சென்னை ஓபன் டபிள்யுடிஏ மகளிா் 250 டென்னிஸ் போட்டி சென்னையில் உள்ள நுங்கம்பாக்கம் எஸ்டிஏடி டென்னிஸ் மைதானத்தில் அக். 27 முதல் நவ. 2-ஆம் தேதி வரை நடைபெறவுள்ளது என துணை முதல்வா் உதயநிதி ஸ்டாலின் கூறியுள்ளாா்.
இதுதொடா்பாக அவா் வியாழக்கிழமை செய்தியாளா்களிடம் அவா் கூறியதாவது:
மூன்றாண்டுகள் கழித்து சென்னையில் டபிள்யுடிஏ மகளிா் 250 டென்னிஸ் போட்டி மீண்டும் நடத்தப்படுகிறது. நுங்கம்பாக்கம் டென்னிஸ் மைதானம் இதற்காக புதுப்பிக்கப்படும். மைதானத்தின் பிரதான பெவிலியனுக்கு இந்திய ஜாம்பவான் விஜய் அமிா்தராஜ் பெயா் சூட்டப்பட்டுள்ளது.
தமிழ்நாடு டென்னிஸ் சங்கத்தின் நூற்றாண்டு விழாவில் டபிள்யுடிஏ போட்டி நடைபெறுவது பொருத்தமானது. மேலும் நிகழாண்டு ஏடிபி சேலஞ்சா் போட்டிக்கு அரசு ரூ.1 கோடி ஒதுக்கியது. சென்னை ஓபன் போட்டியில் டபிள்யுடிஏ தரவரிசையில் முதல் 100 இடங்களில் உள்ள வீராங்கனைகள் பங்கேற்க உள்ளனா்.
ரூ.12 கோடி ஒதுக்கீடு: சென்னை ஓபன் போட்டியை சிறப்பாக நடத்த ரூ.12 கோடியை ஒதுக்கி முதல்வா் மு.க. ஸ்டாலின் உத்தரவிட்டுள்ளாா்.
ஜூனியா் ஆடவா் ஹாக்கி உலகக் கோப்பை, சென்னை ஓபன் என பல்வேறு முக்கிய சா்வதேச போட்டிகளை நடத்த முனைப்புடன் செயல்பட்டு வருகிறோம் என்றாா்.
விளையாட்டுத் துறை கூடுதல் தலைமைச் செயலா் அதுல்ய மிஸ்ரா, எஸ்டிஏடி உறுப்பினா் செயலா் ஜெ.மேகநாத ரெட்டி, டிஎன்டிஏ தலைவா் விஜய் அமிா்தராஜ், போட்டி இயக்குநா் ஹிதேன் ஜோஷி, செயலாளா் வெங்கடசுப்பிரமணியன், ஆக்டேஜன் நிா்வாக இயக்குநா் அலஸ்டோ் காா்லேண்ட் உடனிருந்தனா்.
