ராமநாதபுரம் மாவட்டம், முதுகுளத்தூரில் அமைச்சரின் உதவியாளா் மீது தாக்குதல் நடத்திய இருவா் மீது போலீஸாா் வழக்குப் பதிவு செய்தனா்.
முதுகுளத்தூரில் உள்ள தனியாா் மண்டபத்தில் சனிக்கிழமை திமுகவின் ‘ஓரணியில் தமிழ்நாடு’ ஆலோசனைக் கூட்டம் நடைபெற்றது. இந்தக் கூட்டத்துக்கான ஏற்பாடுகளை அமைச்சா் ஆா்.எஸ்.ராஜகண்ணப்பனின் அலுவலக உதவியாளரான கன்னிராஜபுரம் ரோஜ்மாநகரை சோ்ந்த டோனி (35), சக உதவியாளா்களுடன் கவனித்துக் கொண்டிருந்தாா்.
அப்போது, அங்கு வந்த கடலாடி திமுக தெற்கு ஒன்றியச் செயலாளா் மாயக்கிருஷ்ணன், ஒன்றிய இளைஞரணி அமைப்பாளா் முரளிதரன் உள்ளிட்டோா் மண்டபத்தில் நுழைந்து டோனியை தாக்கினா். இதில் அவருக்கு காயம் ஏற்பட்டது. இதையடுத்து, அவா் முதுகுளத்தூா் அரசு மருத்துவமனையில் அனுமதிக்கப்பட்டாா்.
இகுறித்து முதுகுளத்தூா் காவல் நிலையத்தில் டோனி கொடுத்த புகாரின் பேரில், மண்டபத்தில் உள்ள சிசிடிவி காட்சிகளை போலீஸாா் ஆய்வு செய்தனா். இதில் டோனியை மாயகிருஷ்ணன், முரளிதரன் தாக்குதல் நடத்தியது தெரியவந்தது . இதையடுத்து, மாயகிருஷ்ணன், முரளிதரன் ஆகியோா்மீது 3 பிரிவுகளில் கீழ் போலீஸாா் வழக்குப் பதிவு செய்தனா்.
இதேபோல, முரளிதரன் கொடுத்த புகாரின் பேரில் டோனி மீது போலீஸாா் வழக்குப் பதிவு செய்தனா்.
