WHIL: ''பெண் ஹாக்கி அணிக்கான காலம் வெகுதூரத்தில் இல்லை'' - சொல்கிறார் முன்னாள் கேப்டன்!

பிரிஸ்பேனில்  2032-ம் ஆண்டு  நடைபெறவிருக்கும் ஒலிம்பிக்கிலும் அதற்கு அப்பால் நடைபெறவிருக்கும் போட்டிகளிலும் தேசிய அணியில் இளம் பெண்கள் இடம்பிடித்து களம் அமைக்க, பெண்கள் ஹாக்கி இந்தியா லீக் (WHIL) ஊக்குவிக்கும் என நம்புவதாக, இந்திய மகளிர் ஹாக்கி அணியின் முன்னாள் கேப்டன் ராணி ராம்பால்  தெரிவித்திருக்கிறார். 250 க்கும் மேற்பட்ட சர்வதேச போட்டிகளில் விளையாடியுள்ள ராணி ராம்பால் ஹரியானாவைச் சேர்ந்தவர்.

நேற்று முதல் (ஜனவரி 12) ஜனவரி 26 வரை ராஞ்சியில் முதல்முறையாக நடைபெறும் தொடக்க பெண்கள் ஹாக்கி இந்தியா லீக்கில் டெல்லி SG சைப்ரஸ், ஒடிசா வாரியர்ஸ், ஷ்ராச்சி ரார் பெங்கால் டைகர்ஸ் மற்றும் சூர்மா ஹாக்கி கிளப் ஆகிய நான்கு அணிகள் பங்குபெறும். 250-க்கும் மேற்பட்ட சர்வதேச போட்டிகளில் விளையாடியுள்ள ஹரியானாவைச் சேர்ந்த 30 வயதான ராணி ரம்பால் சூர்மா, ஹாக்கி அணிக்கு பயிற்சியாளராக வழிகாட்டவுள்ளார். பாரிஸ் 2024 ஒலிம்பிக்கிற்கு மகளிர் ஹாக்கி அணி தகுதி பெறாத நிலையில், ஹாக்கி இந்தியா லீக் சரியான நேரத்தில் வந்திருப்பதாகவும் இது திருப்புமுனையை ஏற்படுத்தும் என உணர்வதாகவும் ராம்பால் தெரிவித்திருக்கிறார்.

"இம்முறை லீக்-ல் நான்கு அணிகள் மட்டும் இருக்கின்றன. இந்த லீக் தொடங்குவது தாமதமாக முடிவு செய்யப்பட்டுள்ளது. ஆனால், இந்த தொடக்கத்துக்காக ஹாக்கி இந்தியா லீக்-ஐ பாராட்ட வேண்டும். பல ஆண்டுகளுக்கு முன்பு ஹாக்கி இந்தியா லீக் போட்ட அடித்தளத்தால்தான், ஆண்கள் ஹாக்கி அணி டோக்கியோ மற்றும் பாரிஸில் நடந்த ஒலிம்பிக்கில் வெண்கலப் பதக்கங்களை வென்றன. பெண்களுக்கான லீக் அறிமுகத்திற்கு நன்றி. இதனால், 2032 மற்றும் 2036 ஒலிம்பிக்கில் ஹாக்கியில் திறமையான பல இளம் பெண்களை நாம் நிச்சயமாக காண்போம். ஒருகாலத்தில் பெண்கள் கிரிக்கெட் அணியைப்பற்றி யாருக்கும் தெரியாது. ஆனால், இப்போது நிலைமை மாறிவிட்டதல்லவா?  பெண்கள் ஐபிஎல் அணியை போல பெண்கள் ஹாக்கி அணியைப்பற்றியும் எல்லோரும் பேசுவார்கள். அந்தக்காலம் வெகுதூரத்தில் இல்லை" என பெண்கள் ஹாக்கி இந்தியா லீக்கின் தொடக்கம் குறித்து ரம்பால் நம்பிக்கையும் நெகிழ்ச்சியுமாக கூறியுள்ளார்.

தவிர, இந்திய ஜூனியர் ஹாக்கி அணியின் புதிய பயிற்சியாளராக நியமிக்கப்பட்டுள்ள முன்னாள் கோல் கீப்பர் பி. ஆர். ஸ்ரீஜேஷுக்கு வாழ்த்து தெரிவித்த ராணி ராம்பால், "ஸ்ரீஜேஷின் 20 ஆண்டுகால சர்வதேச அனுபவம் ஜூனியர் அணிக்கு மிகுந்த பயனளிக்கும்'' என்று நம்பிக்கையும் தெரிவித்திருக்கிறார்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/TATAStoryepi01