ஆந்திர இளைஞரை கடத்தி, ரூ.6 லட்சம் கேட்டு கொலை மிரட்டல் விடுத்த நபா்கள் குறித்து போலீலஸாா் விசாரித்து வருகின்றனா்.
ஆந்திர மாநிலம் மேற்கு கோதாவரி மாவட்டத்தைச் சோ்ந்தவா் அனுப் ரெட்டி அசு பாபு (24). இவா் கட்டட வேலைக்காக கடந்த 13-ஆம் தேதி சென்னை கோயம்பேடு வந்தாா். இதனிடையே, 14-ஆம் தேதி அதிகாலை ஆந்திரத்தில் உள்ள அவரது சகோதரா் அனுப் ரெட்டி துா்கா ராவின் கைப்பேசியில் தொடா்பு கொண்ட வினய் என்பவா், சென்னையில் ஒருவரிடம் கைப்பேசி திருடியதால், அனுப் ரெட்டி அசு பாபுவை போலீஸாா் பிடித்து வைத்துள்ளதாகவும், ரூ.40,000 கொடுத்து மீட்க வேண்டும் எனக் கூறியுள்ளாா். மேலும், பணத்தை ஜிபே மூலம் அந்த நபா் பெற்றுக் கொண்டாராம்.
இந்த நிலையில், மீண்டும் அனுப் ரெட்டி துா்காராவை தொடா்பு கொண்ட வினய், பணத்தைக் கொடுத்து போலீஸாரிடமிருந்து அனுப் ரெட்டி அசு பாபுவை மீட்டு வந்துவிட்டேன். ஆனால், எனக்கு ரூ.6 லட்சம் கொடுக்க வேண்டும். இல்லையென்றால் அவரைக் கொலை செய்துவிடுவேன் என மிரட்டியுள்ளாா். மேலும், அசு பாபுவை துன்புறுத்தி அதை விடியோ எடுத்து துா்கா ராவுக்கு அனுப்பியுள்ளாா்.
இதையடுத்து சென்னை வந்த துா்காராவ், கோயம்பேடு காவல் நிலையத்தில் புகாா் அளித்தாா்.
இதுகுறித்து போலீஸாா் வழக்குப் பதிவு செய்து வினய், அவரது மனைவி பிரசாந்தி, சகோதரி சுசீலா ஆகியோரைத் தேடி வருகின்றனா்.
