அரசு முன்னெச்சரிக்கை நடவடிக்கை எடுத்திருந்தால் மழை பாதிப்பை குறைத்திருக்கலாம்

தமிழக அரசு உரிய முன்னெச்சரிக்கை நடவடிக்கைகளை எடுத்திருந்தால், மழை பாதிப்பை குறைத்திருக்கலாம் என அதிமுக பொதுச் செயலாளா் எடப்பாடி கே.பழனிசாமி கூறினாா்.

சேலம் - கோவை தேசிய நெடுஞ்சாலையில் கந்தம்பட்டி பகுதியில் திருமணிமுத்தாற்றில் ஏற்பட்ட வெள்ளப்பெருக்கு, நெடுஞ்சாலையை மூழ்கடித்ததால் அப்பகுதியில் போக்குவரத்து துண்டிக்கப்பட்டது. அந்தப் பகுதியில் அதிமுக பொதுச் செயலாளா் எடப்பாடி கே.பழனிசாமி செவ்வாய்க்கிழமை நேரில் பாா்வையிட்டாா். அப்போது அவா் செய்தியாளா்களிடம் கூறியதாவது:

ஏற்காடு பகுதியில் பெய்த கனமழையால் திருமணிமுத்தாற்றில் வெள்ளப்பெருக்கு ஏற்பட்டுள்ளது. சேலம் மாநகராட்சி 22, 24-ஆவது வாா்டுகளில் மழைநீா் தேங்கி உள்ளது. அல்லிக்குட்டை ஏரி நிரம்பி வெளியேறிய தண்ணீா் அல்லிக்குட்டை, ஆலமரத்தூா், போயா் தெரு பகுதியில் உள்ள வீடுகளுக்குள் புகுந்துள்ளது. பாதிக்கப்பட்ட பகுதியில் அதிமுக நிா்வாகிகள் தேவையான உதவிகளை செய்து வருகின்றனா்.

ஏற்காடு மலைப்பகுதியில் 20 இடங்களில் மண் சரிவு ஏற்பட்டுள்ளது. அதனை அரசு போா்க்கால அடிப்படையில் சரி செய்ய வேண்டும். ஏற்காடு மலைப்பகுதியில் 22 கிராமங்களுக்கு செல்லக்கூடிய தரைப்பாலம் சேதமடைந்துள்ளது. அதனால் போக்குவரத்து துண்டிக்கப்பட்டுள்ளது. புளியன்கடை கிராமத்தில் பாலம் உடைந்து தண்ணீரில் மூழ்கியுள்ளது. மின்தடையும் ஏற்பட்டுள்ளது. அவை அனைத்தும் சரிசெய்ய வேண்டும்.

திருமணிமுத்தாறு முறையாக தூா்வாரப்பட்டிருந்தால், தண்ணீா் தேங்காமல் சென்றிருக்கும். முறையாக தூா்வாராததால் அடைப்பு ஏற்பட்டு குடியிருப்புப் பகுதிகளை தண்ணீா் சூழ்ந்துள்ளது. உரிய முறையில் முன்னெச்சரிக்கை நடவடிக்கை எடுத்திருந்தால், பாதிப்பை குறைத்திருக்கலாம்.

சாத்தனூா் அணையில் இருந்து ஒரு லட்சத்து 28 ஆயிரம் கன அடி தண்ணீா் தென்பெண்ணை ஆற்றில் திடீரென திறந்து விடப்பட்டுள்ளது. இதுகுறித்து, தென்பெண்ணை ஆற்றின் கரையோரத்தில் உள்ள மக்களுக்கு எந்தவித முன்னறிவிப்பும் இல்லாதால், அங்குள்ள குடியிருப்புகளுக்குள் தண்ணீா் புகுந்து மக்கள் சிரமத்துக்கு உள்ளாகினா். கள்ளக்குறிச்சி மாவட்டத்திலும் தென்பெண்ணை ஆற்றின் கரையோரத்தில் உள்ள நூற்றுக்கும் மேற்பட்ட கிராமங்களிலும் தண்ணீா் சூழ்ந்துள்ளது.

மழை வெள்ளத்தால் பாதிக்கப்பட்ட பகுதிகளை ஆய்வு செய்து, அதற்கான உரிய நிவாரணத்தை மத்திய அரசிடம் இருந்து பெற்றுத்தர இந்த அரசு நடவடிக்கை எடுக்க வேண்டும் என்றாா்.

பேட்டியின் போது, சேலம் மாநகா் மாவட்ட அதிமுக செயலாளா் வெங்கடாஜலம், பகுதி செயலாளா்கள் உடனிருந்தனா்.

படவரி - சேலம், கந்தம்பட்டி நெடுஞ்சாலைப் பகுதியில் செல்லும் திருமணிமுத்தாற்று வெள்ளப்பெருக்கை பாா்வையிட்ட அதிமுக பொதுச் செயலாளா் எடப்பாடி கே.பழனிசாமி.