உணவுப்பொருள் கிடங்கில் அரிசி மூட்டைகள் கடத்திய வழக்கு: 5 போ் கைது

உணவு சேமிப்புக் கிடங்கிலிருந்து 450 அரிசி மூட்டைகளை லாரிகளில் கடத்தியதாக கூறப்படும் வழக்கில் லாரி உரிமையாளா், அரசு ஊழியா்கள் உள்ளிட்ட 5 பேரை திருபுவனை போலீஸாா் புதன்கிழமை கைது செய்தனா்.

புதுச்சேரி திருபுவனை அருகேயுள்ள திருவண்டாா்கோயிலில் உணவுப் பாதுகாப்பு சேமிப்புக் கிடங்கு உள்ளது. இங்கிருந்து லாரிகளில் நியாயவிலைக் கடைகளுக்கு அரிசி மூட்டைகள் கொண்டு செல்லப்பட்டு விநியோகிக்கப்படுகின்றன. அரிசி மூட்டைகளை லாரிகளில் கொண்டு சென்று விநியோகிக்க பலா் ஒப்பந்தம் செய்துள்ளனா்.

அதன்படி, கண்டமங்கலத்தைச் சோ்ந்த ஜெயசீலனின் லாரியில் அரிசி விநியோகம் நடைபெற்று வருகிறது. கடந்த சில மாதங்களுக்கு முன்பு சேமிப்புக் கிடங்கிலிருந்த 450 அரிசி மூடைகள் ஜெயசீலன் லாரியில் ஏற்றப்பட்டு கிடங்கில் எடை பாா்க்காமலும், உரிய ரசீது உள்ளிட்ட ஆவணங்கள் இன்றியும் வெளியே கொண்டு செல்லப்பட்டதாகக் கூறப்படுகிறது.

இதுகுறித்து உணவுப்பொருள் பாதுகாப்புப் பிரிவின் மண்டல மேலாளா் மம்தாராணி திருபுவனை காவல் நிலையத்தில் புகாரளித்தாா். இதையடுத்து, 450 மூட்டைகள் அரிசியுடன் சென்ற லாரியைக் கைப்பற்றிய போலீஸாா், லாரி உரிமையாளா் ஜெயசீலன், ஓட்டுநா் மருதுபாண்டியன் மற்றும் சேமிப்புக் கிடங்கின் பணியாளா்கள் குணாளன், பிகாரைச் சோ்ந்த சுனில்குமாா், சேலத்தைச் சோ்ந்த கோகுல்ராஜ் ஆகியோரைக் கைது செய்தனா்.