RCB: ``பெங்களூரு அணியை வழிநடத்த தயாராக இருக்கிறேன்!" - கேப்டன்சிக்கு விருப்பம் தெரிவித்த படிதார்

சையது முஷ்டாக் அலி டிராபி 2024 டி20 தொடர் இறுதிகட்டத்தை எட்டியிருக்கிறது. பெங்களூரு சின்னசாமி ஸ்டேடியத்தில் இன்று மாலை இறுதிப் போட்டி நடைபெறவிருக்கிறது. இதில், அஜின்க்யா ரகானேவின் அதிரடி ஆட்டங்களால் ஸ்ரேயாஸ் ஐயர் தலைமையிலான மும்பை அணி இறுதிப் போட்டிக்கு முன்னேறியிருக்கிறது. மறுபக்கம், ஆர்.சி.பி அணியில் ரூ. 11 கோடிக்கு தக்கவைக்கப்பட்ட ரஜத் படிதார் தலைமையிலான மத்தியப்பிரதேச அணி இறுதிப் போட்டிக்குச் சென்றிருக்கிறது.

அதுவும், இந்தத் தொடரில் அதிக ரன்கள் குவித்தவர்களில் 347 ரன்களுடன் மூன்றாம் இடத்தில் இருக்கும் படிதார், டெல்லிக்கெதிரான அரையிறுதிப் போட்டியில் அதிரடியாக 29 பந்துகளில் 66 ரன்கள் அடித்து, தனது அணியை 13 வருடங்களுக்குப் பிறகு இறுதிப் போட்டிக்குக் கொண்டு சென்றிருக்கிறார். இந்த நிலையில், அடுத்தாண்டு ஐ.பி.எல் தொடரில் ஆர்.சி.பி அணியை வழிநடத்துவது குறித்து படிதார் தனது விருப்பத்தைத் தெரிவித்திருக்கிறார்.

இது தொடர்பாக ஊடகத்திடம் பேசியிருக்கும் படிதார், ``ஆர்.சி.பி மிகப்பெரிய அணி. ஆர்.சி.பி-க்காக விளையாடுவதை மிகவும் விரும்புகிறேன். அவர்கள் என்னைத் தக்கவைத்தது எனக்கு கூடுதல் நம்பிக்கை அளித்திருக்கிறது. ஆர்.சி.பி அணியை வழிநடத்த எனக்கு ஒரு வாய்ப்பு கிடைத்தால், அதை ஏற்கத் தயாராக இருக்கிறேன். நான் மிகவும் மகிழ்ச்சியாக இருப்பேன். இருப்பினும், அது அணியின் முடிவைப் பொறுத்தது.

எனது பயிற்சியாளர் சந்திரகாந்த் பண்டிட்டிடமிருந்து கேப்டன்சியைப் பற்றி நிறைய கற்றுக்கொண்டேன். அவர் இந்தியாவின் சிறந்த பயிற்சியாளர் என்பது அனைவருக்கும் தெரியும். வீரர்களைக் கவனிப்பதும், அவர்கள் என்ன செய்வார்கள் என்று எதிர்பார்ப்பதும் எனக்குப் பிடிக்கும்." என்று கூறியிருக்கிறார்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/UlagaiMaatriyaThalaivargal