18 வது ஐ.பி.எல் சீசன் வருகிற மார்ச் 21 ஆம் தேதி முதல் தொடங்கும் எனத் தகவல் வெளியாகியிருக்கிறது.
மார்ச் 14 ஆம் தேதி 18 வது ஐ.பி.எல் சீசன் தொடங்கும் என பிசிசிஐ தரப்பில் ஏற்கெனவே அறிவிக்கப்பட்டிருந்தது. இந்நிலையில், இன்று கூடிய பிசிசிஐ யின் நிர்வாகக் குழு கூட்டத்தில் 18 வது ஐ.பி.எல் சீசனின் தேதியை மாற்றியிருப்பதாகத் தகவல் வெளியாகியிருக்கிறது. அதன்படி, மார்ச் 21 ஆம் தேதி சீசன் தொடங்கி மே 25 ஆம் தேதி இறுதிப்போட்டியோடு தொடர் முடியும் என நம்பத்தகுந்த வட்டாரங்களிலிருந்து தகவல் வெளியாகியிருக்கிறது.
இந்தத் தேதி மாற்றத்திற்கு உரிய காரணம் இருப்பதாகவும் தெரிகிறது. ஐ.சி.சியின் சாம்பியன்ஸ் டிராபி தொடர் பிப்ரவரி 19 ஆம் தேதி தொடங்கி மார்ச் 9 ஆம் தேதி வரை நடக்கவிருக்கிறது. ஏற்கெனவே திட்டமிட்டபடி மார்ச் 14 ஆம் தேதி சீசனை தொடங்குவதாக இருந்தால் அது சில அணிகளுக்கு அசௌகரியத்தைக் கொடுக்கும். ஏனெனில், சாம்பியன்ஸ் டிராபியில் ஆடும் முக்கியமான வீரர்கள் ஐ.பி.எல்- க்கு வந்து செட்டில் ஆக ஒரு கால அவகாசமே கிடைக்காது.
சில மாதங்களுக்கு முன்புதான் மெகா ஏலம் நடந்திருப்பதால் எல்லா அணிகளும் நிறைய புதிய வீரர்களை அணியில் எடுத்து வைத்திருக்கிறார்கள். அவர்களையெல்லாம் வைத்து சீசனுக்கு முன்பாக ஒரு ப்ரீ சீசன் கேம்பை வைத்தால்தான் அணியின் கலாசாரத்தோடு அவர்கள் ஒன்றிப்போக முடியும். இதற்குக் கொஞ்ச நாட்களாவது தேவைப்படும். அதனால்தான் ஐ.பி.எல் தொடங்கும் தேதியை மாற்றும் முடிவை பிசிசிஐ எடுத்திருக்கும்.
கடந்த சீசனின் இறுதிப்போட்டியில் சன்ரைசர்ஸ் ஹைதராபாத் மற்றும் கொல்கத்தா நைட் ரைடர்ஸ் ஆகிய அணிகள் மோதியிருந்தன. கொல்கத்தா அணி சாம்பியன் ஆகியிருந்தது. இதனால் ப்ளே ஆப்ஸ் மற்றும் இறுதிப்போட்டி ஆகியவை ஹைதராபாத் மற்றும் கொல்கத்தா நகரங்களில் நடக்கும் என்று தெரிகிறது.
ஐ.பி.எல் அட்டவணையை பிசிசிஐ இன்னும் சில நாட்களில் அதிகாரப்பூர்வமாக அறிவிக்கும் எனத் தெரிகிறது.
