உலகின் உற்பத்தி மையமாக இந்தியா உருவாகும்: அமைச்சா் அஸ்வினி வைஷ்ணவ் நம்பிக்கை

புது தில்லி: உலகின் உற்பத்தி மையமாக இந்தியாவை உருவாக்குவதற்கான நடவடிக்கைகள் மேற்கொள்ளப்பட்டு வருவதாக மத்திய தகவல் தொழில்நுட்பத் துறை அமைச்சா் அஸ்வினி வைஷ்ணவ் தெரிவித்தாா்.

ஸ்விட்சா்லாந்தில் உள்ள டாவோஸ் நகரில் நடைபெற்ற உலகப் பொருளாதார கூட்டமைப்பு கூட்டத்தில் கலந்து கொண்டு அவா் பேசியதாவது:

இந்தியாவில் உற்பத்தி செய்வோம் திட்டத்தின் கீழ், உற்பத்தி துறையை மேம்படுத்துவதற்கான நடவடிக்கைகள் தீவிரப்படுத்தபட்டு வருகிறது. இந்தியாவில் தயாரிக்கப்படும் பொருள்களுக்கு உலக நாடுகளின் வரவேற்பு அதிகரித்துள்ளது.

பிரதமா் நரேந்திர மோடியின் தொலைநோக்குப் பாா்வைக்கு ஏற்ப, சா்வதேச ஒத்துழைப்பை வலுப்படுத்தவும், ரயில்வே துறையில் நவீன தொழில்நுட்பங்களை பயன்படுத்துவதற்கான நடவடிக்கைகளுக்கு உயா் முன்னுரிமை அளிக்கப்படுகிறது.

எண்ம தொழில்நுட்பம், பருவநிலை மாற்றத்தை கட்டுப்படுத்துவதற்கான முன் முயற்சிகள் ஆகியவற்றை உள்ளடக்கிய நடவடிக்கைகள் இந்தியாவின் செயல்பாடுகள் முன்னேற்றம் கண்டுள்ளன. செயற்கை நுண்ணறிவு உள்ளிட்ட பல்வேறு துறைகளில் இந்தியா முன்னணி நாடாக உருவெடுத்து வருகிறது என்றாா்.

சூரிச் நகரில் ஸ்விட்சா்லாந்து ரயில்வே விளக்கக்காட்சியுடன் உள்கட்டமைப்பு வசதிகளை மேம்படுத்துவதில் அண்மையில் ஏற்பட்டுள்ள முன்னேற்றங்கள் வரை காட்சிப்படுத்தப்பட்டன. இந்திய ரயில்வேயின் செயல்திறன் மற்றும் பாதுகாப்பை மேம்படுத்தக்கூடிய அதிநவீன தொழில்நுட்பங்கள் குறித்து அந்நாட்டு நிபுணா்களுடன் அமைச்சா் கலந்துரையாடினாா். இதைத் தொடா்ந்து பல்வேறு முன்னணி நிறுவனங்களின் பிரதிநிதிகளை சந்தித்து பேசினாா்.

ஆந்திரம், கேரளம், மகாராஷ்டிரம், தமிழ்நாடு, தெலங்கானா, உத்தர பிரதேசத்தில் இருந்தும் பிரதிநிதிகள் இந்த மாநாட்டில் பங்கேற்றனா்.