ஈரோடு மாநகா் பகுதியில் நிலவும் குடிநீா்ப் பிரச்னையை தீா்க்க கவுன்சிலா்கள் கோரிக்கை

மாநகா் பகுதியில் நிலவும் குடிநீா்ப் பிரச்னையை தீா்க்க நடவடிக்கையெடுக்க வேண்டும் என மாநகராட்சி கவுன்சிலா்கள் கோரிக்கை விடுத்துள்ளனா்.

ஈரோடு மாநகராட்சி சாதாரணக் கூட்டம் மாமன்ற கூட்டரங்கில் மேயா் சு.நாகரத்தினம் தலைமையில் புதன்கிழமை நடைபெற்றது. துணை மேயா் வி.செல்வராஜ், ஆணையா் (பொறுப்பு) தனலட்சுமி ஆகியோா் முன்னிலை வகித்தனா்.

கூட்டத்தில் மாநகராட்சிப் பகுதிகளில் ஆடுவதைக் கூடம், பொதுக் கழிப்பிடத்தில் கட்டணம் வசூலிக்கும் ஓராண்டு குத்தகை இனங்களுக்கான குத்தகை காலம் கடந்த மாா்ச் 31-ஆம் தேதியுடன் நிறைவடைந்துள்ளதால், கடந்த ஆண்டு குத்தகைத் தொகையில் கூடுதலாக 5 சதவீதம் உயா்வு செய்து உரிமத்தை புதுப்பித்து வழங்குவது.

மாநகராட்சிப் பகுதியில் உள்ள ஓராண்டு குத்தகை இனங்களை மூன்றாண்டு காலமாகவும், வணிக வளாகத்துக்கான மூன்றாண்டு குத்தகை இனங்களை 12 ஆண்டுகளுக்கு நடத்தி கொள்வதற்கு அனுமதிப்பது. மாநகராட்சியின் 4 மண்டலங்களிலும் விடுபட்ட பகுதிகளில் குடிநீா் மற்றும் புதை சாக்கடை திட்டம் செயல்படுத்துவதற்கான விரிவான திட்ட அறிக்கை தயாா் செய்யப்பட்டு வருவதால், 13 இடங்களில் உள்ள பழுதான குடிநீா் மேல்நிலை நீா்த்தேக்கத் தொட்டிகளை இடித்து அப்புறப்படுத்திவிட்டு, அதே இடத்தில் புதிதாக மேல்நிலை நீா்த்தேக்கத் தொட்டிகளை கட்டவும், கூடுதலாக 26 இடங்களில் புதிய மேல்நிலை நீா்த்தேக்கத் தொட்டிகள் கட்டுவது.

3-ஆம் மண்டலம் 48-ஆவது வாா்டு ஓடைமேடு பகுதியிலும், 32-ஆவது வாா்டு சங்கு நகா் முதல் வீதியில் பழுதடைந்த நிலையில் காணப்படும் பொதுக்கழிப்பிடத்தை இடித்து அப்புறப்படுத்தி, புதிதாக கட்டுவது. மாநகராட்சி அலுவலகப் பணிக்கு போதுமான வாகனங்கள் இல்லாததால் 6 வாகனங்கள் வாடகை அடிப்படையில் பெற்று இயக்குவது. 48-ஆவது வாா்டு சூரம்பட்டி வலசு அணைக்கட்டுப் பகுதியில் இயங்கும் மாநகராட்சி தொடக்கப் பள்ளியிலும், 30-ஆவது வாா்டு திண்டல் மாநகராட்சி தொடக்கப் பள்ளியிலும் மராமத்துப் பணிகளை செய்வது என்பன உள்ளிட்ட 38 தீா்மானங்கள் கவுன்சிலா்களின் பாா்வைக்கு வைக்கப்பட்டு, மாமன்றத்தில் நிறைவேற்றப்பட்டன.

இதைத் தொடா்ந்து, கூட்டத்தில் கவுன்சிலா்கள் தங்களது பகுதிகளில் நிலவும் பிரச்னைகள் குறித்துப் பேசினா். இதில் ஈரோடு நேதாஜி சாலையில் உள்ள ஆயுா்வேத மருத்துவமனையில் பணியாற்றிய மருத்துவா் ஓய்வுபெற்ால் மாநகராட்சி மூலம் ஆயுா்வேத மருத்துவரை நியமித்து ஆயுா்வேத மருத்துவமனை செயல்பட நடவடிக்கை எடுக்க வேண்டும்.

கனி மாா்க்கெட்டில் கட்டப்பட்ட புதிய வணிக வளாகத்தில் அரசு விதிமுறைகளை மீறி கட்டப்பட்ட 10 கடைகளை உடனடியாக அகற்ற வேண்டும். ஈரோடு மாநகராட்சிப் பகுதியில் பொலிவுறு நகரம் திட்டத்தில் கட்டப்பட்டு திறக்கப்பட்ட வணிக வளாகங்களுக்கு நிா்ணயிக்கப்பட்ட தொகை அதிக அளவில் உள்ளதால், அந்தத் தொகையை குறைத்து கட்டடங்களுக்கு பொது ஏலம் வைத்து விரைவில் பயன்பாட்டுக்கு கொண்டு வர வேண்டும்.

ஊராட்சிக்கோட்டை குடிநீா் பல இடங்களில் முறையாக வழங்கப்படுவதில்லை. பல லட்சம் ரூபாய் மதிப்பில் ஜெனரேட்டா்கள் வாங்கியும் பொதுமக்களுக்கு 3 முதல் 5 நாள்களுக்கு ஒருமுறை மட்டுமே குடிநீா் வழங்கப்படுகிறது. இதனை சீரமைக்க வேண்டும். கோடைக் காலமாக உள்ளதால் அடிப்படை பிரச்னையான குடிநீா்ப் பிரச்னைக்கு முக்கியத்துவம் தந்து போா்க்கால அடிப்படையில் தீா்வு காண வேண்டும். பொதுமக்கள் தண்ணீா் தேவையைப் பூா்த்தி செய்ய ஆழ்துளைக் கிணறுகளின் மின் மோட்டாா்களில் ஏற்பட்டுள்ள பழுதை உடனடியாக சீா் செய்து, பயன்பாட்டுக்கு கொண்டு வர வேண்டும்.

அதிகாரிகள் எடுக்கும் திட்டங்கள் மட்டுமே தீா்மானங்களாக கொண்டு வரப்படுகின்றன. அதை கவுன்சிலா்கள் கவனத்துக்கு கொண்டு வருவது கிடையாது. மாநகராட்சியில் இனி மக்கள் பிரச்னைகளுக்கு தீா்வு காண மேயா், மண்டலத் தலைவா்கள், கவுன்சிலா்களுடன் பேசி தீா்மானங்களை கொண்டு வர வேண்டும் என்றனா்.

முன்னதாக மாமன்றத்தில் காஷ்மீா் பஹல்காமில் நடந்த தீவிரவாத தாக்குதலில் பலியானவா்களுக்கும், இஸ்ரோவின் முன்னாள் தலைவா் கஸ்தூரி ரங்கன் மறைவுக்கும் ஒரு நிமிஷம் மௌன அஞ்சலி செலுத்தப்பட்டது.

1,508 தெரு விளக்குகள்:

மாமன்ற கூட்டத்தில் கவுன்சிலா்களின் கோரிக்கைகளுக்கு அதிகாரிகள் பதிலளித்து பேசுகையில், மாநகராட்சியின் 4 மண்டலங்களிலும் கடந்த 4 மாதங்களில் 5,450 தெரு விளக்குகள் பொருத்தப்பட்டுள்ளன. மேலும் 1,508 தெரு விளக்குகள் வாங்கப்பட உள்ளன. வந்ததும் மீதமுள்ள இடங்களில் பொருத்தப்படும். அந்த மின் விளக்குகள் 40 முதல் 60 வாட்ஸ் அதிகம் வெளிச்சம் தரும்.

ஈரோடு மாநகராட்சி ஆணையா் (பொறுப்பு) தனலட்சுமி கவுன்சிலா்களின் கோரிக்கைகளுக்கு பதிலளித்து பேசியதாவது:

பொலிவுறு நகரம் திட்டத்தில் கட்டப்பட்ட வணிக வளாகங்களுக்கு வைப்புத்தொகை, வாடைகைக்கு நிா்ணயிக்கப்பட்ட தொகையை குறைக்க கோவை மாநகராட்சி ஆணையா் தலைமையில் இருக்கும் குழுவுக்கு அதிகாரம் உள்ளது. அக்குழுவுக்கு வணிக வளாகங்களுக்கான தொகையை குறைக்க பரிந்துரை செய்ய நடவடிக்கை எடுக்கப்படும்.

அதேபோல கனி மாா்க்கெட்டில் விதிமுறைகளை மீறி கட்டப்பட்ட 10 கடைகளை அகற்ற சிஎம்டிஏ வழிகாட்டுதலின்பேரில் அகற்ற நடவடிக்கை எடுக்கப்படும். சொத்து வரி குறைப்பு சம்மந்தமாக தமிழக அரசின் கவனத்திற்கு கொண்டுச் செல்லப்பட்டுள்ளது. மாவட்ட ஆட்சியரும் அதுதொடா்பாக கேட்டுள்ளாா். அது அரசு சாா்ந்த முடிவு. விரைவில் உரிய தீா்வு கிடைக்கும்.

மேலும் தமிழகத்தில் சொத்து வரி வசூலில் ஈரோடு மாநகராட்சி 3-ஆவது இடம் பிடித்திருப்பதற்கு உறுதுணையாக இருந்த மேயா், துணை மேயா், மண்டல தலைவா்கள், கவுன்சிலா்களுக்கும், வரியை செலுத்திய பொதுமக்களுக்கும் எனது நன்றியை தெரிவித்து கொள்கிறேன் என்றாா்.

அதிமுக கவுன்சிலா்கள் வெளிநடப்பு:

மாநகராட்சி மாமன்ற கூட்டத்தில் அதிமுக கவுன்சிலா்கள் பேசுகையில், சொத்து வரியைக் குறைக்க வேண்டும் என ஒன்றரை மாதத்துக்கு முன்பு மாமன்ற கூட்டத்தில் தீா்மானம் நிறைவேற்றப்பட்டது. ஆனால், இதுவரை சொத்து வரி குறித்து எவ்வித பதிலும் இல்லை. இதுதொடா்பாக கவுன்சிலா்களை பொதுமக்கள் கேள்வி எழுப்புகின்றனா். சொத்து வரியைக் குறைக்க நடவடிக்கை எடுக்க வலியுறுத்தி மாமன்ற கூட்டத்தில் இருந்து அதிமுக கவுன்சிலா்கள் வெளிநடப்பு செய்தனா்.