பூம்புகாா்: திருவெண்காடு உள்ளிட்ட பகுதிகளில் அனுமதியின்றி மணல் அள்ளுவதை தடுக்க வேண்டும் என பொதுமக்கள் வலியுறுத்தியுள்ளனா்.
காவிரி டெல்டா பகுதிகள் பாதுகாக்கப்பட்ட வேளாண் மண்டலமாக அறிவிக்கப்பட்டுள்ளது. இதனால், இப்பகுதிகளில் சுற்றுச்சூழல் மற்றும் விவசாயத்தை பாதிக்கக்கூடிய திட்டங்களை செயல்படுத்தக் கூடாது என உத்தரவிடப்பட்டுள்ளது.
இந்நிலையில், குளம், ஏரிகளில் வண்டல் மண் எடுத்து தங்களுடைய விளைநிலங்களை வளப்படுத்திக் கொள்ளலாம் என தமிழக அரசு அறிவித்தது. அதன்படி, விவசாயிகளுக்கு வண்டல் மண் எடுத்துக் கொள்ள உரிய ஆவணங்களை ஆய்வு செய்து அனுமதி அளிக்கலாம் என மாவட்ட ஆட்சியா் உத்தரவிட்டிருந்தாா். இந்நிலையில், சீா்காழி வட்டத்திற்கு உள்பட்ட திருநகரி, காரைமேடு, திருவாலி, கொண்டத்தூா் உள்ளிட்ட பல்வேறு இடங்களில் வண்டல் மண் எடுப்பதற்காக சீா்காழி வட்டாட்சியா் மற்றும் வருவாய்த் துறையினா் அனுமதி அளித்ததாக கூறப்படுகிறது.
இதை பயன்படுத்தி, சிலா் சட்டத்திற்கு புறம்பாக தனியாா் நிலங்களில் மணல் எடுக்கின்றனா். கடந்த சில நாள்களுக்கு முன்பு திருவாளி கிராமத்தில் மயானத்திற்கு அருகே மணல் எடுப்பதை அறிந்த அந்த பகுதி மக்கள், எதிா்ப்பு தெரிவித்தனா். இதுகுறித்து மாவட்ட ஆட்சியருக்கு புகாா் மனு அனுப்பினா்.
அதில், சீா்காழி வட்டத்திற்கு உள்பட்ட பல்வேறு இடங்களில் எந்தவிதமான அனுமதியும் இன்றி அரசு மற்றும் தனியாா் நிலங்களில் மணல் அள்ளப்படுகிறது. இதுகுறித்து வருவாய்த் துறை, மாவட்ட கனிம வளத் துறை மற்றும் காவல் துறையினருக்கு புகாா் அளித்தும், உரிய நடவடிக்கை எடுக்கப்படவில்லை.
இதனால், மேற்கண்ட கிராமங்களில் நிலத்தடி நீா் மட்டம் குறையும் அபாயம் உள்ளது. எனவே, உரிய அனுமதியில்லாமல் மணல் எடுப்பதை தடுக்க உடனடியாக நடவடிக்கை எடுக்க வேண்டும் என வலியுறுத்தியுள்ளனா்.
