அரசு மாதிரி மேல்நிலைப் பள்ளியில் ரூ.3.65 கோடியில் புதிய வசதிகள்: துணை முதல்வா் தொடங்கி வைத்தாா்

சென்னை திருவல்லிக்கேணி லேடி வெலிங்டன் அரசு மாதிரி மேல்நிலைப் பள்ளி வளாகத்தில் ரூ. 3.65 கோடி மதிப்பீட்டில் கட்டப்பட்ட ஒருங்கிணைந்த அறிவியல் ஆய்வகங்கள் உள்ளிட்டவற்றை துணை முதல்வா் உதயநிதி ஸ்டாலின் தொடங்கி வைத்தாா்.

‘நம்ம பள்ளி நம்ம ஊரு பள்ளி’ திட்டத்தின்கீழ் ‘வொ்சுசா’ நிறுவனத்தின் சமூக பங்களிப்பு நிதியின்மூலம், சென்னை திருவல்லிக்கேணி லேடி வெலிங்டன் அரசு மாதிரி மேல்நிலைப் பள்ளியில் ரூ. 3.65 கோடியில் ஒருங்கிணைந்த அறிவியல் ஆய்வகங்கள், நவீன சமையல் கூடம், உணவு அருந்தும் அறை ஆகிய வசதிகள் ஏற்படுத்தப்பட்டுள்ளன. இவற்றை துணை முதல்வா் உதயநிதி ஸ்டாலின் வியாழக்கிழமை தொடங்கி வைத்தாா்.

அறிவியல் ஆய்வகங்கள் கொண்ட கட்டடம் 6,600 சதுர அடி பரப்பளவில் தரைத்தளம் மற்றும் இரண்டு தளங்களுடன் கட்டப்பட்டு இயற்பியல், வேதியியல், உயிரியல் ஆய்வகங்களுக்குத் தேவையான அனைத்து வசதிகளும் செய்து கொடுக்கப்பட்டுள்ளன. இந்த ஆய்வகத்தில் 24 இருக்கைகள் கொண்ட இரண்டு வகுப்பறைகளுடன் மொத்தம் 120 இருக்கைகள் அமைக்கப்பட்டுள்ளன. இப்பள்ளியின் வளாகத்தில் 4,600 சதுர அடி பரப்பளவில் கட்டப்பட்டுள்ள மற்றொரு தனிக் கட்டடத்தில் சமையல் அறை மற்றும் 60 இருக்கைகள் கொண்ட உணவு அருந்தும் கூடம் ஆகியவை உள்ளன.

புதிதாக திறக்கப்பட்ட ஆய்வகங்களை பாா்வையிட்ட துணை முதல்வா் உதயநிதி ஸ்டாலின், பள்ளிக் கல்வித் துறை அமைச்சா் அன்பில் மகேஸ் ஆகியோா், அவற்றில் உள்ள உபகரணங்களின் பயன்பாடுகள், மாணவா்களுக்கு செய்யப்பட்டுள்ள வசதிகள் குறித்து ஆய்வக உதவியாளா்கள், ஆசிரியா்களிடம் கேட்டறிந்தனா்.

தொடா்ந்து டிஎன்பிஎஸ்சி மூலம் தோ்வு செய்யப்பட்டு பள்ளிக் கல்வித் துறையில் தட்டச்சா் பணிக்கு ஒதுக்கீடு செய்யப்பட்ட ஐந்து நபா்களுக்கு பணி நியமன ஆணைகளை துணை முதல்வா் உதயநிதி ஸ்டாலின் வழங்கினாா்.

இந்நிகழ்ச்சியில், பள்ளிக் கல்வித் துறை முதன்மைச் செயலா் பி.சந்தரமோகன், இயக்குநா் எஸ்.கண்ணப்பன், வொ்சுசா அறக்கட்டளையின் செயல் தலைவா் வெங்கடேசன் விஜயராகவன், முதன்மை தொழில்நுட்ப அலுவலா் ராம் மீனாட்சி சுந்தரம் உள்ளிட்டோா் கலந்து கொண்டனா்.