அமெரிக்க தலைநகா் வாஷிங்டன் அருகே ரொனால்ட் ரீகன் விமான நிலையத்தில் ஹெலிகாப்டருடன் மோதி ஆற்றில் நொறுங்கி விழுந்த பயணிகள் விமானத்தின் கருப்புப் பெட்டிகள் கண்டெடுக்கபட்டன. மேலும், சம்பவ இடத்திலிருந்து இதுவரை 40-க்கும் மேற்பட்ட உடல்கள் மீட்கப்பட்டுள்ளன.
இது குறித்து அதிகாரிகள் கூறியதாவது:
பொடோமேக் ஆற்றில் விழுந்து நொறுங்கிய அமெரிக்க ஏா்லைன்ஸ் விமானத்தின் கருப்புப் பெட்டிகள் கண்டெடுக்கப்பட்டுள்ளன. மேலும், விபத்துக்கான காரணத்தைத் துல்லியமாகத் தெரிந்துகொள்வதற்காக, ஆற்றுக்குள் மூழ்கியுள்ள மேலும் பல முக்கிய பாகங்களை மீட்கும் பணிகள் தீவிரமாக நடைபெற்றுவருகின்றன என்றாா்.
இருந்தாலும், இந்த விபத்து காரணமாக ஆற்றுக்குள் மூழ்கியுள்ள ஹெலிகாப்டரிலிருந்து கருப்புப் பெட்டிகள் இதுவரை மீட்கப்படவில்லை.
இது குறித்து பாதுகாப்புத் துறை அமைச்சா் பீட் ஹெக்சேத் கூறுகையில், ‘விபத்துக்குள்ளான பிளாக்ஹாக் ஹெலிகாப்டரின் கருப்புப் பெட்டிகளைத் தேடிவருகிறோம். அது கிடைத்தால்தான் அந்த ஹெலிகாப்டரை யாா் இயக்கியது, அது அளவுக்கு அதிகமான உயரத்தில் பறக்கச் செய்யப்பட்டதா போன்ற விவரங்களைத் தெரிந்துகொள்ள முடியும்’ என்றாா்.
கன்சாஸ் மாகாணத்தின் வின்சிட்டா நகரிலிருந்து 60 பயணிகள், 4 பணியாளா்களுடன் அமெரிக்கன் ஏா்லைன்ஸ் நிறுவனத்துக்குச் சொந்தமான விமானம் ரீகன் விமான நிலையத்தில் வியாழக்கிழமை தரையிறங்க இருந்தது.
சுமாா் 2,400 அடி உயரத்தில் பயணிகள் விமானம் பறந்துகொண்டிருந்தபோது, அங்கு பயிற்சியில் ஈடுபட்டிருந்த ராணுவ ஹெலிகாப்டா் அதன் மீது மோதியது. இதையடுத்து, விமானம் மூன்று பாகங்களாக நொறுங்கி, பொடோமேக் ஆற்றில் விழுந்தது. விமானத்துடன் மோதிய ஹெலிகாப்டரும் ஆற்றுக்குள் நொறுங்கி விழுந்தது. அந்த ஹெலிகாப்டரில் 3 போ் இருந்தனா்.
அமெரிக்க பொது விமானப் போக்குவரத்து வரலாற்றில் 24 ஆண்டுகளுக்குப் பிறகு நடைபெற்றுள்ள இந்த கோர விபத்தில், விமானம் மற்றும் ஹெலிகாப்டரில் இருந்த 67 பேரும் உயிரிழந்தனா்.
அவா்களில் 40 பேருக்கும் மேற்பட்டோரது உடல்களை மீட்புக் குழுவினா் மீட்டுள்ளதாக தகவல்கள் தெரிவிக்கின்றன. எஞ்சியவா்களின் உடல்களையும், விமானம் மற்றும் ஹெலிகாப்டா் பாகங்களையும் மீட்கும் பணிகள் தொடா்ந்து தீவிரமாக நடைபெற்றுவருகின்றன.
...பெட்டிச் செய்தி...
2 போ் இந்திய வம்சாவளியினா்
பொடோமேக் ஆற்றில் அமெரிக்க ஏா்லைன்ஸ் விமானம் விழுந்து நொறுங்கி ஏற்பட்ட விபத்தில் உயிரிழந்தவா்களில் இருவா் இந்திய வம்சாவளியைச் சோ்ந்தவா்கள் என்ற தகவல் தற்போது வெளியாகியுள்ளது.
அவா்களில் விகேஷ் படேல் என்பவா் ஜிஇ நிறுவனத்தில் விமானவியல் பொறியாளராகப் பணியாற்றிவந்தாா். ஒஹியோ மாகாணத்தின் சின்சினாட்டி நகரில் அவா் வசித்துவந்தாா்.
விபத்தில் உயிரிழந்த அஸ்ரா ஹுசைன் ராஸா என்பவரும் இந்தியாவைப் பூா்விகமாகக் கொண்டவா். வாஷிங்டன் நகரைச் சோ்ந்த அவா் தொழில் ஆலோசகராகப் பணியாற்றிவந்தாா்.
