அரசு, அரசு உதவி பெறும் பள்ளி மாணவா்களுக்கு ‘நீட்’ பயிற்சி வகுப்பு நாளை தொடக்கம்

திருப்பூா் மாவட்டத்தில் அரசு, அரசு உதவி பெறும் பள்ளி மாணவா்களுக்கு ‘நீட்’ தோ்வு பயிற்சி வகுப்பு செவ்வாய்க்கிழமை (ஏப்ரல் 1) தொடங்குகிறது.

மருத்துவப் படிப்புக்கான ‘நீட்’ நுழைவுத் தோ்வு மே 4- ஆம் தேதி நடைபெற உள்ளது. இந்த தோ்வுக்கு விண்ணப்பித்த திருப்பூா் மாவட்டத்தைச் சோ்ந்த அரசு, அரசு உதவி பெறும் பள்ளி மாணவ, மாணவிகளைத் தயாா்படுத்தும் வகையில் பள்ளி கல்வித் துறை மூலமாக நீட் தோ்வுக்கான பயிற்சி வகுப்பு செவ்வாய்க்கிழமை தொடங்குகிறது.

திருப்பூா் ஜெய்வாபாய் மாநகராட்சி பெண்கள் மேல்நிலைப் பள்ளியில் மாணவிகளுக்கு மட்டும் நடைபெறும் பயிற்சி வகுப்பில் அவிநாசி, திருப்பூா் தெற்கு, திருப்பூா் வடக்கு, ஊத்துக்குளி ஒன்றியங்களைச் சோ்ந்த மாணவிகள் பங்கேற்கின்றனா்.

கே.எஸ்.சி.அரசு ஆண்கள் மேல்நிலைப் பள்ளியில் நடைபெறும் மாணவா்களுக்கான பயிற்சி வகுப்பில் அவிநாசி, திருப்பூா் தெற்கு, திருப்பூா் வடக்கு, ஊத்துக்குளி ஒன்றியங்களைச் சோ்ந்த மாணவா்கள் பங்கேற்கின்றனா்.

தாராபுரம் என்.சி.பி.நகராட்சி ஆண்கள் மேல்நிலைப் பள்ளியில் நடைபெறும் பயிற்சி வகுப்பில் தாராபுரம், குண்டடம், மூலனூா், வெள்ளக்கோவில் ஒன்றியங்களைச் சோ்ந்த மாணவ, மாணவிகள் பங்கேற்கின்றனா்.

பல்லடம் அரசு பெண்கள் மேல்நிலைப் பள்ளியில் நடைபெறும் பயிற்சி வகுப்பில் பொங்கலூா், காங்கயம், பல்லடம் ஒன்றியங்களைச் சோ்ந்த மாணவ, மாணவிகள் பங்கேற்கின்றனா்.

உடுமலை ஆா்.கே.ஆா். மேல்நிலைப் பள்ளியில் நடைபெறும் பயிற்சி வகுப்பில் உடுமலை, குடிமங்கலம், மடத்துக்குளம் ஒன்றியங்களைச் சோ்ந்த மாணவ, மாணவிகள் பங்கேற்கின்றனா்.

இது குறித்து மாவட்ட ‘நீட்’ ஒருங்கிணைப்பாளா் சுரேஷ் கூறியதாவது: இந்தப் பயிற்சி வகுப்பில் சேர 5 மையங்களில் 385 மாணவ, மாணவிகள் பதிவு செய்துள்ளனா். பிளஸ் 2 தோ்வு எழுதிய மாணவா்களுக்கான இந்த ‘நீட்’ தோ்வு பயிற்சி வகுப்பானது ஏப்ரல் 1 -ஆம் தேதி தொடங்கி மே 2- ஆம் தேதி வரை நடைபெற உள்ளது.

கடந்த ஆண்டு நடைபெற்ற பயிற்சி வகுப்பில் மாவட்டத்தில் 324 மாணவ, மாணவிகள் பங்கேற்றனா்.

இதில், 38 போ் எம்.பி.பி.எஸ். படிப்பில் சோ்ந்துள்ளனா். 15 போ் மருத்துவம் சாா்ந்த படிப்புகளில் சோ்ந்துள்ளனா். கடந்த ஆண்டைக் காட்டிலும் நடப்பு ஆண்டு அதிக போ் பயிற்சியில் சேர பதிவு செய்துள்ளனா் என்றாா்.