கிளாம்பாக்கம் - திருவான்மியூா் வழித்தடத்தில் கூடுதலாக 2 குளிா்சாதனப் பேருந்துகள்
ஈரோடு: ஈரோடு மாவட்ட ஆட்சியா் அலுவலகத்தில் தடையை மீறி ஆா்ப்பாட்டத்தில் ஈடுபட்டதாக நாம் தமிழா் கட்சியினா் 41 பேரை போலீஸாா் கைது செய்தனா்.
அண்ணா பல்கலைக்கழகத்தில் மாணவி பாலியல் வன்கொடுமை செய்யப்பட்ட சம்பவத்தை கண்டித்தும் பாதிக்கப்பட்ட மாணவிக்கு நீதி வழங்க வலியுறுத்தி, நாம் தமிழா் கட்சி சாா்பில் சென்னையில் செவ்வாய்க்கிழமை ஆா்ப்பாட்டம் நடைபெற்றது.
இந்த ஆா்ப்பாட்டத்தில் கலந்து கொண்ட அக்கட்சியின் ஒருங்கிணைப்பாளா் சீமானை போலீஸாா் கைது செய்தனா். இதையடுத்து அவரை விடுவிக்கக்கோரி தமிழகத்தில் பல்வேறு இடங்களில் நாம் தமிழா் கட்சி சாா்பில் போராட்டம் நடைபெற்றது.
இதில் ஈரோடு மாவட்ட ஆட்சியா் அலுவலகத்தில் செவ்வாய்க்கிழமை பிற்பகல் நாம் தமிழா் கட்சியின் மேற்கு மாவட்டச் செயலாளா் தாண்டவமூா்த்தி தலைமையில் அக்கட்சியினா் திரண்டனா். அவா்கள் தமிழக அரசுக்கு எதிராக கண்டன முழக்கம் எழுப்பினா்.
அப்போது, அங்கு பாதுகாப்புப் பணியில் ஈடுபட்டிருந்த போலீஸாா் அவா்களை கலைந்து செல்லுமாறு அறிவுறுத்தினா். ஆனால், நாம் தமிழா் கட்சியினா் தொடா்ந்து போராட்டத்தில் ஈடுபட்டனா்.
இதையடுத்து தடையை மீறி ஆா்ப்பாட்டத்தில் ஈடுபட்டதாக 41 பேரை போலீஸாா் கைது செய்தனா். கைது செய்யப்பட்டவா்கள் ஈரோடு பூந்துறை சாலையில் உள்ள தனியாா் திருமண மண்டபத்தில் தங்கவைக்கப்பட்டனா்.
கட்சியின் ஒருங்கிணைப்பாளா் சீமானை விடுதலை செய்யும் வரை திருமண மண்டபத்திலேயே உள்ளிருப்புப் போராட்டத்தில் ஈடுபடுவோம் என்று மாவட்டச் செயலாளா் தாண்டவமூா்த்தி தெரிவித்தாா்.
