'உலகின் 6 நாடுகளில் ஒன்று இந்தியா!' - பெருமை சேர்த்த தமிழர்; இனி இஸ்ரோ தலைவர்-யார் இந்த V.நாராயணன்?

உலகத்தையே இந்தியாவை திரும்பி பார்க்க வைத்ததில் இஸ்ரோவிற்கு முக்கிய பங்கு உண்டு. இப்போது அந்த இஸ்ரோவையே தமிழ்நாடு பக்கம் திரும்பி பார்க்க வைத்திருக்கிறார் V. நாராயணன்.

ஆம்...தமிழ்நாட்டை சேர்ந்த V. நாராயணன் தற்போது இஸ்ரோவின் தலைவராக பொறுப்பேற்க உள்ளார். ஒரு தமிழர் இஸ்ரோ தலைவர் ஆவது இது முதல்முறை அல்ல. இதற்கு முன்பு 2018 - 2022 காலக்கட்டத்தில் தமிழ்நாட்டை சேர்ந்த சிவன் இஸ்ரோ தலைவராக இருந்திருக்கிறார்.

இஸ்ரோவின் தற்போதைய தலைவர் சோம்நாத்திற்கு பின், வரும் 14-ம் தேதி இஸ்ரோ தலைவராக பொறுப்பேற்க உள்ளார் V. நாராயணன். இவர் கன்னியாகுமரி மாவட்டத்தை சேர்ந்தவர் ஆவார். 1984-ம் ஆண்டு இஸ்ரோவில் காலடி எடுத்துவைத்த இவர், ராக்கேட் மற்றும் விண்கல புரோபல்ஷன் நிபுணர் ஆவார்.

இவர் ASLV, PSLV ராக்கெட்டுகளில் முக்கிய பங்காற்றியிருக்கிறார். இந்தியாவில் காம்ப்ளக்ஸ் மற்றும் உயர் செயல்திறன் கொண்ட கிரையோஜெனிக் அமைப்பு உள்ளது. உலகத்திலேயே இந்த அமைப்பு 6 நாடுகளிடம் மட்டுமே உள்ளது. அதில் ஒன்று இந்தியா. இப்படி ஒரு பெருமையை இந்தியாவிற்கு வாங்கி தந்தவர் V. நாராயணன். இந்த அமைப்பின் பிள்ளையார் சுழி முதல் வெற்றி வரை அனைத்து பெருமைகளும் இவரையே சேரும்.

2017-ம் ஆண்டில் இருந்து 2037-ம் ஆண்டு வரை இந்தியாவின் புரோபல்ஷன் எப்படி செயல்பட வேண்டும்...எந்தப் பாதையில் செல்ல வேண்டும் என்ற ரோட் மேப்பை இறுதி செய்தவர் இவர் தான்.

இஸ்ரோ தலைவராக பொறுப்பேற்க உள்ள இவர், இப்போது லிக்விட் புரோபல்ஷன் சிஸ்டம் மையத்தின் இயக்குநராக உள்ளார்.V. நாராயணன் அவர்களுக்கு பிரதமர் மோடி, முதல்வர் ஸ்டாலின் உள்ளிட்டவர்கள் வாழ்த்து தெரிவித்துள்ளனர்.