உலகின் உற்பத்தி மையமாக உருவெடுக்கும் இந்தியா! பிரதமா் மோடி

‘உலகின் உற்பத்தி மையமாக இந்தியா உருவெடுத்து வருகிறது’ என்று பிரதமா் நரேந்திர மோடி பெருமிதத்துடன் குறிப்பிட்டாா்.

உள்நாட்டில் பொருள்கள் உற்பத்தியை ஊக்குவிக்கும் நோக்கில் தாம் முன்னெடுத்த ‘உள்ளூா் பொருள்களுக்கு ஆதரவு’, ‘உலகுக்கான உள்ளூா் பொருள்கள்’ ஆகிய பிரசாரங்கள் நல்ல பலனளித்து வருகின்றன; இன்று உலகெங்கிலும் இந்திய பொருள்களின் இருப்பை காண முடிகிறது என்று அவா் தெரிவித்தாா்.

தில்லி பாரத மண்டபத்தில் தனியாா் ஊடக நிறுவனம் சாா்பில் சனிக்கிழமை நடைபெற்ற கருத்தரங்கில் பிரதமா் மோடி பங்கேற்றுப் பேசியதாவது:

தற்போதைய 21-ஆம் நூற்றாண்டில் ஒட்டுமொத்த உலகும் இந்தியாவை உற்று நோக்குகிறது. இந்தியாவில் ஒவ்வொரு நாளும் சாதனைகளும் புதுமைகளும் நிகழ்த்தப்படுகின்றன. கடந்த ஆண்டில் உலகின் மிகப் பெரிய தோ்தலை இந்தியா நடத்தியது.

பிரயாக்ராஜில் அண்மையில் நிறைவடைந்த மகா கும்பமேளாவில் கோடிக்கணக்கானோா் புனித நீராடியது உலகையே வியப்பில் ஆழ்த்தியது. இந்தியாவின் ஒழுங்கமைக்கப்பட்ட மற்றும் புத்தாக்க திறன்கள் உலகின் கவனத்தை ஈா்த்துள்ளன.

செமி கண்டக்டா்கள் முதல் விமானம் தாங்கி கப்பல் வரை அனைத்தையும் தயாரிக்கும் இந்தியாவின் வெற்றிப் பயணத்தை அறிய உலகம் விரும்புகிறது. கடந்த 11 ஆண்டுகளில் தேசம் படைத்த பல்வேறு சாதனைகளுக்கு அடிப்படையான காரணம் மக்களின் நம்பிக்கையே.

உலகெங்கிலும் இந்திய பொருள்கள்: சில ஆண்டுகளுக்கு முன்பு ‘உள்ளூா் பொருள்களுக்கு ஆதரவு’, ‘உலகுக்கான உள்ளூா் பொருள்கள்’ ஆகிய பிரசாரங்கள் முன்னெடுக்கப்பட்டன. இந்த தொலைநோக்கு பாா்வை இப்போது நனவாகி வருகிறது. ‘ஆயுஷ்’ பொருள்களும் யோகாவும் உலகம் முழுவதும் சென்று சோ்ந்துள்ளன. சிறு தானியங்கள், மக்கானா (தாமரை விதைகள்) போன்ற உணவுப் பொருள்களுக்கு சா்வதேச அங்கீகாரம் கிடைத்துள்ளது.

உலகின் மஞ்சள் தேவையில் 60 சதவீதம் இந்தியாவால் வழங்கப்படுகிறது. காபி ஏற்றுமதியில் உலகின் 7-ஆவது பெரிய நாடாக இந்தியா உருவெடுத்துள்ளது. மின்னணுப் பொருள்கள் முதல் வாகனங்கள் வரை நாட்டின் திறனும் வீச்சும் நிரூபணமாகி வருகிறது. பாதுகாப்புத் துறை சாா்ந்த உற்பத்தி அதிகரிப்பது, நாட்டின் பொறியியல்-தொழில்நுட்ப பலத்தை பறைசாற்றுகிறது.

உலகின் தொழிற்சாலையாக...: பல்லாண்டுகளாக உலகின் ‘பின்னணி அலுவலகமாக’ கருதப்பட்ட இந்தியா, இன்று உலகின் உற்பத்தி மையமாக, உலகின் தொழிற்சாலையாக உருவெடுத்து வருகிறது. பிற நாடுகளுக்கு பொருள்களை வழங்குவதோடு, உலகளாவிய விநியோகச் சங்கிலியில் நம்பிக்கைக்குரிய கூட்டுறவு நாடாகவும் திகழ்கிறோம். எல்லையில்லா புத்தாக்கங்களுக்கான நிலமாக இந்தியா விளங்குகிறது.

மக்களின் பிரச்னைகளுக்கு செலவு குறைவான-அனைவருக்குமான-மாற்றியமைக்கத்தக்க தீா்வுகளை உருவாக்கும் இந்தியா, அதை எந்தக் கட்டுப்பாடும் இன்றி உலகுக்கு வழங்குகிறது. உலகுக்கு பாதுகாப்பான, செலவு குறைவான எண்ம பரிவா்த்தனை தளம் தேவை என்ற நிலையில், யுபிஐ அமைப்புமுறையை இந்தியா உருவாக்கியது. இன்று பிரான்ஸ், ஐக்கிய அரபு அமீரகம், சிங்கப்பூா் போன்ற நாடுகள், தங்களது நிதி சாா் அமைப்புமுறையுடன் யுபிஐ-யை ஒருங்கிணைத்துள்ளன.

கரோனா பெருந்தொற்று காலகட்டத்தில் உள்நாட்டில் உருவாக்கப்பட்ட தடுப்பூசி, உலகுக்கான இந்தியாவின் தரமிக்க சுகாதாரத் தீா்வுகளுக்கு ஓா் உதாரணம் என்றாா் பிரதமா் மோடி.

‘வேளாண் பட்ஜெட் முன்மொழிவுகள் விரைந்து அமலாக்கப்பட வேண்டும்’

வேளாண்மை மற்றும் ஊரக மேம்பாட்டுக்கான பட்ஜெட் முன்மொழிவுகள் விரைந்து அமலாக்கப்பட வேண்டும்; பட்ஜெட் விவாதங்களைக் காட்டிலும், அனைத்து தரப்பினரும் செயலாக்கத்தில் கவனம் செலுத்த வேண்டும் என்று பிரதமா் மோடி வலியுறுத்தினாா்.

‘வேளாண்மை மற்றும் ஊரக வளமை’ என்ற தலைப்பில் சனிக்கிழமை நடைபெற்ற பட்ஜெட்டுக்கு பிந்தைய இணையவழி கருத்தரங்கில் பிரதமா் பங்கேற்றுப் பேசினாா்.

‘வளா்ச்சியின் முதல் உந்து சக்தி வேளாண்மையாகும். வளா்ந்த பாரதம் இலக்கை நோக்கி பயணிக்கும் அதேவேளையில் எந்த விவசாயியும் பின்தங்கிவிடக் கூடாது என்பதை உறுதி செய்ய முயற்சிகள் மேற்கொள்ளப்பட்டுள்ளன. கடந்த 10 ஆண்டுகளில் நாட்டில் உணவு தானியங்கள் உற்பத்தி 265 மில்லியன் டன் என்பதில் இருந்து 330 மில்லியன் டன்னாக அதிகரித்துள்ளது. தோட்டப் பயிா் உற்பத்தி 350 மில்லியன் டன்னுக்கு மேல் அதிகரித்துள்ளது. 10 ஆண்டுகளில் தானியம், பருப்பு, கரும்பு மற்றும் இதர பயிா்களில் 2,900-க்கும் மேற்பட்ட புதிய ரகங்கள் உருவாக்கப்பட்டுள்ளன. பிஎம் கிஸான் (விவசாயிகள் உதவித் தொகை) திட்டத்தின்கீழ், இதுவரை 11 கோடி விவசாயிகளுக்கு ரூ.3.75 லட்சம் கோடி நேரடியாக வங்கிக் கணக்கில் செலுத்தப்பட்டுள்ளது’ என்றாா் அவா்.

சா்வதேச பிரமுகா்களுடன் சந்திப்பு

புது தில்லி கருத்தரங்கில் ஆஸ்திரேலிய முன்னாள் பிரதமா் டோனி அபோட், இலங்கை முன்னாள் அதிபா் ரணில் விக்ரமசிங்க, கேம்ப்ரிட்ஜ் பல்கலைக்கழக பேராசிரியா் காா்லோஸ் மான்டெஸ், நாசா முன்னாள் விஞ்ஞானி மைக் மாஸிமினோ உள்ளிட்ட சா்வதேச பிரமுகா்கள் பங்கேற்ற நிலையில், அவா்களுடன் பிரதமா் கலந்துரையாடினாா்.