Kohli : '12 ஆண்டுகளுக்கு முன் நீ கொடுத்த அந்த கயிறு..!' - கோலியின் ஓய்வு குறித்து நெகிழும் சச்சின்

'கோலி ஓய்வு!'

இந்திய அணியின் சீனியர் வீரரான விராட் கோலி டெஸ்ட் போட்டிகளிலிருந்து ஓய்வை அறிவித்திருக்கிறார். விராட் கோலியின் ஓய்வு முடிவுக்கு சச்சின் ஒரு நெகிழ்ச்சியான வாழ்த்துச் செய்தியை பதிவிட்டிருக்கிறார்.

'சச்சின் நெகிழ்ச்சி!'

சச்சின் வெளியிட்டிருக்கும் பதிவில் கூறியிருப்பதாவது, 'நீங்கள் இப்போது டெஸ்ட்டிலிருந்து ஓய்வு பெற்றிருக்கிறீர்கள். இந்த சமயத்தில் 12 ஆண்டுகளுக்கு முன் நீங்கள் செய்த ஒரு பக்குவமான செயலை நினைவுகூற விரும்புகிறேன்.

என்னுடைய கடைசி டெஸ்ட்டின் போது மறைந்த உங்களது தந்தை கொடுத்த ஒரு கயிறை எனக்கு பரிசாக கொடுத்தீர்கள். உங்களின் அந்த செயல் என்னை இதயப்பூர்வமாக நெகிழ வைத்தது. உங்களுக்கு பதிலுக்கு பரிசாக கொடுக்க எந்த கயிறும் இல்லை. ஆனால், உங்கள் மீது என்றைக்கும் நான் ஒருவித வியப்பையும் வாழ்த்தையும் கொண்டே இருந்திருக்கிறேன்.

எண்ணிலடங்கா இளம் வீரர்களை விளையாட்டை நோக்கி நகர்த்தியிருப்பதுதான் உங்களின் சகாப்தத்தின் உண்மையான பெருமை. ஒரு அற்புதமான டெஸ்ட் கரியரை நீங்கள் கொண்டிருக்கிறீர்கள். ரன்களை தாண்டியும் நிறைய விஷயங்களை இந்திய கிரிக்கெட்டுக்காக கொடுத்திருக்கிறீர்கள். உத்வேகமிக்க புதிய தலைமுறை ரசிகர்களையும் வீரர்களையும் இந்த விளையாட்டுக்காக கொடுத்திருக்கிறீர்கள். வாழ்த்துகள்!' என்றார்.