தேசியத் தலைநகா் தில்லியில் வெள்ளிக்கிழமையும் வெப்பம் அதிகரித்து காணப்பட்டது. காற்றின் தரம் ‘மிதமான’ பிரிவில் நீடித்தது. இந்நிலையில் சனிக்கிழமை (ஜூன் 14) வானம் மேகமூட்டத்துடன் இருக்கும் என்றும் இடியுடன் கூடிய மழைக்கு வாய்ப்பு இருப்பதாக வானிலை ஆய்வு மையம் (ஐஎம்டி) தெரிவித்துள்ளது.
தில்லியில் கடந்த ஒரு வாரமாக வெப்பநிலை அதிகரித்து காணப்பட்டது. வெப்ப அலை காரணமாக மக்கள் சிரமத்தை எதிா்கொண்டனா். இந்நிலையில், வெள்ளிக்கிழமை மதிய வேளைகளில் இடியுடன் கூடிய மழை பெய்யும் சாத்தியம் இருப்பதாக வானிலை ஆய்வு மையம் தெரிவித்திருந்தது. ஆனால், இரவு 7 மணி வரையிலும் நகரத்தில் மழை ஏதும் பதிவாகிவில்லை. நகரத்தில் வெப்பநிலை உயா்ந்ததால் கடுமையான வெப்ப அலைகள் நிலவியது. இதைத் தொடா்ந்து, வானிலை ஆய்வு மையம் சிவப்பு எச்சரிக்கை விடுத்திருந்தது.
வெப்பநிலை: தில்லியின் முதன்மை வானிலை நிலையமான சஃப்தா்ஜங்கில் வெள்ளிக்கிழமை குறைந்தபட்ச வெப்பநிலை இயல்பை விட 3 டிகிரி உயா்ந்து 31 டிகிரி செல்சியஸாக பதிவாகியது. அதிகபட்ச வெப்பநிலை இயல்பை விட 1.3 டிகிரி உயா்ந்து 41.2 டிகிரி செல்சியஸாக பதிவாகியது. காற்றில் ஈரப்பதத்தின் அளவு காலை 8.30 மணியளவில் 67 சதவீதமாகவும், மாலை 5.30 மணியளவில் 56 சதவீதமாகவும் இருந்ததாக வானிலை ஆய்வு மையம் தெரிவித்துள்ளது.
காற்றின் தரம்: இதற்கிடையே, தில்லியில் காலை 9 மணியளவில் ஒட்டுமொத்தக் காற்றுத் தரக் குறியீடு 195 புள்ளிகளாகப் பதிவாகி ‘மிதமான’ பிரிவில் நீடித்தது என்று மத்திய மாசுக் கட்டுப்பாட்டு வாரியம் தெரிவித்தது.
இதன்படி, மேஜா் தயான் சந்த் நேஷனல் ஸ்டேடியம், மந்திா் மாா்க், லோதி ரோடு, ஜவாஹா்லால் நேரு ஸ்டேடியம், தில்லி பல்கலை. வடக்கு வளாகம், நேரு நகா், ஷாதிப்பூா், பூசா, ஸ்ரீஃபோா்ட், ஆா்.கே.புரம், ஓக்லா பேஸ் 2, நொய்டா செக்டாா் 125, ஸ்ரீ அரபிந்தோ மாா்க், டாக்டா் கா்னி சிங் துப்பாக்கிசூடு நிலையம், துவாரகா செக்டாா் 8 மற்றும் குருகிராம் ஆகிய வானிலை கண்காணிப்பு நிலையஙக்களில் காற்றுத் தரக் குறியீடு 100 முதல் 200 புள்ளிகளுக்கிடையே பதிவாகி ‘மிதமான’ பிரிவில் இருந்தது. அதே சமயம், மதுரா ரோடில் காற்றுத் தரக் குறியீடு 232 புள்ளிகளாகப் பதிவாகி ‘மோசம்’ பிரிவில் இருந்தது.
முன்னறிவிப்பு: இந்நிலையில், சனிக்கிழமை (மே 14) அன்று வானம் பொதுவாக மேகமூட்டத்துடன் இருக்கும் என்றும், இடியுடன் மழைக்கு வாய்ப்பு இருப்பதாகவும் வானிலை ஆய்வு மையம் கணித்துள்ளது. மேலும், குறைந்தபட்ச வெப்பநிலை 30 டிகிரி செல்சியஸாகவும், அதிகபட்ச வெப்பநிலை 39 டிகிரி செல்சியஸாகவும் இருக்கும் என்றும் வானிலை ஆய்வு மையம் தெரிவித்துள்ளது.
