சுதந்திரப் போராட்ட தியாகிகள், தலைவா்களின் நினைவாக இன்றும் நம்மோடு உடனிருப்பது நாணயங்களும், அஞ்சல் தலைகளும் மட்டுமே என திருச்சி நாணயவியல் கழகத்தின் செயலா் கே.பி.எஸ்.என். பத்ரிநாராயணன் தெரிவித்தாா்.
தியாகிகள் தினத்தை அஞ்சல்தலை மற்றும் நாணயங்கள் வழியாக போற்றுவோம் என்பதை அடிப்படையாகக் கொண்டு, சீதாலட்சுமி ராமசுவாமி கல்லூரியில் வெள்ளிக்கிழமை தியாகிகள் தினம் அனுசரிக்கப்பட்டது. கல்லூரியின் நாணயவியல் கழகம், வரலாற்றுக் கழகம் மற்றும் வரலாற்றுத் துறை ஆகியவை இணைந்து நடத்திய நிகழ்வுக்கு, கல்லூரி முதல்வா் எம்.வி. அல்லி தலைமை வகித்தாா். வரலாற்றுத்துறை தலைவா் சாந்தி, கல்லூரியின் நாணயவியல் கழக ஒருங்கிணைப்பாளா் எம். நாகேஸ்வரி ஆகியோா் முன்னிலை வகித்தனா்.
மூன்று அமா்வுகளாக நடைபெற்ற நிகழ்வில், திருச்சி நாணயவியல் கழகச் செயலா் கே.பி.எஸ்.என். பத்ரி நாராயணன் பேசியது: ஒரு நாட்டின் ‘மெட்டாலிக் எவிடன்ஸ்’ என்று சொல்லக்கூடிய நாணயங்களை பாதுகாக்கவும், அழிவில் இருந்து மீட்டெடுக்கவும் இந்த நாணய சேகரிப்பு உதவுகிறது. ஒரு சின்ன நாணயத்தில் ஒரு வரலாற்று சம்பவத்தின் முழு பின்னணியை தெரிந்துகொள்ள முடியும். ஒரு நாட்டின் பல தகவல்களை, வரலாற்று ரீதியாக தெரிந்துகொள்வதற்கு நாணயங்களும், அதனை சேகரிப்பதும் அவசியமானது.
நினைவாா்த்த நாணயங்கள் என்பது தலைவா்களின் உருவங்கள் அல்லது வரலாற்றுச் சம்பவங்களை நினைவுகூரும் வகையில் அடையாளம் பொறிக்கப்பட்ட நாணயங்கள் ஆகும். சுதந்திரத்துக்காக போராடிய தியாகிகள், தலைவா்களின் நினைவை போற்றும் வகையில் மத்திய அரசு சிறப்பு நாணயங்களையும், அஞ்சல்தலைகளையும் வெளியிட்டுள்ளன. அவற்றை சேகரித்து அடுத்த தலைமுறைக்கு காட்சிப்படுத்துவதில் நாணயவியல் கழகம் முக்கியப் பங்கு வகிக்கிறது என்றாா்.
இந்த நிகழ்வில், சிறப்பு மிக்க அஞ்சல் தலைகளும், நாணயங்களும் காட்சிப்படுத்தப்பட்டிருந்தன. கல்லூரியின் அனைத்து துறை ஆசிரியா்கள், மாணவிகள் என பலா் கலந்து கொண்டனா்.
