Priyanka Gandhi: `பாலஸ்தீனம்.. வங்காளதேசம்' - பேசுபொருளாகும் பிரியங்காவின் `ஹேண்ட்பேக்' - காரணமென்ன?

தற்போது நடந்து வரும் குளிர்காலக் கூட்டத்தொடரில் பரபரப்பாக பேசப்பட்டு வரும் பல ஹாட் டாப்பிக்குகளில் 'பிரியங்கா காந்தியின் ஹேண்ட் பேக்'குகளும் ஒன்று.

பாலஸ்தீனம்...

நேற்று முன்தினம், குளிர் கூட்டத்தொடரில் கலந்துகொள்ள நாடாளுமன்றத்திற்கு வந்த வயநாடு மக்களவை உறுப்பினர் பிரியங்கா காந்தி, 'பாலஸ்தீனம்' என்று அச்சிடப்பட்ட ஹேண்ட் பேக்குடன் வந்தார்.

'காங்கிரஸ் ஒரு புதிய முஸ்லிம் லீக்', 'ராகுல் காந்தியை விட பிரியங்கா காந்தி பெரிய பேரழிவு', 'முட்டாள்தனம்' என்பது போன்ற பிரியங்கா காந்திக்கு எதிராக பல கடுமையான விமர்சனங்களை முன்வைத்தது பா.ஜ.க.

கடந்த ஆண்டு அக்டோபர் மாதம் தொடங்கிய இஸ்ரேல் - பாலஸ்தீனப் போர் இன்னும் முடிவில்லாமல் போய் கொண்டிருக்கிறது. இந்தியா எந்த நாட்டின் பக்கமும் சேராமல் 'போர் கூடாது' என்ற குரலுடன் நடுநிலையாக நிற்கிறது. இந்த நிலையில், பிரியங்கா காந்தி அந்த ஹேண்ட் பேக்குடன் வந்தது தான் பா.ஜ.க-வின் கடுமையான விமர்சனங்களுக்கு காரணம்.

ஆணாதிக்க மனநிலை

இந்த விமர்சனங்களுக்கு பதிலளிக்கும் விதமாக செய்தியாளர்களிடம் பேசிய பிரியங்கா காந்தி, "இது தான் பா.ஜ.க-வின் ஆணாதிக்க மனநிலை. நான் என்ன அணிய வேண்டும் என்பதை யார் முடிவு செய்ய வேண்டும்?

ஆணாதிக்க மனோபாவம் தான் பெண்கள் என்ன அணிய வேண்டும் என்பதை முடிவு செய்யும். இந்த மாதிரியான மனோபாவத்தை நான் பின்பற்ற மாட்டேன். எனக்கு என்ன பிடித்திருக்கிறதோ, அதைத்தான் அணிவேன்" என்று பேசினார்.

புதிதல்ல...

ஆனால், பிரியங்கா காந்தி பாலஸ்தீனத்திற்கு ஆதரவான நிலைபாட்டை எடுப்பது புதிதல்ல.

கடந்த ஜூன் மாதம், இஸ்ரேலின் தாக்குதலால் காசாவில் பலி எண்ணிக்கை அதிகரித்தபோது தனது எக்ஸ் பக்கத்தில், "வெறுப்பு மற்றும் வன்முறையை விரும்பாத இஸ்ரேல் குடிமக்கள் உள்ளிட்ட சரியாக யோசிக்கும் அனைத்து குடிமக்கள் மற்றும் அரசுகளும் இஸ்ரேல் அரசின் இந்த இன படுகொலைக்கு எதிராக குரல் கொடுக்க வேண்டும் மற்றும் அவர்களை இதை நிறுத்த வைக்க வேண்டும்" என்று பதிவிட்டிருந்தார்.

கடந்த வாரம், பாலஸ்தீன தூதரகத்தை சேர்ந்த அதிகாரி ஒருவர் பிரியங்கா காந்தியை அவரது வீட்டில் சந்தித்து வயநாட்டில் அவர் வெற்றி பெற்றதற்கு வாழ்த்து தெரிவித்திருந்தார். மேலும், பிரியங்கா காந்தியிடம் இஸ்ரேல் - பாலஸ்தீனப் போரை முடிவு பெற இந்தியா உதவ முன்வர வேண்டும் என்று பாலஸ்தீன தூதரக அதிகாரி கோரிக்கை விடுத்ததாக கூறப்பட்டது.

வங்காளதேசம்...

பிரியங்காவும் இதற்கு முன்பு பலமுறை இஸ்ரேல் - பாலஸ்தீனப் போரை நிறுத்த குரல் கொடுத்துள்ளார். ஆனால், பிரியங்கா காந்தியின் 'பாலஸ்தீன ஹேண்ட் பேக்' பெரும் பேசுபொருளாக, அடுத்த நாளும் பிரியங்கா காந்தியின் ஹேண்ட் பேக் பேசுபொருளாக தொடர்ந்தது. ஆனால், இந்த முறை (நேற்று) அவரது ஹேண்ட் பேக்கில் 'வங்காள தேசத்திற்கு' ஆதரவான வாசகங்கள் அச்சிடப்பட்டிருந்தது.

இதற்கு ஆளும் கட்சி வாக்குகளுக்காகவே பிரியங்கா காந்தி இந்த மாதிரியான விஷயங்களை செய்கிறார் என்று குற்றம்சாட்டியது.

இதற்கு பதிலடியாக, "இந்த மாதிரி தேவையில்லாத விஷயங்களை அரசு பேசிக்கொண்டு இருக்காமல், இந்து மற்றும் சிறுபான்மையினருக்கு எதிராக வங்காளதேசத்தில் நடக்கும் வன்முறை குறித்து பேச வேண்டும். வங்காளதேச அரசிடம் பேச்சுவார்த்தை நடத்த வேண்டும்" என்று பத்திரிகையாளர்களின் கேள்விகளுக்கு பதிலளித்தார்.

இதுதான் பிரியங்கா காந்திக்கு நாடாளுமன்ற உறுப்பினராக முதல் கூட்டத்தொடர். இந்தக் கூட்டத்தொடரிலேயே அவருடைய பேச்சு மிகவும் கவனிக்கப்படுகிறது மற்றும் இவருக்கு எதிரான விமர்சனங்களும் கூடிக்கொண்டு போகிறது.