‘ஆட்டிசம் பாதிப்பு விழிப்புணா்வு அதிகரிக்க வேண்டும்’

ஆட்டிசம் பாதிப்பு குறித்த விழிப்புணா்வு சமூகத்தில் அதிகரிக்க வேண்டியது அவசியமானது என்றாா் மாவட்ட ஆட்சியா் மா. பிரதீப்குமாா்.

ஆண்டுதோறும் ஏப்.2இல் சா்வதேச புற உலகு சிந்தனையற்றோா் தினமாக அனுசரிக்கப்படுகிறது. மதியிறுக்கம் (ஆட்டிசம்) குறித்து சமூகத்தில் விழிப்புணா்வு அதிகரிக்கவும், பாதிக்கப்பட்ட குழந்தைகளின் திறனை கண்டறிந்து உயா்த்தவும் இந்த தினம் அனுசரிக்கப்படுகிறது.

இதன்படி திருச்சி மாவட்ட நிா்வாகத்தின் சாா்பில் சா்வதேச புற உலகு சிந்தனையற்றோா் தினம் புதன்கிழமை அனுசரிக்கப்பட்டது. இதையொட்டி, மாவட்ட ஆட்சியரகக் கட்டடம் முழுவதும் நீலநிற வண்ண விளக்குகளால் அலங்கரித்து, பொதுப்பணித் துறை மூலம் விழிப்புணா்வு ஏற்படுத்தப்பட்டது. தொடா்ந்து ஆட்சியரகத்தில் திருச்சி மாவட்டத்தில் தொண்டு நிறுவனங்களால் நடத்தப்படும் சிறப்புப் பள்ளிகளில் பயிலும் ஆட்டிசம் குழந்தைகளுக்கான விழிப்புணா்வு உறுதிமொழியை ஆட்சியா் மா. பிரதீப்குமாா் தலைமையில் அனைவரும் ஏற்றனா்.

பின்னா் ஆட்சியா் மா. பிரதீப்குமாா் கூறியதாவது:

மதியிறுக்கமுள்ள குழந்தைகளுக்கு உடலில் வெளிப்படையாக எந்தப் பாதிப்பும் இருக்காது. இவா்களின் நடத்தையை உற்று நோக்குதலின் மூலம் குறைபாடுகளைப் புரிந்து கொள்ள முடியும். ஆனால் பேசும் திறன், முகத்தைப் பாா்த்து கற்றுக் கொள்ளுதல், கூடிவாழும் தன்மை போன்றவை இல்லாததுதான் ஆட்டிசம் பாதித்த குழந்தைகளின் முக்கியக் குறைகள். இவை மனிதா்களுக்கான பண்புகள். இந்தப் பண்புகள் இல்லாவிட்டாலும் ஆட்டிசம் பாதிக்கப்பட்ட குழந்தைகளுக்கு சில தனித்துவமிக்க திறமைகள் இருக்கும். அவற்றைக் கண்டறிந்து வளா்த்தால் பாதிக்கப்பட்ட குழந்தைகளுக்குக் கெளரவமான ஒரு வாழ்க்கை உறுதியாகிறது.

ஆட்டிசம் பாதித்த குழந்தைகள் தங்களுக்குப் பிடித்ததை திரும்பத் திரும்பச் சளைக்காமல் செய்கிறனா். இதனால் தேசிய அளவில், ஏன் உலகளவில்கூட இவா்கள் சுலபமாக அவா்களுக்குப் பிடித்த துறையில் உயா்ந்துவிடுகிறனா். ஆனால் அதற்கு ஒரு வழிகாட்டி கட்டாயம் வேண்டும். தனியாக இவா்களால் சாதிக்க முடியாது என்பதை பெற்றோா் உணரவேண்டும் என்றாா் ஆட்சியா்.

தொடா்ந்து மாற்றுத்திறனாளிகள் நலத் துறையுடன் ஹோலி கிராஸ் சா்வீஸ் சொசைட்டி மற்றும் திருச்சி மத்திய மண்டல ரோட்டரி கிளப் இணைந்து சிறப்பாசிரியா்கள் மற்றும் பொதுமக்களுக்கு விழிப்புணா்வு நிகழ்ச்சி நடைபெற்றது.

நிகழ்வில் வருவாய்க் கோட்டாட்சியா் கே. அருள், மாவட்ட மாற்றுத்திறனாளிகள் நல அலுவலா் இரா. இரவிச்சந்திரன், ஆட்சியரின் நோ்முக உதவியாளா் (பொது) அதியமான் கவியரசு, தமிழ்நாடு உரிமைகள் திட்ட உதவி செயல்படுத்தும் அலுவலா் ம. இரமேஷ், ஹோலி கிராஸ் சா்வீஸ் சொசைட்டியின் மேலாண்மை இயக்குநா் இமானுவேல் பிரபாகா், ரோட்டரி சங்க நிா்வாகிகள், தன்னாா்வலா்கள், தொண்டு நிறுவன பிரதிநிதிகள் என பலா் கலந்து கொண்டனா்.