வடகோவை ரயில் நிலையத்தில் பராமரிப்புப் பணி: மேட்டுப்பாளையம் - கோவை ரயில் ரத்து!

வடகோவை ரயில் நிலையத்தில் பராமரிப்புப் பணிகள் நடைபெறுவதால் மேட்டுப்பாளையம் - போத்தனூா், மேட்டுப்பாளையம் - கோவை ரயில்கள் ரத்து செய்யப்படுவதாகத் தெரிவிக்கப்பட்டுள்ளது.

இது தொடா்பாக சேலம் ரயில்வே கோட்ட நிா்வாகம் வெளியிட்டுள்ள செய்திக் குறிப்பு: வடகோவை ரயில் நிலையத்தில் பராமரிப்புப் பணிகள் நடைபெறுவதால் மேட்டுப்பாளையத்தில் இருந்து பிப்ரவரி 2, 4, 6 ஆகிய தேதிகளில் காலை 8.20 மணிக்குப் புறப்படும் மேட்டுப்பாளையம் - போத்தனூா் ரயில் (எண்:66611), பிப்ரவரி 2,4, 6 ஆகிய தேதிகளில் காலை 9.40 மணிக்குப் புறப்படும் போத்தனூா் - மேட்டுப்பாளையம் (எண்:66612) ரயில் முழுவதுமாக ரத்து செய்யப்படுகிறது.

இதேபோல, மேட்டுப்பாளையத்தில் இருந்து பிப்ரவரி 4, 6 ஆகிய தேதிகளில் காலை 10.55 மணிக்குப் புறப்படும் மேட்டுப்பாளையம் - கோவை ரயில் (எண்: 66613), கோவையில் இருந்து காலை 11.50 மணிக்குப் புறப்படும் கோவை - மேட்டுப்பாளையம் ரயில் (எண்: 66614) முழுவதுமாக ரத்து செய்யப்படுகிறது.

பிப்ரவரி 2,4,6 ஆகிய தேதிகளில் ஆலப்புழை - தன்பாத் ரயில் (எண்: 13352) மற்றும் எா்ணாகுளம் - பெங்களூரு ரயில் (எண்: 12678) போத்தனூா் - இருகூா் வழித்தடத்தில் இயக்கப்பட உள்ளதால் இந்த ரயில்கள் கோவை நிலையம் செல்வது தவிா்க்கப்படும். போத்தனூரில் இந்த ரயில்கள் நின்று செல்லும் எனத் தெரிவிக்கப்பட்டுள்ளது.