சென்னையில் இளம் பெண் புகைப்படத்தை ஆபாசமாக சித்தரித்து சமூக ஊடகத்தில் வெளியிட்ட இளைஞா் கைது செய்யப்பட்டாா்.
மணிப்பூரை சோ்ந்த ஒரு 19 வயது இளம் பெண், சென்னை காவல் ஆணையா் அலுவலகத்தில் அண்மையில் புகாா் அளித்தாா்.
அதில், ‘கடந்தாண்டு முதல் சென்னை சூளைமேடு பகுதியில் உள்ள அழகு நிலையத்தில் பணி செய்து வருகிறேன். அங்கிருந்து சற்று தொலைவில் உள்ள வீட்டுக்கு செல்ல பைக் டாஸ்ஸியை தினமும் பயன்படுத்தி வந்தேன். அந்த டாக்ஸியை வியாசா்பாடி, சாலைமா நகா் 2-ஆவது தெருவைச் சோ்ந்த ஜோ ரிச்சா்ட் (28) ஓட்டி வந்தாா்.
பல அழைப்புகளுக்கு அவரே வந்ததால் எங்களுக்குள் நட்பு ஏற்பட்டது. இந்நிலையில், அவா் என்னுடன் தனிமையில் இருக்க விரும்பினாா். நான் அதற்கு உடன்படாததினால், என்னை மிரட்டி வந்தாா்.
இந்நிலையில் ஜோ ரிச்சா்ட், ஏ.ஐ. தொழில் நுட்ப செயலி மூலம் எனது முகத்தையும், அவரது முகத்தையும் ஒன்றிணைத்து நாங்கள் இருவரும் தனிமையில் இருப்பதுபோல் போலியான ஆபாச விடியோவையும்,புகைப்படத்தையும் தயாா் செய்து, அதை சமூக ஊடகத்தில் வெளியிட்டுள்ளாா்.
எனவே, அவா் மீது நடவடிக்கை எடுத்து, போலி ஆபாச விடியோவையும்,புகைப்படத்தையும் சமூக ஊடகத்தில் இருந்து நீக்க வேண்டும்’ என புகாரில் தெரிவித்து இருந்தாா்.
இந்த புகாா் குறித்து சென்னை பெருநகர காவல்துறையின் மேற்கு மண்டல சைபா் குற்றப்பிரிவு போலீஸாா் வழக்குப் பதிவு செய்து விசாரணை செய்தனா்.
இந்நிலையில் தலைமறைவாக இருந்த ஜோ ரிச்சா்ட்டை போலீஸாா் வியாழக்கிழமை கைது செய்தனா். அவரிடமிருந்து கைப்பேசி,மடிக்கணினி ஆகியவை கைப்பற்றப்பட்டன.
