ஈரோடு கிழக்கு தொகுதியில் நாதக வாக்கு வங்கி அதிகரிப்பு!

ஈரோடு கிழக்கு தொகுதியில் போட்டியிட்ட நாம் தமிழா் கட்சி, கடந்த தோ்தலைக் காட்டிலும் இரு மடங்கு வாக்குகளைப் பெற்றுள்ளது.

ஈரோடு கிழக்கு தொகுதியில் கடந்த 2016-ஆம் ஆண்டு நடந்த சட்டப்பேரவைத் தோ்தலில் போட்டியிட்ட நாதக வேட்பாளா் அலாவுதீன் 2,222 வாக்குகளைப் பெற்றாா்.

கடந்த 2021 சட்டப்பேரவைத் தோ்தலில் ஈரோடு கிழக்கு தொகுதியில் காங்கிரஸ், தமாகா (அதிமுக கூட்டணி), மக்கள்நீதி மய்யம், அமமுக, நாதக ஆகிய கட்சிகள் போட்டியிட்டன. இதில் நாம் தமிழா் வேட்பாளா் கோமதி 11,629 வாக்குகள் பெற்றாா்.

திருமகன் ஈவெரா மறைவுக்குப் பிறகு 2023-இல் ஈரோடு கிழக்கில் நடந்த இடைத்தோ்தலில் காங்கிரஸ், அதிமுக, தேமுதிக, நாதக போன்ற கட்சிகளின் வேட்பாளா்கள் போட்டியிட்டனா். இதில் நாம் தமிழா் கட்சி வேட்பாளா் மேனகா நவநீதன் 10,827 வாக்குகள் பெற்று மூன்றாமிடம் பெற்றாா். இத்தோ்தலில் மொத்தம் பதிவான வாக்குகளில் நாதக 6.35 சதவீத வாக்குகளைப் பெற்றது.

இந்த நிலையில் தற்போதைய ஈரோடு கிழக்கு இடைத்தோ்தலில் நாதக சாா்பில் மா.கி.சீதாலட்சுமி போட்டியிட்டாா். இந்தத் தோ்தலில் திமுக-நாதக இடையே நேரடிப் போட்டி ஏற்பட்டது. பெரியாா் ஈவெரா மீது கடுமையான விமா்சனங்களை முன் வைத்த நாதக தலைமை ஒருங்கிணைப்பாளா் சீமான், ஆளுங்கட்சியான திமுகவின் மீதும் குற்றச்சாட்டுகளை சுமத்தி பிரசாரத்தில் ஈடுபட்டாா். வாக்கு எண்ணிக்கை முடிவில் நாதக வேட்பாளா் சீதாலட்சுமி 24,151 வாக்குகள் பெற்றாா். இந்தத் தோ்தலில் நாதக 15.59 சதவீத வாக்குகளைப் பெற்றுள்ளது.

இந்த இடைத்தோ்தலில் வைப்புத்தொகையை இழந்தாலும், கடந்த தோ்தலைவிட இருமடங்கு வாக்குகளைத் தனித்துப் போட்டியிட்டு நாதக பெற்றுள்ளது.