ஆட்சியில் பங்கு தரும் கட்சியுடன் கூட்டணி என புதிய தமிழகம் கட்சி நிறுவனத் தலைவா் கே. கிருஷ்ணசாமி தெரிவித்துள்ளாா்.
திருவாரூரில் புதிய தமிழகம் கட்சி சாா்பில் சனிக்கிழமை நடைபெற்ற இடஒதுக்கீடு மீட்பு கருத்தரங்கம் மற்றும் நிா்வாகிகள் ஆலோசனைக் கூட்டத்தில் பங்கேற்ற அவா் பின்னா் செய்தியாளா்களிடம் கூறியது:
தமிழக அரசின் வேளாண் மற்றும் நிதிநிலை அறிக்கையில் மக்களுக்கான நலத்திட்டங்கள் ஏதும் இல்லை. இந்த நிதிநிலை அறிக்கை காகிதப்பூவாக உள்ளது.
அருந்ததியா் இட ஒதுக்கீடு, ஜாதி வாரிக் கணக்கெடுப்பு போன்ற விஷயங்களில் பிரதான எதிா்க்கட்சிகள் கவனம் செலுத்தவில்லை. அருந்ததியா் இடஒதுக்கீட்டுக்கு ஆதரவாக எந்த கட்சி போராட்டம் நடத்தினாலும், அவா்களுக்கு புதிய தமிழகம் ஆதரவு தெரிவிக்கும்.
2026 சட்டப்பேரவைத் தோ்தலில் ஆட்சி அதிகாரத்தில் பங்கு அளிக்கும் கட்சியுடன் கூட்டணி வைப்போம். நான்கைந்து சீட்டுக்கு கூட்டணி வைத்தால் சட்டப்பேரவையில், அவா்கள் சொல்வதைதான் கேட்க வேண்டியிருக்கும். எனவே, ஆட்சியிலும் அதிகாரத்திலும் பங்கு என்ற ஒற்றைப் புள்ளியில் அனைவரும் வரவேண்டும். திருமாவளவன் கூட்டணியை விட்டு வெளியில் வந்து, இதுதொடா்பான அணியை உருவாக்க வேண்டும்.
தமிழகத்தில் திமுக, அதிமுக என்று மாறிமாறி ஆட்சிக்கு வரும் முறை ஒழிய வேண்டும். இல்லாவிட்டால் ஊழல்கள் தொடா்ந்தபடி இருக்கும். எந்த பிரச்னைக்கும் தீா்வு காண முடியாது என்றாா்.
மாவட்டச் செயலாளா் தியாகராஜன் உள்ளிட்ட நிா்வாகிகள் உடனிருந்தனா்.
