Parasakthi: `எதிர்நீச்சல் டு பராசக்தி' - சிவகார்த்திகேயனும் ரெட்ரோ தலைப்புகளும் - ஒரு பார்வை

சிவகார்த்திகேயனின் 25-வது திரைப்படத்தை சுதா கொங்கரா இயக்குகிறார்.

இப்படத்திற்கு `பராசக்தி' என தலைப்பு வைத்து அறிவிப்பு வெளியிட்டிருக்கிறது இப்படத்தின் தயாரிப்பு நிறுவமான `டான் பிக்சர்ஸ்' . படத்தில் இதுவரை நாம் பார்த்திடாத களத்தில் வில்லனாக ரவி மோகன் களமிறங்கியிருக்கிறார். அதர்வாவும் டோலிவுட் நடிகை ஶ்ரீலீலாவும் இப்படத்தின் முக்கிய கதாபாத்திரத்தில் நடித்து வருகிறார்கள்.

சிவகார்த்திகேயன் ரெட்டோ டைட்டிலில் நடிப்பது இது 6-வது முறை. தன்னுடைய கரியரில் பழைய படங்களின் தலைப்பை மீண்டும் தனது படங்களுக்கு வைத்திருக்கிறார் சி.கா! `பராசக்தி' தலைப்பைப் போல அவர் தன்னுடைய படங்களுக்கு வைத்த ரெட்ரோ டைட்டில்களின் விவரங்கள் குறித்து பார்ப்போமா.....

எதிர்நீச்சல்:

கே. பாலசந்தர் இயக்கத்தில், நாகேஷ் நடிப்பில் கடந்த 1968-ம் ஆண்டு வெளியான திரைப்படம் `எதிர்நீச்சல்'. சோம்பு மித்ரா என்கிற மேடை நாடக இயக்குநர் ஒருவரின் நாடகத்தினால் ஈர்க்கப்பட்டு `எதிர்நீச்சல்' என்ற பெயரில் ஒரு நாடகக் கதையை எழுதினார் கே.பி. அதனையே பிறகு திரைப்படமாக இயக்கினார். இதே தலைப்பில் சிவகார்த்திகேயன் நடிப்பில் இயக்குநர் துரை செந்தில்குமார் இயக்கத்தில் உருவான `எதிர்நீச்சல்' திரைப்படம் 2013-ம் ஆண்டு வெளியானது.

காக்கி சட்டை:

இயக்குநர் ராஜசேகர் இயக்கத்தில் கமல் நடித்திருந்த `காக்கி சட்டை' திரைப்படம் கடந்த 1985-ம் ஆண்டு வெளியானது. `எதிர்நீச்சல்' படத்தின் வெற்றிக்குப் பிறகு மீண்டும் அதே கூட்டணி இணைந்தது. தனுஷ் தயாரிக்க, துரை செந்தில்குமார் இயக்க, சிவகார்த்திகேயன் நடித்திருந்தார். இப்படத்திற்கு முதலில் `டானா' என தலைப்பு வைக்க படக்குழு திட்டமிட்டது. அதன் பிறகு கமல் நடித்த `காக்கி சட்டை' படத்தின் தயாரிப்பாளர்களிடம் உரிமம் வாங்கி இப்படத்திற்கு `காக்கி சட்டை' என தலைப்பு வைத்தார்கள்.

வேலைக்காரன்:

இயக்குநர் எஸ்.பி.முத்துராமன் இயக்கத்தில் ரஜினி நடிப்பில் வெளியான திரைப்படம்தான் `வேலைக்காரன்'. இதே தலைப்பில் இயக்குநர் மோகன் ராஜா இயக்கத்தில் சிவகார்த்திகேயன் நடிப்பில் உருவான `வேலைக்காரன்' திரைப்படம் 2017-ம் ஆண்டு வெளியாகியிருந்தது.

மாவீரன்:

இயக்குநர் ராஜசேகர் இயக்கத்தில் ரஜினி நடித்திருந்த `மாவீரன்' திரைப்படம் 1986-ம் ஆண்டு வெளியாகியிருந்தது. இதே தலைப்பை மடோன் அஸ்வின் இயக்கத்தில் சிவகார்த்திகேயன் நடித்திருந்த திரைப்படத்திற்கு வைத்திருந்தனர். இதுவரை ரஜினியின் திரைப்பட தலைப்புகள் இரண்டு முறை சிவகார்த்திகேயனின் படத்திற்கு வைக்கப்பட்டிருக்கிறது. அதில் ஒன்று, வேலைக்காரன் மற்றொன்று மாவீரன்.

அமரன்:

இயக்குநர் ராஜேஷ்வர் இயக்கத்தில் கார்த்தி நடிப்பில் 1992-ம் ஆண்டு வெளியான திரைப்படம் `மாவீரன்'. இதே தலைப்பை சிவாகார்த்திகேயன் ராணுவ அதிகாரி மேஜர் முகுந்த் வரதராஜனாக நடித்த படத்திற்கு வைத்திருந்தனர். இந்தப் படத்திற்கு இந்த தலைப்பே மிகப் பொருத்தமானதாக இருந்ததாக இயக்குநர் ராஜ்குமார் பெரியசாமி இப்படத்தின் ரிலீஸ் சமயத்தில் கூறியிருந்தார்.

பராசக்தி:

கிருஷ்ணன் பஞ்சு இயக்கத்தில் , கலைஞர் வசனத்தில், சிவாஜி கணேசன் நடிகராக அறிமுகமான திரைப்படம்தான் `பராசக்தி'. தற்போது இதே தலைப்பு சிவகார்த்திகேயனின் 25-வது திரைப்படத்திற்கு வைக்கப்பட்டிருக்கிறது.

சினிமா விகடனின் பிரத்யேக Whatsapp க்ரூப்

https://chat.whatsapp.com/KzgH8aPb2MI9PVttY53JpX

சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...

உங்கள் வாட்ஸ் அப் மூலமே இணைந்திருங்கள் சினிமா விகடனுடன்...

https://chat.whatsapp.com/KzgH8aPb2MI9PVttY53JpX