரணமாகத்தான் புவனேஷ்வர் ஆடவில்லை. ஆனால், நேற்று வலைப்பயிற்சியில் சிறப்பாகத்தான் வீசியிருக்கிறார். அதனால் பொறுத்திருந்து பார்ப்போம். விராட் கோலிக்கு நாள்பட்ட முதுகுவலியே. அதோடு எப்படி ஆட வேண்டும் என்பது அவருக்குத் தெரியும். மற்றபடி அணியில் எல்லாருமே உடற்தகுதியுடன் தான் இருக்கிறார்கள். மூன்றாவது ஸ்பின்னர் தேவைப்பட்டால் மோஹித் ரதியைப் பயன்படுத்துவோம்."

"சின்னசாமி மைதானத்தில் எந்த அணியாலும் சிறப்பாக ஆட முடியும் என்பதால் உங்களுக்கு வெளி மைதானங்களில் ஆடும் போட்டிகள் ரொம்பவே முக்கியம். ஆனால், பெங்களூரு அணி 2008 க்கு பிறகு சேப்பாக்கத்தில் வெல்லவே இல்லையே?"

"இதுதான் எங்களுக்கு இந்தப் போட்டியின் மீதான சுவாரஸ்யத்தையும் எதிர்பார்ப்பையும் கூட்டியிருக்கிறது. எங்கள் அணியில் புதிதாக நிறைய வீரர்கள் இருக்கிறார்கள். அவர்களிடம் வெற்றிக்கான தீர்க்கமும் பசியும் இருக்கிறது.

எங்களால் என்ன செய்ய முடியும் என்பதை கடந்தப் போட்டியில் காட்டினோம். மைதானங்களை பற்றி யோசிக்காமல் எங்களது ஆட்டத்தின் தரத்தை உயர்த்திக் கொண்டே செல்ல விரும்புகிறோம்.

இரண்டு நல்ல அணிகள் மோதப்போகும் இந்தப் போட்டி கட்டாயம் சுவாரஸ்யமாக இருக்கும்."