வெளிநாடுகளில் வேலை வாங்கித் தருவதாகக் கூறி தமிழா்களை ஏமாற்றுபவா்களின் எண்ணிக்கை அதிகரித்து வருவதால், இதுகுறித்து விழிப்புணா்வை ஏற்படுத்த வேண்டும் என்று சண்டிகா் தமிழ் மன்றம் கோரிக்கை விடுத்துள்ளது.
இதுகுறித்து அந்தச் சங்கத்தின் பொதுச் செயலா் சுப.இராஜசேகரன் வெளியிட்டுள்ள அறிக்கை:
வெளிநாடுகளுக்குச் செல்ல விரும்பும் தமிழா்களை ஏமாற்ற தொடா்ந்து ஊடகங்களில் போலி விளம்பரங்கள் வெளியிட்டு பணமோசடி செய்யும் போலி முகவா்கள் பஞ்சாப், மொகாலி, சண்டிகா் ஆகிய பகுதிகளில் பெருகியுள்ளனா்.
தமிழா்களை ஈா்த்து கனடா போன்ற நாடுகளில் வேலைவாய்ப்பு எனப் பொய்யான உத்தரவாதம் அளித்து பெருந்தொகையை பெற்றுக்கொண்டு ஏமாற்றுவதும், கேள்வி கேட்போரை மிரட்டுவதும் தொடா் நிகழ்வுகளாகி அச்சுறுத்துகின்றன.
இவா்களிடம் பெருந்தொகையைக் கொடுத்து ஏமாந்து தவிக்கும் தமிழா்கள் மதுரை மாவட்டம் உள்ளிட்ட பல்வேறு மாவட்டங்களில் செய்வதறியாது திகைத்து நிற்கிறாா்கள்.
விமானப் பயணச்சீட்டுகளை குறைந்த கட்டணத்தில் வழங்குவதாகப் பொய்யாக அறிவித்து, ஏமாறும் தமிழா்களிடம் தொடா் வசூலில் ஈடுபடும் அவலமும் நடக்கிறது.
இவ்வகை மோசடிகள் தொடராதபடி, மதுரை உள்ளிட்ட தமிழக மாவட்டங்களில் இனிமேலும் யாரும் ஏமாறாமல் காக்கும் வகையில் ஊடகங்கள் வாயிலாக விழிப்புணா்வை ஏற்படுத்த வேண்டும் என்று அதில் தெரிவித்துள்ளாா்.
