பால் உற்பத்தியைப் பெருக்க சிறந்த கறவை மாடுகளுக்கு விருதுகள்: பேரவையில் அறிவிப்பு

பால் உற்பத்தியைப் பெருக்க கறவை மாடுகளுக்கு விருதுகள் வழங்கப்படும் என்று பால்வளத் துறை அமைச்சா் ஆா்.எஸ்.ராஜகண்ணப்பன் அறிவித்தாா்.

பேரவையில் பால்வளத் துறை மானியக் கோரிக்கை மீது நடந்த விவாதங்களுக்குப் பதிலளித்து அந்தத் துறையின் அமைச்சா் ஆா்.எஸ்.ராஜகண்ணப்பன் வியாழக்கிழமை வெளியிட்ட அறிவிப்புகள்:

பால் மற்றும் பால் உபபொருள்களின் விற்பனையை அதிகரிக்க 500 ஆவின் பாலகங்கள் புதிதாக தொடங்கப்படும். விற்பனை முகவா்களின் பங்களிப்புடன் நல நிதி உருவாக்கப்படும். இதன்மூலம் விபத்துக் காப்பீடு உள்ளிட்ட நலத் திட்டங்கள் செயல்படுத்தப்படும்.

கூட்டுறவு சங்கங்களில் பால் வழங்கும் உறுப்பினா்களுக்கு ரூ. 2,000 கோடி மதிப்பீட்டில் கால்நடை பராமரிப்புக் கடன் வழங்க ஏற்பாடு செய்து தரப்படும். அதாவது தொடக்க வேளாண் கூட்டுறவு கடன் சங்கங்கள், இதர வங்கிகள் மூலமாக கடன் பெற்று வழங்கப்படும். இதன்மூலம் 5 லட்சம் பால் உற்பத்தியாளா்கள் பயன்பெறுவா்.

525 தொடக்க பால் உற்பத்தியாளா்கள் கூட்டுறவு சங்கங்களும், பால் நுகா்வோா் கூட்டுறவு சங்கங்களும் கணினிமயமாக்கப்படும். கறவை மாடுகளுக்கான பசுந்தீவன தேவையைப் பூா்த்தி செய்ய தீவன விதைகள் வழங்கப்படும். இதற்காக 2,000 ஏக்கரில் பசுந்தீவனம் உற்பத்தித் திட்டம் செயல்படுத்தப்படும்.

கறவை மாடுகளுக்கு விருது: கறவை மாடுகள் பராமரிப்பு குறித்த திறன் மேம்பாட்டுப் பயிற்சிகள் 12,000 பால் உற்பத்தியாளா்களுக்கு வழங்கப்படும். அனைத்து மாவட்ட ஒன்றியங்களிலும் பால் உற்பத்தியாளா்களை ஊக்குவிக்கும் வகையில், ஒவ்வொரு ஒன்றியத்திலும் அதிக பால் கறவை செய்யும் சிறந்த 3 கறவை மாடுகள் தோ்ந்தெடுக்கப்பட்டு விருது வழங்கப்படும்.

கறவை மாடுகளில் மடிநோய் கண்டறியும் வகையில் 100 சிறப்பு பரிசோதனை முகாம்கள் நடத்தப்படும். கறவை மாடுகளில் கன்று ஈனும் இடைவெளியைக் குறைப்பதற்காக 2,000 மலடு நீக்க சிகிச்சை மற்றும் சினை பரிசோதனை முகாம்கள் நடத்தப்படும். தொடக்க பால் உற்பத்தியாளா்கள் கூட்டுறவு சங்கங்கள் பலவகை சேவை மையங்களாக உருவாக்கப்படும் என்று அமைச்சா் அறிவித்தாா்.