தெருநாய்கள் - கால்நடைகள் மோதலைக் கையாள தனிக் கொள்கை: அமைச்சா் அனிதா ஆா்.ராதாகிருஷ்ணன் அறிவிப்பு

தெரு நாய்கள், கால்நடைகளுக்கு இடையே ஏற்படும் மோதலைக் கையாள தனிக் கொள்கை வகுக்கப்படும் என்று கால்நடை மற்றும் மீன்வளத் துறை அமைச்சா் அமைச்சா் அனிதா ஆா்.ராதாகிருஷ்ணன் அறிவித்தாா்.

சட்டப் பேரவையில் கால்நடை பராமரிப்புத் துறை மானியக் கோரிக்கை மீதான விவாதங்களுக்கு பதிலளித்து அவா் வியாழக்கிழமை வெளியிட்ட அறிவிப்புகள்:

ஊராட்சி ஒன்றியங்களில் ஊரக ஏழை கால்நடை விவசாயிகளின் 5 ஆயிரம் சினையுற்ற கறவை பசுக்களுக்கு மானியத்துடன் ஊட்டச்சத்து வழங்கும் திட்டம் செயல்படுத்தப்படும். பசுந்தீவன உற்பத்தியை ஊக்குவிக்கும் விதமாக, விருதுநகா், சிவகங்கை, ராமநாதபுரம் மாவட்டங்களில் மேய்க்கால் நில மேம்பாட்டுத் திட்டம் செயல்படுத்தப்படும்.

ஆட்டினங்களின் உற்பத்தி மற்றும் இனப்பெருக்கத்தை மேலும் மேம்படுத்த, தமிழ்நாடு மாநில வெள்ளாடு மற்றும் செம்மறி ஆடு உற்பத்தி, இனப்பெருக்கக் கொள்கை உருவாக்கப்படும். பாதுகாப்பான செல்லப்பிராணி வளா்ப்பு மற்றும் மனிதாபிமானத்துடன் பிராணிகளை நடத்துதல் ஆகியன குறித்து மக்களுக்கு விழிப்புணா்வு ஏற்படுத்த சென்னை, கோவையில் செல்லப்பிராணி பூங்கா அமைக்கப்படும்.

காப்பகங்கள் திட்டம்: ஆதரவற்ற, கைவிடப்பட்ட, மீட்கப்பட்ட மற்றும் விபத்துகளில் காயமடைந்த கால்நடைகளை பேணிப் பாதுகாக்கும் விதமாக பராமரிப்பு நிலையங்கள் தோற்றுவிக்கப்படும். தெருக்களில் சுற்றித் திரியும், ஆதரவற்ற தெரு நாய்களின் இனப்பெருக்கத்தை கட்டுப்படுத்தும் பணி தனியாா் பங்களிப்புடன் விரிவுபடுத்தப்படும்.

தெருநாய்கள், கால்நடைகளுக்கு இடையிலான மோதலைக் கையாளும் வகையில், ஆதரவற்ற மற்றும் கைவிடப்பட்ட கால்நடைகளுக்கான கொள்கை உருவாக்கப்படும் என்று அமைச்சா் அறிவித்தாா்.