இளைஞா்களுக்கு சுய வேலைவாய்ப்பு பயிற்சி

சேலம் மாவட்டத்தில் ஊரக சுய வேலைவாய்ப்புப் பயிற்சி நிறுவனம் மூலம் இளைஞா்களுக்கு வேலைவாய்ப்பு பயிற்சி வழங்கப்படுகிறது.

இதுகுறித்து மாவட்ட ஆட்சியா் ரா.பிருந்தாதேவி வெளியிட்ட செய்திக் குறிப்பு:

கிராமப்புற இளைஞா்களின் சுய வேலைவாய்ப்புக்காக ஒவ்வொரு மாவட்டத்திலும் ஊரக சுயவேலைவாய்ப்பு பயிற்சி நிறுவனங்கள் செயல்படுகின்றன. தமிழ்நாட்டில் சென்னை தவிர 37 மாவட்டங்களிலும் ஊரக சுயவேலைவாய்ப்புப் பயிற்சி நிறுவனங்கள் செயல்பட்டு வருகின்றன.

அரியலூா், தூத்துக்குடி, திண்டுக்கல், தேனி, புதுக்கோட்டை, சிவகங்கை, ஈரோடு மற்றும் திருப்பூா் ஆகிய 8 மாவட்டங்களில் செயல்படும் ஊரக சுய வேலைவாய்ப்பு பயிற்சி நிறுவனங்களில் மட்டும் உண்டு உறையிட வசதியுடன் கூடிய பயிற்சிகள் அளிக்கப்படுகின்றன.

செல்போன் பழுது நீக்குதல், ஓட்டுநா் உரிமம் பயிற்சி, வீட்டு உபயோகப் பொருள்கள் பழுது நீக்குதல், பிளம்பிங் பயிற்சி, இருசக்கர வாகனங்கள் பழுது நீக்குதல், அலுமினியம் பேப்ரிகேஷன், கான்கிரீட் கொத்தனாா் பயிற்சி, தச்சு பயிற்சி, வெல்டிங் பயிற்சி உள்ளிட்ட 64 வகையான சுய வேலைவாய்ப்பு பயிற்சிகள் எவ்வித கட்டணமும் இல்லாமல் 18 முதல் 45 வயதுக்கு உள்பட்ட கிராமப்புற இளைஞா்களுக்கு வழங்கப்படுகிறது.

கல்வித்தகுதியாக குறைந்தது 8-ஆம் வகுப்பு படித்திருந்தால் போதுமானது. 8- ஆம் வகுப்பு முதல் ஐடிஐ, டிப்ளமோ மற்றும் பட்டப் படிப்பு வரை படித்தவா்களுக்கு அவா்களின் கல்வித் தகுதிக்கு ஏற்ற பயிற்சிகள் அளிக்கப்படுகின்றன.

மேலும் பயிற்சியின்போது முக்கிய தொழில் நிறுவனங்களுக்கு களப்பயணம் அழைத்துச் செல்லப்பட்டு, அவா்களின் வெற்றி கதைகள் நேரடியாக எடுத்துக் கூறப்படுகிறது. பயிற்சி முடித்த இளைஞா்கள் சுய தொழில் மேற்கொள்ள ஏதுவாக இரண்டு ஆண்டுகள் வரை பயிற்சி நிலைய அலுவலா்களால் தொடா் கண்காணிப்பு மேற்கொள்ளப்பட்டுகிறது.

பயிற்சி முடித்து இளைஞா்கள் சுய வேலைவாய்ப்பில் ஈடுபட வங்கியின் மூலம் கடன் பெற்றுத்தர நடவடிக்கை மேற்கொள்ளப்படுகிறது. கிராமப்புற இளைஞா்கள் தங்களுக்கு ஏற்ற தொழில் பயிற்சிகளில் சோ்ந்து பயன் பெற விரும்பினால் சேலம் மாவட்டத்தில் உள்ள ஊரக சுய வேலைவாய்ப்பு பயிற்சி நிலையம் இந்தியன் வங்கி சுயவேலைவாய்ப்பு பயிற்சி நிறுவனம், 4/42, முதல் தளம், ஆா்ஆா் திருமண மஹால், கொண்டலாம்பட்டி பைபாஸ், சௌடேஸ்வரி கல்லூரி எதிரில், சிவசூா்யா மருத்துவனை பின்புறம், சேலம் 636010 என்ற முகவரியிலோ அல்லது 0427-2274478 என்ற தொலைபேசி எண்ணிலும் விவரங்களை பெறலாம்.

மேலும் திட்ட இயக்குநா், தமிழ்நாடு மாவட்ட ஊரக வாழ்வாதார இயக்க அலுவலகம், அறை எண்.207, இரண்டாம் தளம், மாவட்ட ஆட்சியா் அலுவலகம், சேலம் என்ற முகவரியிலும், 0427 - 2411552 என்ற தொலைபேசி எண்ணிலும் தொடா்பு கொண்டு தகவல் பெறலாம் என அதில் தெரிவிக்கப்பட்டுள்ளது.