TV Update : இந்தாண்டு `Top Cooku Dupe Cooku' இருக்கா? - Media Masons சொல்வது என்ன?

ஜீ தமிழ் சேனலில் ஒளிபரப்பாகி வந்த 'வள்ளியின் வேலன்' தொடர் முடிவுக்கு வந்திருக்கிறது.

கலர்ஸ் தமிழ் சேனலில் ஒளிபரப்பாகி வந்த 'திருமணம்' தொடரில் ஜோடியாக நடித்தவர்கள் சித்து - ஸ்ரேயா. இந்த சீரியலில் நடித்துக் கொண்டிருந்த போது இருவருக்குமிடையில் காதல் மலர, நிஜ வாழ்க்கையிலும் இணைந்தனர்.

திருமணத்துக்குப் பிறகு இந்த ஜோடியை மீண்டும் 'வள்ளியின் வேலன்' தொடரில் ஜோடியாக்கியது ஜீ தமிழ். 'திருமணம்' தொடரில் நடித்த போது சித்து - ஸ்ரேயா ஜோடியின் கெமிஸ்ட்ரி நன்கு ஒர்க் அவுட் ஆகி அந்த தொடருமே நல்ல வரவேற்பை பெற்றதால், 'வள்ளியின் வேலன்' தொடரும் அதே போல் ஹிட் ஆகும் என எதிர்பார்த்தது சேனல்.

ஆனால் என்ன காரணமோ 'வள்ளியின் வேலனில் அடுத்தடுத்த சில மாற்றங்கள் நடந்தன. ஹீரோயினுக்கு அப்பாவாக நடித்த சாக்‌ஷி சிவா முதலில் மாறினார். பிறகு  கொஞ்ச நாளில் தொடரின் இயக்குனரே மாறியதும் நடந்தது.

இந்தச் சூழலில் தற்போது தொடர் முடிவடைந்து விட்டதாகத் தெரிய வருகிறது.

கடந்த வாரம் தொடரின் கடைசி நாள் ஷூட்டிங் நடக்க, அன்று சீரியலில் நடித்த நடிகர் நடிகைகள் ரொம்பவே எமோஷனலாக இருந்தார்களாம்.

நிறைவடையும் இந்த தொடர் ஒளிபரப்பான நேரத்தில் ஒளிபரப்பாகவிருக்கும் புதிய தொடர் குறித்த அறிவிப்பு இன்னும் வரவில்லை. இப்போதைக்கு அடுத்தடுத்த ஸ்லாட்டுகளில் ஒளிபரப்பாகி வரும் இரண்டு சீரியல்களின் நேரத்தை தலா பதினைந்து நிமிடங்கள் அதிகரித்திருக்கிறார்களாம்.

விஜய் டிவியில் `குக்கு வித் கோமாளி’ சீசன் 6 தொடங்கி விறுவிறுப்பாகப் போய்க் கொண்டிருக்கிறது. ஒருகாலத்தில் விஜய் டிவியுடன் மல்லுக்கட்டிய லட்சுமி ராமகிருஷ்ணன், ராமர், பிக்பாஸில் பரபரப்பை உண்டாக்கி அதிரடியாக வெளியேற்றப்பட்ட நடிகை மதுமிதா ஆகியோர் களம் இறங்கியிருக்கும் சூழலில், வெளியான இரண்டு வார நிலவரப்படி, நிகழ்ச்சிக்கு நல்ல வரவேற்பு கிடைத்திருப்பதாகவே  சொல்கிறார்கள்.

வெங்கடேஷ் பட்-க்குப் பதிலாக இறக்கப்பட்ட மாதம்பட்டி ரங்கராஜ் போதாதென்று இந்தாண்டு மேலும் ஒரு ஜட்ஜை கூட்டி வந்திருக்கிறார்கள்.

அதேநேரம் இந்த நிகழ்ச்சிக்குப் போட்டியாக சன் டிவியில் ஒளிபரப்பாகும் 'டாப் குக்கு டூப் குக்கு' நிகழ்ச்சியின் புரமோ கூட இதுவரை வெளியாகவில்லை.

கடந்தாண்டு மே மாதத்தில் அந்த நிகழ்ச்சியின் முதல் சீசன் தொடங்கி விட்ட நிலையில், இந்தாண்டு இன்னும் புரொமோ கூட வெளியாகததால், நிகழ்ச்சி இருக்கிறதா இல்லையா என்கிற ரீதியில் சமூக ஊடகங்களில் பேச்சுகள் உலாவத் தொடங்கி விட்டன.

'குக்கு வித் கோமாளி' நிகழ்ச்சியை தயாரித்த மீடியா மேசன் நிறுவனமே இந்த நிகழ்ச்சியையும் தயாரிக்கிறது. முதல் சீசனே ஹிட்டுதான். அதனால நிச்சயம் இந்தாண்டும் நிகழ்ச்சி இருக்கு. லேட்டா வந்தாலும் வெயிட்டா இறக்குவாங்க'  என்கிறார்கள்.

சந்தேகத்தைத் தீர்க்கலாமென மீடியா மேசனின் ரவூஃபாவிடமே பேசினோம்.

''இப்ப 'நானும் ரௌடிதான்' நிகழ்ச்சி போயிட்டிருக்கு. அது முடிவடைஞ்சதும் 'டாப் குக்கு டூப் குக்கு' நிகழ்ச்சி நிச்சயம் இருக்கு. போன வருஷம் மே மாசம் தொடங்குச்சுதான். ஆனா இந்த வருஷம் கொஞ்சம் தாமதமா வரும். நாம யாரையும் போட்டியா நினைக்கிறதில்லை. அதனால வர வேண்டிய நேரத்துல ஷோ கண்டிப்பா வரும். சொல்லப் போனா முதல் சீசனை விடவும் தரமாவே வரும். வருஷத்துக்கு வருஷம் டெவலப்மென்ட் இருக்க்கணுமில்லையா...' என்கிறார் உற்சாகமாக.