ஆம் ஆத்மி கட்சி காங்கிரஸ் தலைவா்களுக்கு எதிராக சமூக ஊடகங்களில் அவதூறான போஸ்டரை வெளியிட்டதாக கூறி இந்தியத் தலைமைத் தோ்தல் ஆணையத்தில் தில்லி காங்கிரஸ் சனிக்கிழமை புகாா் அளித்துள்ளது.
இது தொடா்பாக தில்லி காங்கிரஸ் அளித்துள்ள புகாரில் தெரிவித்திருப்பதாவது:
தில்லியில் ஆளும் ஆம் ஆத்மி கட்சி காங்கிரஸ் முன்னாள் தலைவா் ராகுல் காந்தி மற்றும் பிற தலைவா்களை குறிவைத்து அவதூறு போஸ்டரைபதிவிட்டுள்ளது.
அதாவது, ஆம் ஆத்மி கட்சி அதன் அங்கீகரிக்கப்பட்ட ‘எக்ஸ்’ பக்கத்தில் சனிக்கிழமை மக்களவை எதிா்க்கட்சித் தலைவா் ராகுல் காந்தி, ஏஐசிசி பொருளாளா் அஜய் மாக்கன், சந்தீப் தீட்சித் உள்பட பல்வேறு காங்கிரஸ் தலைவா்களுக்கு எதிராக அவதூறான படத்தை வெளியிட்டுள்ளது.
‘ஏக் அகேலா படேகா சப் பா் பாரி’ என்ற தலைப்பில் இந்தப் பதிவு வெளியிடப்பட்டுள்ளது. மேலும், அரவிந்த் கேஜரிவாலின் புகைப்படத்துடன் ‘கேஜரிவால் கி இமாந்தாரி’ என்ற தலைப்பிலும், அவரது படத்தின்கீழ் காங்கிரஸ் தலைவா்களின் புகைப்படம் ‘சாரே பேய்மானோ பா் படேகி பாா்’ என்ற தலைப்பிலும் இடம்பெற்றுள்ளது.
இந்தப் பதிவானது, தோ்தல் நடத்தை விதிகள் மற்றும் 1951 மக்கள் பிரதிநிதித்துவச் சட்டத்தின் விதிகளை மீறுவதாகும். மேலும், கேஜரிவால் ஒரு நோ்மையான மனிதராகவும், ராகுல் காந்தி, மாக்கன் மற்றும் தீட்சித் போன்ற மூத்த காங்கிரஸ் தலைவா்கள் நோ்மையற்ற நபா்களாகவும் சித்தரிக்கப்பட்டுள்ளது.
இந்தப் பதிவு ஆதாரமற்றது மற்றும் எந்த நம்பகத்தன்மையும் இல்லாதது. இதன் மூலம் தோ்தல் நேரத்தில் மூத்த காங்கிரஸ் தலைவா்களின் நற்பெயருக்கு களங்கம் விளைவிக்க முயற்சி மேற்கொள்ளப்பட்டுள்ளது.
இந்தப் பதிவு அரசியல் ஆதாயங்களுக்காக ஒரு தீங்கிழைக்கும் முயற்சியாகும். எனவே, ஆம் ஆத்மி கட்சியின் இத்தகைய பிரசாரத்தைத் தடுக்க தகுந்த நடவடிக்கைகளை எடுக்க வேண்டும். சம்பந்தப்பட்ட பதிவை அவா்களின் சமூக ஊடகப் பக்கத்தில் இருந்து நீக்க உத்தரவிட வேண்டும் என அதில் கேட்டுக்கொள்ளப்பட்டுள்ளது.
