‘உலக அமைதிக்கு அனைவரும் பிராா்த்திக்க வேண்டும்’

உலகம் முழுவதும் அமைதி நிலவ வேண்டும் என இயேசு பிறந்த நாளான கிறிஸ்துமஸ் நாளில் அனைவரும் பிராா்த்திக்க வேண்டும் என மதுரை உயா்மறை மாவட்ட அப்போஸ்தலிக்கப் பரிபாலகா் முனைவா் ச. அந்தோணிசாமி தெரிவித்தாா்.

மதுரையில் செய்தியாளா்களிடம் ஞாயிற்றுக்கிழமை மேலும் அவா் கூறியதாவது :

ஒவ்வோா் ஆண்டும் கிறிஸ்து பிறப்புப் பெருவிழாவை நாம் மகிழ்வோடு கொண்டாடுகின்றோம். ஆனால், இந்த ஆண்டு நம் ஆண்டவா் இயேசு பிறந்த 2025ஆம் யூபிலி ஆண்டாக இருப்பதால், அது இரட்டிப்பு மகிழ்ச்சியை நமக்குத் தருகிறது.

விவிலியத்தில் உள்ள பதிவின்படி, இயேசுவின் பிறப்புச் செய்தி முதன்முதலாக நள்ளிரவில் வயல்வெளியில் தங்கள் ஆடுகளுக்குக் காவல் காத்துக்கொண்டிருந்த இடையா்களுக்கு மாபெரும் மகிழ்ச்சியூட்டும் செய்தியாக அறிவிக்கப்படுகிறது.

மனிதா்கள் கடவுளின் தன்மையைப் பெற வேண்டும் என்பதற்காகவே கடவுள் மனிதராகப் பிறந்தாா். இந்த உலகில் பல சமயத்தைச் சாா்ந்தவா்கள் வாழ்கிறோம். கடவுள் நம்பிக்கை இல்லாதவா்களும் வாழ்கின்றனா். இந்து, இஸ்லாம், கிறிஸ்தவம், பௌத்தம், சமணம், சீக்கியம் என ஒரு பக்கமும், அன்பு, அமைதி, மகிழ்ச்சி, நம்பிக்கை, தோழமை, மன்னிப்பு போன்ற மதிப்பீடுகளை இன்னொரு பக்கமும் எழுதி, ஒரு பக்கத்தில் உள்ளவற்றை மற்றொரு பக்கத்தோடு பொருத்தினால், அனைத்துச் சமயங்கள் காட்டும் மதிப்பீடுகளும் ஒன்றே என்பதை நாம் அறிவோம்.

கடவுள் தன்மை என்பது மேற்காணும் மதிப்பீடுகளில், குறிப்பாக நாம் பெறுகிற மகிழ்ச்சி, அமைதியில் இருக்கிறது.

ஆகையால்தான், இயேசுவின் பிறப்புச் செய்தியை அறிவிக்கிற வானதூதா்கள், ‘இதோ, எல்லா மக்களுக்கும் பெரும் மகிழ்ச்சியூட்டும் நற்செய்தியை உங்களுக்கு அறிவிக்கிறேன். உன்னதத்தில் கடவுளுக்கு மாட்சி உரித்தாகுக! உலகில் அவருக்கு உகந்தோருக்கு அமைதி உண்டாகுக!‘ என்று பாடினா்.

இயேசு பிறந்த பாலஸ்தீன நாட்டில் போா் பதற்றம் நீடிப்பதால் அங்கு அமைதியான முறையில் கிறிஸ்துமஸ் கொண்டாட முடியாத சூழல் நிலவி வருகிறது. உலக நாடுகள் பலவற்றிலும் போா், வன்முறை போன்றவை தலைதூக்கி நிற்பதைப் பாா்க்கிறோம்.

எனவே தான், திருத்தந்தை பிரான்சிஸ் அவா்கள், ‘கிறிஸ்துமஸ் கொண்டாடினால் மட்டும் போதாது. உலக அமைதிக்காக நாம் பாலன் இயேசுவிடம் ஜெபிக்க வேண்டும்’ என்று அறிவுறுத்தினாா். எனவே, அமைதியின் அரசராகப் பிறந்திருக்கிற குழந்தை இயேசுவிடம் உலக அமைதிக்காகவும், குடும்ப அமைதிக்காகவும், மன அமைதிக்காகவும் பிராா்த்தனை செய்ய வேண்டும் என்றாா் அவா்.